இந்திய கிரிக்கெட் ரசிகர்களின் இதயத்துடிப்பாக விளங்கும் மகேந்திர சிங் தோனி, 2026 ஐபிஎல் தொடரில் எப்போது களமிறங்குவார் என்ற எதிர்பார்ப்பு நாளுக்கு நாள் அதிகரித்து வருகிறது. சீசன் தொடங்குவதற்கு முன்பே ஏற்பட்ட தசைநார் காயம் காரணமாக, இந்த ஆண்டு ஒரு போட்டியில் கூட தோனி இன்னும் விளையாடவில்லை. இருப்பினும், கடந்த மார்ச் மாதத்தில் இருந்தே சிஎஸ்கே அணியுடன் தங்கியிருக்கும் அவர், வலைப்பயிற்சியில் ஈடுபடும் வீடியோக்கள் சமூக வலைதளங்களில் வைரலாகி வருகின்றன.
இந்த நிலையில், தோனியின் வருகை குறித்து இந்திய அணியின் நட்சத்திர சுழற்பந்து வீச்சாளரும், தோனியின் முன்னாள் சிஎஸ்கே சக வீரருமான ரவிச்சந்திரன் அஷ்வின் தனது யூடியூப் சேனலில் வெளியிட்டுள்ள கருத்துகள் பெரும் விவாதத்தைக் கிளப்பியுள்ளன. அஷ்வின் கூறுகையில், தற்போதைய சூழலில் தோனி மீண்டும் சிஎஸ்கே அணியின் பிளே லெவனில் இடம் பெறுவது மிகவும் கடினம் என்று தெரிவித்துள்ளார். சிஎஸ்கே அணி இப்போது ப்ளே-ஆஃப் ரேஸில் நீடிக்கிறது.
ஒருவேளை தோனி உள்ளே வந்தால் அணியின் காம்பினேஷன் முற்றிலும் மாறும் என்பதால், அணி வெற்றிப் பாதையில் இருக்கும் வரை தோனி களமிறங்க வாய்ப்பில்லை என்பது அஷ்வினின் கணிப்பு. ஆனால், இதில் ஒரு முக்கியமான நிபந்தனையையும் அவர் முன்வைத்துள்ளார். சிஎஸ்கே அணி தனது அடுத்த மூன்று போட்டிகளில் இரண்டில் தோற்று, ப்ளே-ஆஃப் வாய்ப்பை இழக்கும் பட்சத்தில், ரசிகர்களுக்கு ஒரு விருந்தாக தோனி தனது கடைசிப் போட்டியில் சென்னையில் விளையாட வாய்ப்பு உண்டு என்று அவர் கூறியுள்ளார்.
அதாவது, அணிக்கு இனி வெற்றி முக்கியமில்லை என்ற நிலையில் மட்டுமே தோனிக்கு ஒரு ‘ஃபேர்வெல் கேம்’ எனப்படும் விடைபெறும் போட்டி வழங்கப்படும் என்று அவர் உணர்த்தியுள்ளார். தற்போது புள்ளிப்பட்டியலில் ஆறாவது இடத்தில் உள்ள சிஎஸ்கே அணிக்கு இன்னும் 4 லீக் போட்டிகள் எஞ்சியுள்ளன. இதற்கிடையில், தோனி ஏன் மைதானத்திற்குப் போட்டிகளைப் பார்க்க வருவதில்லை என்ற ரகசியத்தை அணியின் பேட்டிங் பயிற்சியாளர் மைக் ஹசி உடைத்துள்ளார்.
தோனி ஒரு அணியை முன்னிறுத்தும் மனிதர் என்றும், அவர் மைதானத்திற்கு வந்தால் ஒட்டுமொத்த கேமராக்களும், ரசிகர்களின் கவனமும் அவர் மீதே இருக்கும் என்றும், இது தற்போது விளையாடும் வீரர்களுக்கு ஒரு கவனச் சிதறலாக அமைந்துவிடும் என்று தோனி கருதுவதாக ஹசி தெரிவித்துள்ளார். தன்னை விட அணியின் நலனே முக்கியம் என்று நினைக்கும் தோனியின் இந்த குணம் ரசிகர்களை நெகிழ்ச்சியடைய செய்துள்ளது.
கடந்த 2025 சீசனில் 196 ரன்களைக் குவித்த தோனி, இந்த ஆண்டு ‘அன்கேப்ட்’ வீரராக 4 கோடி ரூபாய்க்குத் தக்கவைக்கப்பட்டார். தோனியின் வருகைக்காகக் கோடிக்கணக்கான ரசிகர்கள் காத்துக் கொண்டிருக்கும் வேளையில், அஷ்வின் கூறியது போல சிஎஸ்கே ஒருவேளை வாய்ப்பை இழந்தால் மட்டுமே தோனியை மைதானத்தில் பார்க்க முடியும் என்பது ஒரு கசப்பான உண்மையாக மாறியுள்ளது.
இருப்பினும், எஞ்சியுள்ள போட்டிகளில் சிஎஸ்கே வெற்றி பெற்று ப்ளே-ஆஃப் செல்வதை விரும்புவதா அல்லது தோனியை ஒரு கடைசிப் போட்டியில் பார்ப்பதற்காகத் தோல்வியைச் சகித்துக் கொள்வதா என்ற தர்மசங்கடத்தில் சென்னை ரசிகர்கள் இப்போது ஆழ்ந்துள்ளனர்.
