இந்தியாவில் வாட்ஸ்அப், டெலிகிராம் பயன்படுத்துபவர்களுக்கு ஒரு மிக முக்கியமான அதிரடி அறிவிப்பை மத்திய அரசு தற்போது வெளியிட்டுள்ளது. வருகிற ஜனவரி ஒன்றாம் தேதி முதல் ‘சிம் பைண்டிங்’ எனப்படும் புதிய பாதுகாப்பு நடைமுறை நாடு முழுவதும் கட்டாயமாக்கப்பட உள்ளது. இதற்கான இறுதி கெடுவாக டிசம்பர் முப்பத்தியொன்றாம் தேதியை மத்திய தொலைத்தொடர்புத் துறை நிர்ணயித்துள்ளது. இந்த புதிய சட்டம் அமலுக்கு வந்த பின்பு, வாட்ஸ்அப் பயன்படுத்தும் முறையில் ஒரு மாபெரும் மாற்றம் ஏற்படப்போகிறது.
இதுவரை நாம் ஒருமுறை ஓடிபி எண்ணை உள்ளிட்டு லாகின் செய்துவிட்டால், அதன் பிறகு அந்த சிம் கார்டை போனில் இருந்து கழற்றிவிட்டாலும், வைஃபை மூலம் நம்மால் தொடர்ந்து வாட்ஸ்அப்பை பயன்படுத்த முடியும். ஆனால் ஜனவரி ஒன்றாம் தேதிக்குப் பிறகு அப்படி செய்ய முடியாது. நீங்கள் எந்த மொபைல் எண்ணில் வாட்ஸ்அப் பயன்படுத்துகிறீர்களோ, அந்த ஆக்டிவான சிம் கார்டு கட்டாயம் உங்களது போனிலேயே இருக்க வேண்டும். சிம் கார்டை கழற்றினாலோ அல்லது அந்த நம்பர் டீ-ஆக்டிவேட் ஆனாலோ, அடுத்த நொடியே உங்களது வாட்ஸ்அப் கணக்கு செயல்படாமல் முடங்கிவிடும்.
மத்திய அரசு ஏன் இப்படி ஒரு கடுமையான சட்டத்தை கொண்டு வந்துள்ளது தெரியுமா? ஆன்லைன் மோசடி கும்பல்கள் உள்ளூரில் ஒரு சிம் கார்டை வாங்கி வாட்ஸ்அப்பில் பதிவு செய்துவிட்டு, பின்னர் அந்த சிம் கார்டை தூக்கி எறிந்து விடுகின்றனர். பிறகு வெளிநாடுகளில் இருந்தபடியே அந்த இந்திய எண்ணை வைத்து பொதுமக்களிடம் டிஜிட்டல் அரெஸ்ட் போன்ற பண மோசடிகளில் ஈடுபடுகின்றனர். இந்த சைபர் குற்றங்களை முற்றிலுமாக ஒழிக்கவே, போனில் சிம் கார்டு இருந்தால் மட்டுமே செயலி இயங்கும் என்ற இந்த புதிய தொழில்நுட்பம் அமல்படுத்தப்பட உள்ளது.
அரசின் இந்த புதிய விதியால் சைபர் குற்றங்கள் பெருமளவில் குறையும் என்றாலும், பொதுமக்களுக்கும் சில நடைமுறை சிக்கல்கள் உள்ளன. குறிப்பாக, சிம் கார்டு வசதி இல்லாத டேப்லெட் போன்ற சாதனங்களில் இனி வாட்ஸ்அப்பை பயன்படுத்துவது மிகவும் கடினமாகும். அதேபோல, அடிக்கடி வெளிநாடுகளுக்கு பயணம் செய்து சிம் கார்டுகளை மாற்றுபவர்களுக்கும், வாட்ஸ்அப் வெப் பயன்படுத்துபவர்களுக்கும் இந்த புதிய சட்டம் ஒரு சிறிய தலைவலியை கொடுக்கும் என்பதில் எவ்வித சந்தேகமும் இல்லை.
