தமிழக அரசியல் வரலாற்றில் இதுவரை கண்டிராத ஒரு மாபெரும் அரசியல் மற்றும் தேர்தல் முட்டுக்கட்டை தற்போது மாநிலத்தையே ஸ்தம்பிக்க வைத்துள்ளது. 108 இடங்களில் வெற்றி பெற்று தனிப்பெரும் கட்சியாக உருவெடுத்த நடிகர் விஜய்யின் தமிழக வெற்றிக் கழகம், காங்கிரஸ் கட்சியின் 5 எம்.எல்.ஏ-க்களின் ஆதரவுடன் 113 என்ற எண்ணிக்கையை எட்டியுள்ளது.
இருப்பினும், ஆட்சியமைக்கத் தேவையான 118 என்ற மேஜிக் நம்பரை எட்டாத காரணத்தால், ஆளுநர் ஆர்லேகர் விஜய்யை ஆட்சியமைக்க அழைக்க மறுத்து வருவது ஒரு மிகப்பெரிய அரசியல் சாசன நெருக்கடியை உருவாக்கியுள்ளது. கடந்த நான்கு நாட்களாகத் தமிழ்நாடு ஒரு முதலமைச்சர் இல்லாத மாநிலமாகத் தத்தளித்து வருவது, ஜனநாயக ரீதியாக ஒரு கவலையளிக்கும் சூழலாகவே பார்க்கப்படுகிறது.
அரசியல் நகர்வுகள் ஒருபுறம் இருக்க, மறுபுறம் தேர்தல் முடிவுகள் மற்றும் வாக்குப்பதிவு இயந்திரங்கள் மீதே தற்போது மிகப்பெரிய சந்தேகக் கணைகள் தொடுக்கப்பட்டுள்ளன. குறிப்பாக, 185வது தொகுதியான திருப்பத்தூர் சட்டமன்றத் தொகுதியில் தேர்தல் ஆணையம் கொடுத்த மொத்த வாக்காளர்களின் எண்ணிக்கையை விட, ஈவிஎம் இயந்திரங்களில் பதிவான வாக்குகளின் எண்ணிக்கை அதிகமாக இருப்பதாக அரசியல் விமரிசகர்கள் முன்வைக்கும் கருத்துக்கள் பெரும் அதிர்ச்சியை ஏற்படுத்தியுள்ளது.
வெறும் ஒரு ஓட்டு வித்தியாசத்தில் தேர்தல் முடிவுகள் தீர்மானிக்கப்படும் நிலையில், இதுபோன்ற குளறுபடிகள் ஒட்டுமொத்தத் தேர்தல் ஆணையத்தின் நம்பகத்தன்மையை கேள்விக்குள்ளாக்கியுள்ளது. மேற்கு வங்காளம் மற்றும் கேரளாவில் தேர்தல் நேர்மை குறித்துப் பேசும் ராகுல் காந்தி போன்ற தேசியத் தலைவர்கள், தமிழகத்தில் நிலவும் இந்த மர்மமான சூழல் குறித்து மௌனம் காப்பது ஏன் என்ற கேள்வியும் சமூக வலைதளங்களில் வலுவாக எழுப்பப்பட்டு வருகிறது.
தற்போதைய சூழலில், தமிழகத்தின் நலனை விடக் கட்சி அரசியலே முன்னிறுத்தப்படுவதாக விமர்சனங்கள் எழுகின்றன. ஒருபுறம் திமுக மற்றும் அதிமுக ஆகிய இரு துருவங்களும் தங்களின் இருப்புக்காக ரகசியமாகக் கைகோர்க்கத் தயாராகி வருவதாகத் தகவல்கள் கசியும் நிலையில், மக்கள் தீர்ப்பிற்கு எதிராகத் திராவிடக் கட்சிகள் ஒன்றிணைந்தால் தங்களது 108 எம்.எல்.ஏ-க்களும் ஒட்டுமொத்தமாக ராஜினாமா செய்வார்கள் என்று தவெக எச்சரித்துள்ளது.
இது ஒருவேளை நடந்தால், தமிழகம் மீண்டும் ஒரு பொதுத்தேர்தலைச் சந்திக்க வேண்டிய கட்டாயத்திற்குத் தள்ளப்படும். தேர்தல் ஆணையம் இந்த குளறுபடிகளுக்கு உரிய விளக்கம் அளித்து, மக்களின் சந்தேகத்தைத் தீர்க்க வேண்டியது காலத்தின் கட்டாயமாகியுள்ளது. அடுத்த சில மணிநேரங்களில் எடுக்கப்படும் முடிவுகள் தமிழகத்தின் அடுத்த ஐந்து ஆண்டுகால எதிர்காலத்தை மட்டுமல்ல, ஜனநாயகத்தின் மாண்பையும் தீர்மானிக்கப் போகிறது. ஏற்கனவே பல பிரச்சினைகளை சந்தித்து வரும் தவெக தலைவர் விஜய்க்கு இது மேலும் புது நெருக்கடிகளை உருவாக்குவதாக அமைந்திருக்கிறது.
