‘இது ஒன்னு மட்டும் போதாது தம்பி!’ சூரியவன்ஷிக்கு ‘லக்ஷ்மன்’ விடுத்த எச்சரிக்கை!

இந்திய கிரிக்கெட்டில் ஒரு மிகப்பெரிய நம்பிக்கையாக உருவெடுத்துள்ள 15 வயது சிறுவன் வைபவ் சூர்யவன்ஷி, ஜிம்பாப்வே அணிக்கு எதிரான டி20 தொடரில் புதிய வரலாறு படைத்துள்ளார்.

ஹராரே மைதானத்தில் நடைபெற்ற கடைசிப் போட்டியில், வெறும் 49 பந்துகளில் 81 ரன்கள் விளாசி இந்திய அணியின் தொடர் வெற்றிக்கு முக்கியக் காரணமாக இருந்த வைபவ், ஆட்டநாயகன் மற்றும் தொடர் நாயகன் என இரண்டு விருதுகளையும் அள்ளினார்.

இந்த அபார வெற்றிக்குப் பிறகு செய்தியாளர்களிடம் பேசிய இந்திய அணியின் தற்காலிகப் பயிற்சியாளர் வி.வி.எஸ் லக்ஷ்மன், வைபவ்-வின் முதிர்ச்சியான ஆட்டத்தைப் பாராட்டிய அதே வேளையில், அவருக்கு ஒரு மிக முக்கியமான எச்சரிக்கையையும், அறிவுரையையும் விடுத்துள்ளார்.

லக்ஷ்மன் கூறுகையில், வைபவ்-வின் திறமையை பிசிசிஐ சுமார் இரண்டரை ஆண்டுகளுக்கு முன்பே அடையாளம் கண்டுவிட்டது என்றும், 19 வயதுக்குட்பட்டோருக்கான உலகக்கோப்பை முதலே அவர் பிசிசிஐ-யின் தீவிரக் கண்காணிப்பில் இருந்து வருவதாகவும் தெரிவித்தார்.

குறிப்பாக, கடந்த ஆறு மாதங்களில் வைபவ்-விடம் ஏற்பட்டுள்ள முதிர்ச்சி மற்றும் விளையாட்டைப் புரிந்து கொள்ளும் விதம் தன்னை வியக்க வைப்பதாக லக்ஷ்மன் நெகிழ்ந்துள்ளார். எத்தகைய நெருக்கடியான சூழலிலும், அழுத்தங்களுக்கு அடிபணியாமல் இயல்பாக விளையாடும் திறன் அவரிடம் இருப்பதாகவும், இது அவரை ஒரு வருங்கால சூப்பர் ஸ்டாராக மாற்றும் என்றும் லக்ஷ்மன் நம்பிக்கை தெரிவித்துள்ளார்.

இருப்பினும், வைபவ் சூர்யவன்ஷிக்கு ஒரு மிகப்பெரிய சவாலை லக்ஷ்மன் முன்வைத்துள்ளார். அதுதான் அவரது ‘உடல் தகுதி’ (Fitness). வைபவ் தனது ஆட்டத்தில் சிறந்து விளங்கினாலும், சர்வதேச அளவில் நீண்ட காலம் நிலைத்து நிற்க வேண்டுமானால், தனது உடல் தகுதியை மேம்படுத்துவதில் அவர் இன்னும் கடினமாக உழைக்க வேண்டும் என்று லக்ஷ்மன் வெளிப்படையாகத் தெரிவித்துள்ளார்.

வைபவ்-விற்கு இப்போது 15 வயதுதான் ஆகிறது என்பதால், அவரது உடல் வளர்ச்சிக்கேற்பத் தகுந்த பயிற்சிகளை மேற்கொள்வது அவசியம் என்றும் அவர் அறிவுறுத்தியுள்ளார். மைதானத்தில் காயம் ஏற்பட்ட போதும், வெளியேற மறுத்துத் தொடர்ந்து விளையாடத் துடித்த அவரது ஆர்வம் தங்களுக்கு மகிழ்ச்சி அளித்தாலும், நீண்ட கால நலனைக் கருத்தில் கொண்டே பிசியோ அவரை வெளியே அழைத்து வந்ததாக லக்ஷ்மன் விளக்கமளித்தார்.

கிரிக்கெட்டில் வெற்றி பெறத் தேவையான ஆர்வம் மற்றும் உழைப்பு வைபவ்-விடம் தாராளமாக உள்ளது. ஆனால், ஒரு சர்வதேச வீரராகத் தன்னை முழுமையாகத் தகவமைத்துக் கொள்ள அவர் உடல் தகுதியை ஒரு தவத்தைப் போலக் கடைப்பிடிக்க வேண்டும் என்பதே லக்ஷ்மனின் ஆலோசனையாக உள்ளது.

சச்சின் டெண்டுல்கரின் சாதனைகளையே 15 வயதில் தகர்த்துள்ள இந்த இளம் புயல், லக்ஷ்மனின் இந்த ஆக்கப்பூர்வமான ஆலோசனையை ஏற்றுச் செயல்பட்டால், இந்திய கிரிக்கெட்டில் ஒரு மிகப்பெரிய சகாப்தத்தை உருவாக்குவார் என்பதில் மாற்றுக் கருத்தில்லை.