கர்நாடகாவில் உள்ள அனைத்து குடும்பத் தலைவர்களுக்கும் மாதந்தோறும் ரூ.2000 வழங்கப்படும் என்ற அசத்தல் வாக்குறுதிக்கு அம்மாநில முதல்வர் சித்தராமையா அதிரடியாக ஒப்புதல் அளித்தார்.
அதுமட்டுமின்றி, காங்கிரஸ் கூறிய 5 தேர்தல் வாக்குறுதிகளுக்கும் ஒப்புதல் அளிக்கப்பட்டுள்ளதால் அவை அனைத்தும் உடனடியாக நடைமுறைக்கு வந்துள்ளன.
கர்நாடக சட்டமன்றத் தேர்தலில் ஆட்சிக்கட்டிலில் இருந்த பாஜகவை காங்கிரஸ் தூக்கியெறிந்தது. மொத்தமுள்ள 224 சட்டமன்றத் தொகுதிகளில் 135-ஐ காங்கிரஸ் கைப்பற்றியது. இதன் தொடர்ச்சியாக, அங்கு முதல்வராக சித்தராமையாவும், துணை முதல்வராக டி.கே. சிவக்குமாரும் பதவியேற்றுக் கொண்டனர்.
காங்கிரஸின் இந்த அமோக வெற்றிக்கு முக்கிய காரணங்களுள் ஒன்று, அக்கட்சி அளித்த 5 முத்தான வாக்குறுதிகள் தான். குடும்பத் தலைவர்களுக்கு மாதந்தோறும் ரூ.2000 நிதியுதவி, 200 யுனிட் வரை இலவச மின்சாரம், வேலை இல்லாதவர்களுக்கு ரூ.1500, பெண்களுக்கு இலவச பஸ் பயணம், வறுமைக்கோட்டுக்கு கீழ் உள்ள குடும்பங்களுக்கு 10 கிலோ இலவச அரிசி ஆகிய 5 வாக்குறுதிகளை காங்கிரஸ் அளித்துள்ளது.
இதனிடையே, இந்த வாக்குறுதிகளை நிறைவேற்ற அதிக நிதி தேவை. எனவே, இதை செயல்படுத்த வாய்ப்பே இல்லை. மக்களை ஏமாற்றுவதற்காக காங்கிரஸ் பொய் வாக்குறுதிகளை அளித்துள்ளதாக பாஜக விமர்சித்து வந்தது.
