தமிழக அரசியல் களத்தில் இப்போது ஒரு புதிய கணக்குத் தொடங்கியுள்ளது. 108 இடங்களைப் பெற்று தனிப்பெரும் கட்சியாக உருவெடுத்த நடிகர் விஜய்யின் தமிழக வெற்றிக் கழகத்திற்கு, இப்போது காங்கிரஸ் கட்சியின் 5 எம்.எல்.ஏ-க்களும் தங்களது ஆதரவை அதிகாரப்பூர்வமாக அறிவித்துள்ளனர்.
இதன் மூலம் விஜய்யின் பலம் 113-ஆக உயர்ந்துள்ளது. ஆட்சியமைக்கத் தேவையான 118 என்ற மேஜிக் நம்பரை எட்ட இன்னும் 5 இடங்களே தேவைப்படும் நிலையில், இந்த 113 உறுப்பினர்களை வைத்துக்கொண்டு விஜய் எப்படி முதலமைச்சராகப் பதவியேற்கப் போகிறார்? ஒரு மைனாரிட்டி அரசு அமைப்பதில் உள்ள அந்தச் சூட்சுமமான அரசியல் கணக்குகள் என்ன என்பதை இப்போது விரிவாகப் பார்ப்போம்.
முதலில், விஜய் இரண்டு தொகுதிகளில் வெற்றி பெற்றுள்ளதால் ஒரு எம்.எல்.ஏ பதவியை அவர் ராஜினாமா செய்ய வேண்டும். அதேபோல் சபையை முன்னின்று நடத்த ஒரு தற்காலிக சபாநாயகர் நியமிக்கப்படுவார். இதனால் வாக்கெடுப்பின் போது தவெக மற்றும் காங்கிரஸ் கூட்டணியின் பலம் 111-ஆக இருக்கும். 234 உறுப்பினர்களைக் கொண்ட சட்டசபையில் 118 பேர் இருந்தால் மட்டுமே ஆட்சி தப்பும் என்ற கட்டாயம் இல்லை.
இங்குதான் ‘வருகை தராத உறுப்பினர்கள்’ என்ற கணக்கு முக்கியத்துவம் பெறுகிறது. வாக்கெடுப்பு நடைபெறும் நாளில், எதிர்க்கட்சிகளைச் சேர்ந்த ஒரு 12 எம்.எல்.ஏ-க்கள் சபைக்கு வராமல் இருந்தாலோ அல்லது வாக்கெடுப்பைப் புறக்கணித்தாலோ, சபையின் மொத்த எண்ணிக்கை 221-ஆகக் குறையும். அந்தச் சூழலில், விஜய்யிடம் உள்ள 111 உறுப்பினர்களே ஆட்சியைத் தக்கவைக்கப் போதுமானதாக இருக்கும்.
இந்த 111 உறுப்பினர்களின் ஆதரவுடன் ஒருமுறை சட்டசபையில் நம்பிக்கை வாக்கெடுப்பை வென்றுவிட்டால், அடுத்த 6 மாதங்களுக்கு விஜய்யின் அரசுக்கு எந்தவித ஆபத்தும் இல்லை. இந்திய அரசியல் சாசன நடைமுறைப்படி, ஒருமுறை நம்பிக்கைப் தீர்மானத்தில் வெற்றி பெற்ற அரசுக்கு எதிராக அடுத்த ஆறு மாதங்களுக்கு மீண்டும் ஒரு தீர்மானத்தைக் கொண்டுவர முடியாது.
இந்த ஆறு மாத கால அவகாசம் என்பது ஒரு புதிய அரசுக்கு மிக முக்கியமான பொற்காலம். மக்கள் மத்தியில் தனது அதிரடித் திட்டங்கள் மூலம் செல்வாக்கை உயர்த்தவும், மற்ற சுயேச்சைகள் அல்லது சிறிய கட்சிகளின் ஆதரவைத் திரட்டவும் இந்த அவகாசத்தை விஜய் பயன்படுத்திக் கொள்ள முடியும்.
காங்கிரஸ் கட்சியின் இந்த திடீர் ஆதரவு விஜய்க்கு ஒரு மிகப்பெரிய தார்மீக பலத்தைத் தந்துள்ளதோடு, ஆளுநரிடம் ஆட்சியமைக்க உரிமை கோருவதற்கான வலிமையையும் அதிகரித்துள்ளது. எண்கள் குறைவாக இருந்தாலும், சட்டத்தின் நுணுக்கங்களைச் சரியாகப் பயன்படுத்தினால் 113 உறுப்பினர்களுடன் ஒரு நிலையான ஆட்சியைத் தர முடியும் என்ற நம்பிக்கையில் விஜய் தரப்பு உள்ளது.
50 ஆண்டுகால திராவிட அரசியலை முறியடிக்க, காங்கிரஸுடன் கைகோர்த்துள்ள இந்த ‘மைனாரிட்டி மேஜிக்’ தமிழகத்தில் ஒரு புதிய அரசியல் அத்தியாயத்தை எழுதும் என எதிர்பார்க்கப்படுகிறது.
