ரஷ்யா – உக்ரைன் போர் தொடங்கி நான்கு ஆண்டுகள் முழுமையாக முடிந்துவிட்டன! ரத்தமும் கண்ணீரும் கலந்த இந்தப் போர், இப்போது ஐந்தாவது ஆண்டில் அடியெடுத்து வைக்கிறது. இந்தச் சூழலில், உக்ரைன் அதிபர் ஒரு முக்கியமான, உருக்கமான கோரிக்கையை அமெரிக்காவிடம் வைத்துள்ளார்.
உக்ரைன் அதிபர் விளாடிமிர் ஜெலென்ஸ்கி (Volodymyr Zelenskyy), அமெரிக்க அதிபர் டொனால்ட் ட்ரம்ப் (Donald Trump)-ஐ பார்த்து நேரடியாக ஒரு வேண்டுகோளை விடுத்துள்ளார். “தயவுசெய்து எங்களை விட்டு விலகி விடாதீர்கள்.. எங்கள் பக்கம் நில்லுங்கள்” என்று கூறும் நிலைக்கு உக்ரைன் தள்ளப்பட்டுள்ளது.
சிஎன்என் (CNN) ஊடகத்திற்குப் பேட்டியளித்த ஜெலென்ஸ்கி (Volodymyr Zelenskyy), “அமெரிக்கா போன்ற ஒரு வல்லரசு நாடு, ஜனநாயகத்திற்காகப் போராடும் எங்களை நடுக்கடலில் கைவிடக்கூடாது. நாங்கள் எதிர்த்துப் போரிடுவது ஒரு நாட்டுடன் அல்ல.. விளாடிமிர் புடின் (Vladimir Putin) என்ற ஒரு தனி மனிதருடன்! புடின் என்றால் போர்.. போர் என்றால் புடின்.. ரஷ்யா முழுவதையும் அவர் ஒரு சிறைச்சாலையாக மாற்றி வைத்துள்ளார்” என்று மிகக் கடுமையாக விமர்சித்துள்ளார்.
இங்கேதான் ஒரு முக்கியமான அரசியல் திருப்பம் உள்ளது. டொனால்ட் ட்ரம்ப் (Donald Trump) ரஷ்யா மீது போதுமான அழுத்தம் கொடுக்கிறாரா? என்று கேட்டதற்கு, “இல்லை” என்று ஒற்றை வார்த்தையில் அதிரடியாகப் பதிலளித்துள்ளார் ஜெலென்ஸ்கி.
போர் தொடங்கி நான்கு ஆண்டுகள் ஆகிவிட்டதால் உக்ரைன் மக்கள் சோர்ந்து போய்விட்டார்கள் என்பதை ஒப்புக்கொண்ட அவர், சமாதானம் என்ற பெயரில் ரஷ்யா கேட்பதை எல்லாம் கொடுக்க முடியாது என்று திட்டவட்டமாகக் கூறியுள்ளார். “அவர்கள் கேட்பதைக் கொடுத்தால், நாங்கள் எங்கள் நாட்டையே இழக்க நேரிடும்” என்பது ஜெலென்ஸ்கியின் (Zelenskyy) வாதம்.
2022-ல் போர் தொடங்கிய போது, உக்ரைன் தலைநகர் கீவ் (Kyiv) சில நாட்களிலேயே வீழ்ந்துவிடும், உக்ரைன் காணாமல் போய்விடும் என்று அமெரிக்கப் பாதுகாப்பு அதிகாரிகள் கணித்தார்கள். ஆனால் நான்கு ஆண்டுகள் ஓடிவிட்டன. ரஷ்யாவால் உக்ரைனின் 10 சதவீத நிலப்பரப்பை மட்டுமே கட்டுப்பாட்டில் வைத்திருக்க முடிகிறது. கீவ் (Kyiv) நகரை விட்டு ரஷ்யப் படைகள் 300 கிலோமீட்டர் தூரத்திற்கு விரட்டியடிக்கப்பட்டுள்ளன.
இருப்பினும் போர் நின்றபாடில்லை. ஐந்தாவது ஆண்டில் போர் அடியெடுத்து வைக்கும் இந்த நேரத்தில், ட்ரம்ப் (Donald Trump) எடுக்கும் முடிவுதான் உக்ரைனின் எதிர்காலத்தைத் தீர்மானிக்கப் போகிறது. அமெரிக்காவின் உதவி இல்லாமல் உக்ரைனால் இனியும் தாக்குப்பிடிக்க முடியுமா என்பதுதான் இப்போது உலக அரங்கில் இருக்கும் மிகப்பெரிய கேள்வி!
