நமது பூமியின் பாதுகாப்பு கவசமான ஓசோன் படலத்தில் நாம் ஏற்படுத்திய ஓட்டை, இப்போது மெல்ல மெல்ல குணமாகி வருகிறது என்ற மகிழ்ச்சியான செய்தியை உலக வானிலை அமைப்பு (WMO) வெளியிட்டுள்ளது.
உலக வானிலை அமைப்பு வெளியிட்டுள்ள புதிய “ஓசோன் புல்லட்டின் 2024” (Ozone Bulletin 2024) அறிக்கையின்படி, இந்த நூற்றாண்டின் நடுப்பகுதியில், அதாவது இன்னும் சுமார் 25 ஆண்டுகளில், ஓசோன் படலம் 1980-களில் இருந்த பழைய, ஆரோக்கியமான நிலைக்குத் திரும்பிவிடும் என்று கணிக்கப்பட்டுள்ளது. இதற்கு ஒரு முக்கிய சான்றாக, 2024-ஆம் ஆண்டில் அண்டார்டிக் பகுதியில் காணப்படும் ஓசோன் துளை, கடந்த சில ஆண்டுகளை விட மிகவும் சிறியதாக உள்ளது. செப்டம்பர் 29 அன்று, ஓசோன் நிறை பற்றாக்குறை 46.1 மில்லியன் டன்னாக இருந்தது, இது 2020 முதல் 2023 வரை காணப்பட்ட பெரிய துளைகளை விடக் குறைவு.
இந்த வெற்றி எப்படி சாத்தியமானது? என்றால், நாற்பது ஆண்டுகளுக்கு முன்பு, அறிவியலாளர்களின் எச்சரிக்கையை ஏற்று, உலக நாடுகள் வியன்னா மாநாட்டில் ஒன்று கூடின. அதைத் தொடர்ந்து உருவாக்கப்பட்ட “மான்ட்ரியல் நெறிமுறை” (Montreal Protocol) என்ற சர்வதேச ஒப்பந்தம்தான் இந்த மாற்றத்திற்குக் காரணம். ஒரு காலத்தில் குளிர்சாதனப் பெட்டிகள், ஏசி, ஹேர்ஸ்ப்ரே மற்றும் தீயணைப்புக் கருவிகளில் பரவலாகப் பயன்படுத்தப்பட்ட, ஓசோனைப் பாதிக்கும் 99 சதவீதத்திற்கும் அதிகமான ரசாயனப் பொருட்களை இந்த ஒப்பந்தம் படிப்படியாகத் தடை செய்தது.
ஐக்கிய நாடுகள் சபையின் பொதுச்செயலாளர் அன்டோனியோ குட்டெரெஸ் இதுபற்றி கூறும்போது, “அறிவியலின் எச்சரிக்கைகளுக்கு நாடுகள் செவிசாய்க்கும்போது, முன்னேற்றம் சாத்தியமாகும் என்பதற்கு இதுவே சிறந்த உதாரணம். ஓசோன் படலம் குணமடைந்து வருகிறது,” என்று பெருமையுடன் தெரிவித்துள்ளார். இந்த வெற்றியின் பலன் என்னவென்றால், தோல் புற்றுநோய், கண்புரை போன்ற நோய்களின் அபாயம் குறையும், மேலும் நமது சுற்றுச்சூழலும் பாதுகாக்கப்படும்.
இருப்பினும், இந்தப் பணி இன்னும் முடிவடையவில்லை என்று விஞ்ஞானிகள் எச்சரிக்கின்றனர். ஓசோன் படலத்தையும், அதை பாதிக்கும் ரசாயனப் பொருட்களையும் நாம் தொடர்ந்து கவனமாகக் கண்காணிக்க வேண்டும் என்று உலக வானிலை அமைப்பு தெரிவித்துள்ளது. இந்த ஆண்டு ஓசோன் துளையின் உருவாக்கம் தாமதமாகத் தொடங்கியது கூட, ஓசோன் படலம் மீண்டு வருவதற்கான ஒரு வலுவான அறிகுறியாகவே பார்க்கப்படுகிறது.
