தமிழக அரசியல் களம் தற்போது ஒரு மிகப்பெரிய போர் முனைக்குத் தயாராகியுள்ளது. 108 இடங்களைப் பிடித்து தனிப்பெரும் கட்சியாக உருவெடுத்தும், நடிகர் விஜய்யின் தமிழக வெற்றிக் கழகத்தை ஆட்சியமைக்க ஆளுநர் இதுவரை அழைக்காதது மாநிலம் முழுவதும் பெரும் கொந்தளிப்பை ஏற்படுத்தியுள்ளது. தமிழகப் பொறுப்பு ஆளுநர் ஆர்லேகர் தனியார் ஊடகத்திற்கு அளித்த பேட்டியில், “118 எம்.எல்.ஏ-க்களின் ஆதரவு இல்லாமல் யாரையும் ஆட்சியமைக்க அழைக்க முடியாது” என்று கறாராகத் தெரிவித்துவிட்டார்.
இதற்கிடையே, காங்கிரஸ் கட்சியின் 5 எம்.எல்.ஏ-க்களின் ஆதரவுக் கடிதத்துடன் விஜய் ஆளுநரைச் சந்தித்த பின்னரும், அடுத்த இரண்டு மூன்று நாட்களில் முடிவு எட்டப்படாவிட்டால் அடுத்தகட்ட நடவடிக்கை குறித்து ஆலோசிக்கப் போவதாக ஆளுநர் கூறியிருப்பது தவெக தரப்பை அதிருப்தியில் ஆழ்த்தியுள்ளது.
மறுபுறம், திராவிடக் கட்சிகளான திமுக மற்றும் அதிமுக ஆகிய இரண்டும் ரகசியமாக ஒன்றிணைந்து ஒரு புதிய கூட்டணியை உருவாக்கி ஆட்சியமைக்கப் போவதாக வெளியாகி வரும் தகவல்கள் அரசியல் வட்டாரத்தில் தீயாகப் பரவி வருகின்றன. விஜய்யைத் தடுத்துவிட்டு அதிமுக-வுக்கு திமுக வெளியில் இருந்து ஆதரவு அளிக்கலாம் என்ற பேச்சு எழுந்துள்ள நிலையில், திமுக தலைவர் மு.க. ஸ்டாலின் தனது கட்சி எம்.எல்.ஏ-க்களை மே 10-ஆம் தேதி வரை சென்னையிலேயே இருக்குமாறு அதிரடி உத்தரவு பிறப்பித்துள்ளார்.
குறிப்பாக, உதயநிதி தலைமையிலான திமுக-வினர், “விஜய் ஒருமுறை ஆட்சியில் அமர்ந்துவிட்டால் அவரை அகற்றுவது சாத்தியமற்றது” என்று அச்சப்படுவதால், திராவிடக் கோட்டையைப் பாதுகாக்க எத்தகைய முடிவையும் எடுக்க திமுக தயாராகி வருகிறது. இந்தச் சூழலில், தமிழக வெற்றிக் கழகம் ஒரு அதிரடியான ‘மாஸ்டர் பிளான்’ ஒன்றை கையில் எடுத்துள்ளது.
ஜனநாயக முறைப்படி தனிப்பெரும் கட்சியாக உள்ள தவெக-வை ஆட்சியமைக்க அழைக்காமல், திமுக மற்றும் அதிமுக ஒன்றிணைந்து ஆட்சியமைக்க உரிமை கோரினால், தனது 108 எம்.எல்.ஏ-க்களையும் ஒட்டுமொத்தமாக ராஜினாமா செய்ய வைக்க விஜய் முடிவெடுத்துள்ளதாகத் தகவல்கள் தெரிவிக்கின்றன. இதன் மூலம் தமிழகத்தில் ஒரு மிகப்பெரிய அரசியல் சாசன நெருக்கடியை உருவாக்கி, மீண்டும் ஒரு தேர்தலைச் சந்திக்க விஜய் தயாராகி வருகிறார். “மக்களின் தீர்ப்பிற்கு விரோதமாகத் திராவிடக் கட்சிகள் கைகோர்த்தால், மக்கள் மன்றத்திலேயே அதனைச் சந்திப்போம்” என்பதே தவெக-வின் தற்போதைய நிலைப்பாடாக உள்ளது.
விஜய்யைத் தடுக்க நடக்கும் இந்தத் திரைமறைவு வேலைகளை முறியடிக்க, தவெக தனது எம்.எல்.ஏ-க்களிடம் ராஜினாமா கடிதங்களைத் தயாராக வைத்துள்ளதாகக் கூறப்படுகிறது. ஒருவேளை இந்த 108 பேரும் ராஜினாமா செய்தால், தமிழகத்தில் ஆட்சி நடத்துவது எவருக்கும் சாத்தியமில்லாமல் போகும்.
இதனால் மீண்டும் தேர்தல் நடத்த வேண்டிய கட்டாயம் ஏற்படும். எம்.ஜி.ஆர் பாணியில் விஜய் ஒரு மாபெரும் சக்தியாக உருவெடுப்பதைத் தடுக்கத் துடிக்கும் திராவிடக் கட்சிகளுக்கு, இது ஒரு மிகப்பெரிய சவாலாக மாறியுள்ளது. அடுத்த 48 மணிநேரத்தில் ஆளுநர் எடுக்கப்போகும் முடிவு மற்றும் விஜய்யின் அடுத்தகட்ட நகர்வுதான் தமிழகத்தின் எதிர்காலத்தைத் தீர்மானிக்கப் போகிறது.
