தமிழ்நாட்டின் முதலமைச்சராக பதவியேற்றுள்ள விஜய் இன்று சென்னை வேப்பேரியில் அமைந்துள்ள பெரியார் திடல் வருகை தந்தார். அங்கு அவர் கி.வீரமணியை நேரில் சந்தித்து மரியாதை செலுத்தினார். முதலமைச்சர் விஜய், கி.வீரமணிக்கு பொன்னாடை போர்த்தி பூங்கொத்து வழங்கி வாழ்த்து தெரிவித்தார். அதற்கு பதிலாக கி.வீரமணியும் முதலமைச்சர் விஜய்க்கு பொன்னாடை அணிவித்து நினைவு பரிசாக புத்தகத்தை வழங்கினார்.
இந்த சந்திப்பு அரசியல் மற்றும் சமூக வட்டாரங்களில் முக்கிய கவனத்தை ஈர்த்துள்ளது. திராவிட இயக்கத்தின் முக்கிய மையமாக கருதப்படும் பெரியார் திடலுக்கு முதலமைச்சராக பதவியேற்ற உடனேயே விஜய் சென்றது அரசியல் ரீதியாக முக்கியத்துவம் வாய்ந்ததாக பார்க்கப்படுகிறது.
இதனைத் தொடர்ந்து, முதலமைச்சர் விஜய் மற்றும் கி.வீரமணி சிறிது நேரம் பல்வேறு அரசியல் மற்றும் சமூக விஷயங்கள் குறித்து கலந்துரையாடினர். இந்த சந்திப்பு நட்புறவான மற்றும் மரியாதைமிக்க சூழலில் நடைபெற்றதாக கூறப்படுகிறது.
பின்னர், அங்குள்ள பெரியார் அருங்காட்சியகம் சென்ற விஜய், பெரியாரின் வாழ்க்கை வரலாறு, சமூகப் போராட்டங்கள் மற்றும் திராவிட இயக்க வரலாற்றை எடுத்துரைக்கும் அரிய புகைப்படங்கள் மற்றும் ஆவணங்களை பார்வையிட்டார்.
அதனைத் தொடர்ந்து, பெரியார் ஈ.வி.ராமசாமி நினைவிடத்திற்குச் சென்ற முதலமைச்சர் விஜய் மலர்தூவி மரியாதை செலுத்தினார். அங்கு சில நிமிடங்கள் அமைதியாக நின்று அஞ்சலி செலுத்திய அவர், பின்னர் அங்கிருந்து புறப்பட்டுச் சென்றார். இந்த நிகழ்வு த.வெ.க. தொண்டர்களிடையே பெரும் உற்சாகத்தை ஏற்படுத்தியுள்ளது.
