உலக அரசியலில் தற்போது ஒரு சுவாரசியமான “புலிக்கும் பூனைக்கும்” போட்டி நடந்து கொண்டிருக்கிறது. ஒருபுறம் ஆக்ரோஷமான டொனால்ட் ட்ரம்ப், மறுபுறம் நிதானமான ஜி ஜின்பிங். வரும் மே மாதம் 14 மற்றும் 15 ஆகிய தேதிகளில் நடைபெறவுள்ள இவர்களின் சந்திப்புதான் இப்போது உலக நாடுகளின் ஹாட் டாபிக். இதில் வேடிக்கையான விஷயம் என்னவென்றால், ட்ரம்ப்பை எப்படிச் சமாளிக்க வேண்டும் என்பதில் சீனா ஒரு கில்லாடியான பிளானில் இருக்கிறது.
ட்ரம்ப் ஒரு பிசினஸ்மேன் போன்றவர், அவருக்குப் புகழ்ச்சி என்றால் மிகவும் பிடிக்கும் என்பதைச் சீனா நன்கு அறிந்து வைத்துள்ளது. “அவருக்குச் சிவப்பு கம்பள வரவேற்பு கொடுத்து, புகழ்ச்சியால் அப்படியே ‘ஐஸ்’ வைத்தால் போதும், தைவான் விவகாரத்திலும், வர்த்தகப் போரிலும் நமக்குச் சாதகமான முடிவுகளைப் பெற்றுவிடலாம்” என்பதுதான் சீனாவின் தற்போதைய ராஜதந்திர ரகசியம்.
ஆனாலும் சீனாவுக்கு ஒரு பெரிய சிக்கல் இருக்கிறது. சீனா தனது கச்சா எண்ணெய் தேவையில் பாதிக்கும் மேல் மத்திய கிழக்கு நாடுகளைத்தான் நம்பியுள்ளது. குறிப்பாக ஈரானிடம் இருந்து எண்ணெய் தடையின்றி வர வேண்டும். ஆனால் ட்ரம்ப்போ ஈரானை மொத்தமாக முடக்கத் துடிக்கிறார். இந்த இக்கட்டான சூழலில், ஒரு கயிற்றின் மேல் நடப்பதைப் போலச் சீனா மிகவும் கவனமாகச் செயல்படுகிறது.
ஈரானைச் சமாதானப்படுத்திப் பேச்சுவார்த்தை மேசைக்குக் கொண்டு வந்த பெருமையைச் சீனா லாவகமாகத் தனது பக்கம் திருப்பியுள்ளது. ட்ரம்ப்பும் தனது பேச்சுகளில், “பாருங்கள், சீனர்கள் ஈரானிடம் பேசிப் போர்நிறுத்தத்திற்கு உதவி செய்கிறார்கள்” என்று சீனாவைப் பாராட்டியது, ஜி ஜின்பிங்கிற்கு ஒரு பெரிய ‘மைலேஜ்’ கொடுத்துள்ளது. ஆனால் சில அரசியல் வல்லுநர்கள், சீனாவின் இந்த அதிரடி மத்திய கிழக்கு ராஜதந்திரம் என்பது ஒரு “மேடை நாடகமே” தவிர வேறொன்றுமில்லை என்று வெளிப்படையாகவே கலாய்க்கிறார்கள்.
ஈரான் போரை நிறுத்தச் சீனா 30-க்கும் மேற்பட்ட போன் கால்கள், 5 நாடுகளுக்குப் பயணம் எனப் பரபரப்பாக இயங்கினாலும், மத்திய கிழக்கில் அமெரிக்காவைப் போலச் சீனாவிடம் பெரிய ராணுவ பலம் கிடையாது. எனவே, வெறும் வார்த்தைகளால் மட்டுமே சீனா விளையாடி வருகிறது. அதே சமயம், ட்ரம்ப்பை மகிழ்விக்க அமெரிக்காவின் போயிங் (Boeing) விமானங்கள் மற்றும் டன் கணக்கில் விவசாயப் பொருட்களை வாங்கவும் சீனா தயாராகி வருகிறது. இது ஒரு “கிவ் அண்ட் டேக்” (Give and Take) பாலிசிதான்.
மொத்தத்தில், அமெரிக்காவுடனான மோதலைக் குறைத்துக்கொண்டு, ஈரானிடம் இருந்து எண்ணெயையும் பெற்றுக்கொண்டு, தைவான் விவகாரத்தில் ஒரு ரகசிய “டீல்” பேசுவதே சீனாவின் தற்போதைய நோக்கம். இதற்காகச் சீன வெளியுறவுத்துறை அதிகாரிகள் இப்போதே ட்ரம்ப்புக்கான வரவேற்புப் பணிகளைத் தீவிரமாகத் கவனித்து வருகிறார்கள். இந்த மே மாதச் சந்திப்பில் ஜின்பிங்கின் இந்த “ஐஸ்” வைக்கும் படலம் வேலை செய்யுமா அல்லது ட்ரம்ப் தனது பாணியில் ஏதாவது அதிரடி காட்டுவாரா என்பதைப் பொறுத்திருந்துதான் பார்க்க வேண்டும்.
