இந்தியப் பங்குச் சந்தையில் டிரேடிங் செய்து வரும் உள்நாட்டு நிறுவனங்களுக்கும், ஸ்டாக் புரோக்கர்களுக்கும் ஜூலை ஒன்றாம் தேதி முதல் ஒரு மிகப்பெரிய சவால் காத்திருக்கிறது. இந்திய ரிசர்வ் வங்கி கொண்டு வந்துள்ள புதிய நிதியளிப்பு விதிமுறைகள், குறிப்பாகப் ‘Proprietary Trading’ எனப்படும் சொந்த முதலீட்டில் வர்த்தகம் செய்யும் உள்நாட்டு நிறுவனங்களுக்கு ஒரு மிகப்பெரிய பேரிடியாக அமைந்துள்ளது.
புதிய விதிமுறைகளின்படி, மூலதனச் சந்தையில் ஈடுபடும் நிறுவனங்கள் தங்களின் வங்கி உத்தரவாதங்களுக்கு (Bank Guarantee) இனி 100 சதவீத பிணையை வழங்க வேண்டும். இதில் மிக முக்கியமான அம்சம் என்னவென்றால், அந்தப் பிணையில் குறைந்தபட்சம் 50 சதவீதம் ரொக்கப் பணமாக இருக்க வேண்டும் என்பது கட்டாயமாக்கப்பட்டுள்ளது. இது சந்தையில் புழங்கும் முதலீட்டுத் திறனைக் குறைப்பதோடு, நிறுவனங்களின் நிதியளிப்புச் செலவுகளையும் கணிசமாக உயர்த்தும் என எதிர்பார்க்கப்படுகிறது.
இதுவரை, இந்திய டிரேடிங் நிறுவனங்கள் தங்களின் பிணையத்தை (Collateral) வைத்துக் கொண்டு, வங்கிகள் வழங்கும் உத்தரவாதம் மூலம் கூடுதல் தொகையைப் பெற்று அதிக அளவில் வர்த்தகம் செய்து வந்தன. ஆனால், புதிய நடைமுறை அமலுக்கு வரும்போது, நிறுவனங்களின் வர்த்தகத் திறன் ஏறக்குறைய பாதியாகக் குறையும் எனக் கணிக்கப்பட்டுள்ளது.
உதாரணமாக, இதுவரை 1.7 மடங்கு வரை வர்த்தகம் செய்த ஒரு நிறுவனத்தால், இனி 0.85 மடங்கு மட்டுமே வர்த்தகம் செய்ய முடியும். ஏற்கனவே இந்தியாவில் மார்ஜின் தேவைகள் உலகிலேயே மிக அதிகமாக இருக்கும் நிலையில், ரிசர்வ் வங்கியின் இந்த நகர்வு உள்நாட்டுச் சந்தை உருவாக்குபவர்கள் மற்றும் வர்த்தகர்களின் லாபத்தைப் பெருமளவில் பாதிக்கும். குறிப்பாக ஆப்ஷன்ஸ் வர்த்தகத்தில் 50 சதவீதத்திற்கும் அதிகமான பங்களிப்பைக் கொண்டிருக்கும் புரோப் டிரேடிங் நிறுவனங்கள் இதனால் கடுமையாக நிலைகுலைய வாய்ப்புள்ளது.
இந்த விதிமுறையில் உள்ள மற்றொரு கசப்பான உண்மை என்னவென்றால், இது இந்திய நிறுவனங்களுக்கு மட்டுமே பொருந்தும் என்பதுதான். குஜராத்தில் உள்ள ‘கிப்ட் சிட்டி’ (GIFT City) அல்லது அந்நிய போர்ட்ஃபோலியோ முதலீட்டாளர்கள் (FPI) வழியாகச் செயல்படும் வெளிநாட்டு அதிவேக வர்த்தக நிறுவனங்களுக்கு (Foreign HFTs) இந்த விதிகள் பொருந்தாது. இதனால், ஜேன் ஸ்ட்ரீட், சிட்டாடல் போன்ற சர்வதேச ஜாம்பவான்கள் இந்தியச் சந்தையில் கூடுதல் பலத்துடன் செயல்பட வாய்ப்பு உருவாகியுள்ளது. இது உள்நாட்டு நிறுவனங்களுக்கும், வெளிநாட்டு நிறுவனங்களுக்கும் இடையே ஒரு சமமற்றப் போட்டியை உருவாக்குவதாகச் சந்தை வல்லுநர்கள் கவலை தெரிவிக்கின்றனர்.
ஏற்கனவே செக்யூரிட்டி டிரான்சாக்ஷன் வரி உயர்வால் பாதிக்கப்பட்டிருக்கும் இந்திய வர்த்தகர்களுக்கு, ரிசர்வ் வங்கியின் இந்த புதிய கெடுபிடி மேலும் ஒரு சுமையாக மாறியுள்ளது. குறிப்பாகத் தனிநபர் பங்குகளில் (Single Stocks) வர்த்தகம் செய்வது இனி லாபகரமாக இருக்காது என்றும், இதன் உண்மையான பாதிப்புகள் வரும் செப்டம்பர் காலாண்டில் வெளிப்படையாகத் தெரியவரும் என்றும் நிபுணர்கள் எச்சரிக்கின்றனர்.
சந்தையில் நிலவும் அபாயத்தைக் குறைக்க ரிசர்வ் வங்கி இந்த நடவடிக்கையை எடுத்திருந்தாலும், இது இந்தியத் தொழில்முறை வர்த்தகர்களின் எதிர்காலத்தைக் கேள்விக்குறியாக்கியுள்ளது என்பதில் மாற்றுக் கருத்தில்லை. பங்குச் சந்தையில் நாளை முதல் அரங்கேறப்போகும் இந்த மாற்றங்கள் வர்த்தகர்களிடையே பெரும் பதற்றத்தை உருவாக்கியுள்ளது.
