தமிழக அரசியலில் ஒரு புதிய அத்தியாயம் புனித ஜார்ஜ் கோட்டையில் எழுதப்பட உள்ளது. முதலமைச்சராகப் பதவியேற்ற நடிகர் விஜய், இன்று முதல் முறையாகத் தமிழக சட்டமன்றத்திற்குள் காலடி எடுத்து வைக்கிறார். 59 ஆண்டுகால திராவிடக் கட்சிகளின் ஆட்சிக்கு முற்றுப்புள்ளி வைத்து, ஒரு புதிய அரசாங்கம் அமைந்த பிறகு நடைபெறும் முதல் கூட்டத்தொடர் என்பதால், ஒட்டுமொத்த இந்தியாவே இன்று சென்னையை நோக்கித் திரும்பியுள்ளது.
இந்தச் சட்டமன்ற அமர்வில் ஒரு சுவாரஸ்யமான விஷயம் என்னவென்றால், முதலமைச்சர் விஜய்க்கு நேர் எதிரே எதிர்க்கட்சித் தலைவர் இருக்கையில் உதயநிதி ஸ்டாலின் அமரப்போகிறார். திரைத்துறையிலும் அரசியலிலும் சமகாலப் போட்டியாளர்களாகப் பார்க்கப்படும் இருவரும், சட்டப்பேரவையில் நேருக்கு நேர் சந்திக்கும் இந்தத் தருணம் ஒரு மிகப்பெரிய அரசியல் அதிர்வலையை ஏற்படுத்தியுள்ளது.
நாளை நடைபெறப்போகும் சபாநாயகர் மற்றும் துணைச் சபாநாயகர் தேர்தல் தான், முதலமைச்சர் விஜய்க்கு வழங்கப்பட்டுள்ள முதல் ‘அக்னிப் பரீட்சை’. தற்காலிக சபாநாயகராக நியமிக்கப்பட்டுள்ள கருப்பையா தலைமையில் இந்தத் தேர்தல் நடைமுறைகள் தொடங்கும். சபாநாயகர் பதவிக்குத் தகுதியான ஒரு உறுப்பினரை முதலமைச்சர் தரப்பு முன்மொழிய, மற்றொரு உறுப்பினர் வழிமொழிய வேண்டும். ஒன்றுக்கு மேற்பட்ட வேட்பாளர்கள் போட்டியிட்டால் மட்டுமே வாக்கெடுப்பு நடத்தப்படும்.
பொதுவாகக் குரல் வாக்கெடுப்பு அல்லது கை உயர்த்தும் முறை பின்பற்றப்படும் என்றாலும், தற்போதைய அரசியல் சூழலில் ரகசிய வாக்கெடுப்பு நடத்தப்படவும் வாய்ப்புள்ளதாகத் தெரிகிறது. பெரும்பான்மை உறுப்பினர்களின் ஆதரவைப் பெறும் நபர் சபாநாயகராகத் தேர்ந்தெடுக்கப்பட்ட பிறகு, அவரை முதலமைச்சரும் எதிர்க்கட்சித் தலைவரும் இணைந்து கௌரவமாகச் சபாநாயகர் இருக்கைக்கு அழைத்துச் செல்வது ஒரு மரபுவழி நடைமுறையாகும்.
சபாநாயகர் தேர்தல் முடிந்த கையோடு, விஜய் தலைமையிலான அரசு தனது மெஜாரிட்டியை நிரூபிப்பதற்கான “நம்பிக்கை தீர்மானத்தை” கொண்டு வர உள்ளது. இதுதான் இந்தச் சட்டமன்றத் தொடரின் மிக முக்கியமான கட்டம். 108 இடங்களை மட்டுமே வைத்துள்ள தமிழக வெற்றிக் கழகம், காங்கிரஸ், விசிக மற்றும் இடதுசாரி கட்சிகளின் ஆதரவுடன் 120 என்ற பலத்தோடு இருந்தாலும், இந்த நம்பிக்கை வாக்கெடுப்பில் வெற்றி பெற்றால் மட்டுமே அதிகாரப்பூர்வமாகத் தனது ஆட்சியை உறுதிப்படுத்த முடியும். அதிமுக-வில் நிலவும் உட்கட்சி மோதல்கள் மற்றும் திமுக-வின் அதிரடி வியூகங்களுக்கு மத்தியில், தனது கூட்டணி கட்சிகளை ஒருங்கிணைத்து இந்தத் தேர்வில் விஜய் எப்படித் தேறப்போகிறார் என்பதே அரசியல் விமர்சகர்களின் எதிர்பார்ப்பாக உள்ளது.
வெறும் ஐந்து நாட்களுக்கு முன்பு வரை நீடித்த அரசியல் இழுபறிகள், நள்ளிரவுப் பேச்சுவார்த்தைகள் மற்றும் ஆளுநரின் நிபந்தனைகள் என அனைத்தையும் தாண்டி, இப்போது முதல்வர் நாற்காலியில் அமர்ந்துள்ள விஜய்க்கு நிர்வாக ரீதியாகவும் அரசியல் ரீதியாகவும் இது ஒரு மிகப்பெரிய சவாலாகும்.
தமிழகத்தின் 10 லட்சம் கோடி கடன் சுமையைச் சமாளிப்பது ஒருபுறம் இருந்தாலும், சட்டப்பேரவையில் அனுபவம் வாய்ந்த எதிர்க்கட்சித் தலைவர்களின் கேள்விக் கணைகளை அவர் எப்படி எதிர்கொள்ளப் போகிறார் என்பதுதான் மிகப்பெரிய கேள்வி. எண்களின் அடிப்படையில் வெற்றி பெற்றாலும், நிர்வாகத் திறமையின் அடிப்படையில் தன்னை நிரூபிக்க வேண்டிய கட்டாயத்தில் விஜய் உள்ளார். நாளை நடக்கப்போகும் இந்தச் சட்டமன்றப் போர், தமிழகத்தின் அடுத்த ஐந்து ஆண்டுகால அரசியலின் திசையைத் தீர்மானிக்கப் போகிறது.
