தமிழகத்தின் நிதிநிலை குறித்துத் தமிழக வெற்றிக் கழக அரசு வெளியிட்டுள்ள வெள்ளை அறிக்கை தற்பொழுது அரசியல் வட்டாரங்களில் மிகப்பெரிய விவாதத்தை உருவாக்கியுள்ளது. இந்த அறிக்கை குறித்துத் தனது கருத்துக்களைப் பகிர்ந்துள்ள பாஜக முன்னாள் தலைவர் அண்ணாமலை, இதில் ஆச்சரியப்படுவதற்குப் புதிய தகவல்கள் எதுவும் இல்லை என்றும், கடந்த ஐந்து ஆண்டுகளில் நிலவிய நிதி நிர்வாகச் சீர்கேடுகளை இது பிரதிபலிக்கிறது என்றும் தெரிவித்துள்ளார்.
தமிழகத்தின் மொத்தக் கடன் 10 லட்சம் கோடி ரூபாயை எட்டியுள்ள சூழலில், சராசரியாகத் தமிழக மக்கள் ஒவ்வொருவர் பெயரிலும் ஒரு லட்சத்து 28 ஆயிரத்து 934 ரூபாய் கடன் சுமை ஏறியிருப்பதை அவர் சுட்டிக்காட்டியுள்ளார். மாநிலத்தின் மொத்த வருவாயில் சுமார் 23 சதவீதம் வாங்கிய கடனுக்கு வட்டி கட்டுவதற்கே செலவிடப்படுவது ஒரு கவலைக்கிடமான சூழல் என அவர் எச்சரித்துள்ளார்.
அண்ணாமலை தனது அறிக்கையில் தமிழகத்தின் சொந்த வரி வருவாய் குறைந்து வருவதையும், மின்சாரம் மற்றும் போக்குவரத்து போன்ற பொதுத்துறை நிறுவனங்களின் கடன் 3.18 லட்சம் கோடி ரூபாயாக உயர்ந்துள்ளதையும் விவரித்துள்ளார். குறிப்பாகப் பத்திரப் பதிவுத்துறையில் நிலங்களின் மதிப்பை குறைத்துப் பதிவு செய்வது போன்ற முறைகேடுகளால் அரசுக்கு மிகப்பெரிய வருவாய் இழப்பு ஏற்பட்டுள்ளதாக அவர் குற்றம் சாட்டியுள்ளார்.
தமிழகத்தின் நிதிநிலையைச் சீர் செய்யத் தற்பொழுது நம்மிடம் மிகக் குறுகிய காலமே உள்ளது என்றும், வரும் 2031-ஆம் ஆண்டு முதல் தமிழகத்தில் வேலை செய்யும் தகுதியுள்ள மக்கள் தொகை குறையத் தொடங்கும் என்பதால், அதற்குள் மாநிலத்தின் பொருளாதார அடித்தளத்தை வலுப்படுத்த வேண்டும் என்றும் அவர் வலியுறுத்தியுள்ளார்.
முக்கியமாக, தற்போதைய தவெக அரசு இந்த வெள்ளை அறிக்கையைக் காரணம் காட்டிச் செயல்படாமல் இருந்துவிடக் கூடாது என அண்ணாமலை வார்னிங் கொடுத்துள்ளார். அரசுத் திட்டங்கள் முடங்குவதற்கோ அல்லது வாக்குறுதிகளை நிறைவேற்றாமல் இருப்பதற்கோ இந்த அறிக்கையை ஒரு சாக்காகப் பயன்படுத்தக் கூடாது என்பதே அவரது கருத்தாக உள்ளது.
இந்த நிதி நெருக்கடியிலிருந்து தமிழகத்தை மீட்க வெறும் அரசியல்வாதிகளை மட்டும் நம்பியிருக்காமல், பொருளாதார நிபுணர்கள், கல்வியாளர்கள், தொழில்நுட்ப வல்லுநர்கள் மற்றும் சமூக மேம்பாட்டுத் துறையைச் சேர்ந்த அறிஞர்களை உள்ளடக்கிய ஒரு “செயல்திறன் மிக்க” ஆலோசனைக் குழுவை உடனடியாக அமைக்க வேண்டும் என அவர் முதல்வர் விஜய்க்கு ஆலோசனை வழங்கியுள்ளார்.
தமிழகத்தைத் தற்போதைய நிதிப் பள்ளத்திலிருந்து மீட்டு, ஒரு வலுவான பொருளாதாரப் பாதைக்குக் கொண்டு செல்ல அரசு போர்க்கால அடிப்படையில் நடவடிக்கைகளை எடுக்க வேண்டும் என அண்ணாமலை கேட்டுக்கொண்டுள்ளார். முந்தைய அரசின் தவறுகளைச் சுட்டிக்காட்டுவது ஒரு தொடக்கமாக இருக்கலாமே தவிர, அதுவே தீர்வாகாது என்பதை அவர் அழுத்தமாகப் பதிவு செய்துள்ளார்.
ஒரு பொறுப்பான எதிர்க்கட்சியாகத் தமிழகத்தின் எதிர்கால நலன் கருதி, ஆலோசனைகளை வழங்கத் தாங்கள் தயாராக இருப்பதாகத் தெரிவித்துள்ள அண்ணாமலையின் இந்த அறிக்கை, தவெக அரசின் அடுத்தகட்ட பொருளாதார நகர்வுகள் மீதான எதிர்பார்ப்பை அதிகரித்துள்ளது.
