உலக நாடுகள் அனைத்தும் போரிலும், பொருளாதார நெருக்கடியிலும் சிக்கித் தவித்துக் கொண்டிருக்கும் வேளையில், இந்தியப் பொருளாதாரம் ஒரு மாபெரும் சாதனையைப் படைத்துள்ளது.
நடப்பு நிதியாண்டின் முதல் காலாண்டில், அதாவது ஏப்ரல் முதல் ஜூன் வரையிலான காலக்கட்டத்தில் இந்தியாவின் ஜிடிபி (GDP) வளர்ச்சி 7.8 சதவீதமாக உயர்ந்துள்ளது.
இது பொருளாதார வல்லுநர்கள் எதிர்பார்த்ததை விடவும், ரிசர்வ் வங்கி கணித்த 7 சதவீதத்தை விடவும் மிகக் கூடுதல் வளர்ச்சி என்பதால் உலக நாடுகளே இந்தியாவை வியப்புடன் பார்க்கின்றன.
கிர்கிஸ்தானில் நடைபெற்று வரும் ஷாங்காய் ஒத்துழைப்பு மாநாட்டில் கலந்து கொண்டுள்ள பிரதமர் மோடி, அங்கிருந்து வெளியிட்டுள்ள ஒரு வீடியோ செய்தியில் எதிர்க்கட்சிகளை மிகக் கடுமையாகச் சாடியுள்ளார்.
“நாட்டைச் சுற்றி எழும் பொய் ஒலிகளை (Jhooth Ki Goonj) இந்த வளர்ச்சி எண்கள் அம்பலப்படுத்திவிட்டன” என்று அவர் அதிரடியாகத் தெரிவித்துள்ளார். குறிப்பாக ராகுல் காந்தியின் ‘மாணவர்களின் ஒலி’ என்ற பிரச்சாரத்தை பாஜக ‘பொய் ஒலி’ என்று கிண்டல் செய்து வரும் நிலையில், பிரதமரின் இந்த விமர்சனம் அரசியல் களத்தில் அனல் பறக்க வைத்துள்ளது.
ராகுல் காந்தி பேசிய 40 கருத்துகளில் 29 தகவல்கள் முற்றிலும் பொய்யானவை என்று பாஜக குற்றம் சாட்டியுள்ளதைச் சுட்டிக்காட்டும் விதமாகவே பிரதமரின் இந்தப் பேச்சு அமைந்துள்ளது.
“2020 கொரோனா காலம் தொடங்கி இன்று வரை உலகில் எங்குமே ஒரு நிலையான சூழல் இல்லை. ஒருபுறம் போர்ச் செய்திகள், மறுபுறம் சிதைந்து கிடக்கும் விநியோகச் சங்கிலி என உலகம் முழுவதும் நெருக்கடியில் உள்ளது.
ஆனால், இவ்வளவு தடைகளையும் மீறி இந்தியா இவ்வளவு வேகத்தில் வளர்வது நமது மக்களின் கடின உழைப்பிற்கும், உறுதிக்கும் கிடைத்த வெற்றி” என்று பிரதமர் பெருமிதம் தெரிவித்துள்ளார்.
நம்பிக்கையற்ற நிலையில் இருப்பவர்கள் பரப்பும் வதந்திகளைத் தகர்த்து இந்தியா முன்னேறி வருவதாக அவர் குறிப்பிட்டுள்ளார். தொடர்ந்து பேசிய பிரதமர், இந்தியாவை ஒரு சுயசார்பு நாடாக மாற்ற (Atmanirbhar Bharat) மக்கள் சில முக்கிய முடிவுகளை எடுக்க வேண்டும் என்று உருக்கமாக வேண்டுகோள் விடுத்துள்ளார்.
“சுற்றுலாச் செல்வதாக இருந்தால் இந்தியாவிற்குள்ளேயே செல்லுங்கள், திருமணங்களை வெளிநாடுகளில் நடத்தாமல் இந்தியாவிலேயே நடத்துங்கள் (Wed in India), அவசியமில்லாத பட்சத்தில் தங்கம் வாங்குவதைத் தவிர்த்தால் நமது அந்நியச் செலாவணி சேமிக்கப்படும்” என்று அவர் கூறியுள்ளார்.
இந்தச் சுதேசி மந்திரமே இந்தியாவின் 100-வது சுதந்திர தினத்தில் நம்மை ஒரு வளர்ந்த நாடாக மாற்றும் என்று பிரதமர் மோடி நம்பிக்கை தெரிவித்துள்ளார். உலகின் மிக வேகமாக வளரும் பெரிய பொருளாதார நாடாக இந்தியா தனது முதலிடத்தைத் தக்கவைத்துக் கொண்டுள்ளது, சர்வதேச சந்தையில் இந்தியாவின் மதிப்பை மீண்டும் ஒருமுறை உறுதிப்படுத்தியுள்ளது.
