பான் பசிபிக் ஓபன் பெண்கள் சர்வதேச டென்னிஸ் போட்டியில் ஸ்பெயின் வீராங்கனை கார்பின் முகுருஜா கால் இறுதிக்கு தகுதி பெற்றார்.
பான் பசிபிக் ஓபன் பெண்கள் சர்வதேச டென்னிஸ் போட்டி ஜப்பான் தலைநகர் டோக்கியோவில் நடந்து வருகிறது. இதில் ஒற்றையர் 2-வது சுற்று ஆட்டம் ஒன்றில் முன்னாள் நம்பர் ஒன் வீராங்கனை கார்பின் முகுருஜா, 6-4, 6-2 என்ற நேர்செட்டில் கிரீஸ் வீராங்கனை தேஸ்பினா பாபாமிக்கேலை தோற்கடித்து கால்இறுதிக்கு முன்னேறினார்.
மற்றொரு ஆட்டத்தில் உலக தரவரிசையில் 4-வது இடம் வகிப்பவரும், போட்டித்தரநிலையில் முதலிடம் பெற்றவருமான ஸ்பெயின் வீராங்கனை பாலா படோசா 3-6, 2-6 என்ற நேர்செட்டில் 36-வது இடத்தில் உள்ள கின்வென் செங்கிடம் அதிர்ச்சி தோல்வி அடைந்தார்.
தரவரிசையில் 10-வது இடத்தில் இருக்கும் பிரான்ஸ் வீரங்கனை கரோலின் கார்சியா 6-4, 6-7, 6-7 என்ற செட் கணக்கில் 28-ம் நிலை வீராங்கனையான சீனாவின் சூவாய் ஜாங்கிடம் போராடி வீழ்ந்தார். மற்றொரு ஆட்டத்தில் விம்பிள்டன் சாம்பியனான, கஜகஸ்தான் வீராங்கனஐ எலினா ரைபகினா 2-6, 4-6 என்ற நேர்செட்டில் ரஷியாவின் லிட்மினா சாம்சோனோவாவிடம் தோல்வி அடைந்தார்.
இதேபோல், கொரியா ஓபன் பெண்கள் சர்வதேச டென்னிஸ் போட்டி சியோலில் நடந்து வருகிறது. இதன் ஒற்றையர் 2-வது சுற்று ஆட்டம் ஒன்றில் தரவரிசையில் 129-வது இடத்தில் இருக்கும் இந்திய வீராங்கனை அங்கிதா ரெய்னா 1-6, 3-6 என்ற நேர்செட்டில் 70-வது இடத்தில் உள்ள லின் ஹூவிடம் தோல்வி அடைந்தார்.
மற்றொரு ஆட்டத்தில் சமீபத்தில் நடந்த சென்னை ஓபனில் பட்டம் வென்றவரும், தரவரிசையில் 74-வது இடத்தில் இருப்பவருமான செக்குடியரசு வீராங்கனை லின்டா புருவிர்தோவா 1-6, 4-6 என்ற நேர்செட்டில் தரவரிசையில் யானினா விக்மேயரிடம் தோல்வியை சந்தித்து ஏமாற்றம் அளித்தார்.
