தங்கம் வாங்கப் போறீங்களா? வெளியான அதிர்ச்சி தகவல்?

இந்தியப் பொருளாதாரத்தில் தங்கம் என்பது வெறும் உலோகம் மட்டுமல்ல, அது சாமானிய மக்களின் மிகப்பெரிய நம்பிக்கையாகவும், முதலீடாகவும் இருந்து வருகிறது. இந்நிலையில், சமீபத்தில் பிரதமர் நரேந்திர மோடி விடுத்த ஒரு முக்கியமான கோரிக்கை, தற்போது நகை வியாபாரிகள் மத்தியில் மிகப்பெரிய எதிரொலியை ஏற்படுத்தியுள்ளது.

வளைகுடா நாடுகளில் நிலவும் போர் பதற்றம் காரணமாகக் கச்சா எண்ணெய் விலை உயர்ந்து, நாட்டின் அந்நியச் செலாவணி கையிருப்பு பாதிக்கப்படுவதைத் தவிர்க்க, அடுத்த ஓராண்டிற்குத் தங்கம் வாங்குவதைக் குறைத்துக் கொள்ளுமாறு பிரதமர் நாட்டு மக்களைக் கேட்டுக்கொண்டார்.

பிரதமரின் இந்த வேண்டுகோளை ஏற்று, தமிழ்நாடு தங்க நகை வியாபாரிகள் கூட்டமைப்பு ஒரு அதிரடி அறிவிப்பை வெளியிட்டுள்ளது. அதன்படி, நகைக்கடைகளில் தங்கக் காசுகள் (Gold Coins) விற்பனை நிறுத்தப்படுவதாகவும், சில சேமிப்புத் திட்டங்களில் மாற்றங்கள் செய்யப்பட உள்ளதாகவும் தகவல்கள் வெளியாகியுள்ளன.

ஆனால், இந்த முடிவின் பின்னணியில் இருக்கும் பொருளாதாரக் காரணங்களை ஆராய்ந்தால் சில சுவாரஸ்யமான உண்மைகள் வெளிவருகின்றன. பொதுவாக நகைக்கடைக்காரர்களுக்குத் தங்கக் காசுகள் விற்பனையில் கிடைக்கும் லாபம் மிகக் குறைவு. ஆனால், நகைகளாக விற்கும்போது செய்கூலி மற்றும் சேதாரம் மூலம் அவர்களுக்கு அதிக லாபம் கிடைக்கிறது. தற்போது நகைகளின் விலை உயர்வால், மக்கள் நகைகளைத் தவிர்த்துவிட்டுத் தங்கக் காசுகளை அதிகம் வாங்கத் தொடங்கியுள்ளனர்.

இந்த லாப இழப்பைத் தவிர்க்கவே, வியாபாரிகள் தங்கக் காசுகள் விற்பனையை நிறுத்தும் முடிவை எடுத்திருப்பதாகப் பொருளாதார நோக்கர்கள் கருதுகின்றனர். அதேபோல், நடுத்தர மக்கள் தங்கம் வாங்குவதற்குப் பெரிதும் பயன்படுத்தும் ‘தங்கச் சீட்டு’ அல்லது நகை சேமிப்புத் திட்டங்களையும் நிறுத்துவது குறித்துப் பேச்சுகள் எழுந்துள்ளன.

11 மாதங்கள் சிறுகச் சிறுகப் பணம் சேர்த்து 12-வது மாதம் நகையாக வாங்கும் இந்தத் திட்டம் நிறுத்தப்பட்டால், அது சாமானிய மக்களுக்கு ஒரு மிகப்பெரிய அடியாகவே இருக்கும். அதுமட்டுமின்றி, தற்போது பிரபலமாகி வரும் ‘டிஜிட்டல் தங்கம்’ மற்றும் ‘தங்க ETFs’ (Gold ETFs) போன்ற முதலீட்டு முறைகளைத் தடை செய்ய வேண்டும் என்றும் நகை வியாபாரிகள் கோரிக்கை விடுத்துள்ளனர்.

இன்றைய தலைமுறையினர் தங்கம் வாங்குவதை ஒரு முதலீடாகக் கருதி டிஜிட்டல் முறைக்கு மாறி வருவதால், கடைகளில் நகை விற்பனை சரிந்து வருகிறது. இந்த வணிகப் பாதிப்பைச் சரிசெய்யவே, டிஜிட்டல் தங்கத்திற்குத் தடை கோருவதாகவும், இதன் மூலம் மக்கள் மீண்டும் கடைகளுக்கு வந்து நகைகளை வாங்குவார்கள் என்பதே வியாபாரிகளின் கணக்காக உள்ளது. எது எப்படியோ, பிரதமர் விடுத்த கோரிக்கை, இப்போது நகை வியாபாரிகளின் லாப நஷ்டக் கணக்குகளோடு கலந்து ஒரு புதிய விவாதத்தைத் தமிழக அரசியலிலும், பொருளாதார வட்டாரத்திலும் கிளப்பியுள்ளது.