அமெரிக்காவின் முன்னாள் அதிபர் டொனால்ட் டிரம்ப், இந்தாண்டு அமைதிக்கான நோபல் பரிசு தன்னுக்கே வழங்கப்பட வேண்டும் என வலியுறுத்தியிருந்தார். நோபல் பரிசு வழங்கப்படாவிட்டால், அது அமெரிக்காவை அவமதிக்கும் செயல் ஆகும் என்றும் அவர் தெரிவித்திருந்தார்.
எனினும், இம்முறை அமைதிக்கான நோபல் பரிசு வெனிசுலா சமூக செயற்பாட்டாளர் மரியா கொரினா மச்சாடோவுக்கு அறிவிக்கப்பட்டுள்ளது. இதனால் டிரம்ப் மற்றும் அவரது ஆதரவாளர்களிடையே கடும் அதிருப்தி நிலவுகிறது.
தகவலின்படி, நோபல் பரிசுக்கான பரிந்துரைகள் பெறும் காலம் முடிந்த பிறகே டிரம்ப்பின் பெயர் பரிந்துரைக்கப்பட்டதாக கூறப்படுகிறது. இஸ்ரேல், பாகிஸ்தான் உள்ளிட்ட நாடுகள் பிப்ரவரி 1க்குப் பிறகு டிரம்ப்பை பரிந்துரைத்ததால், அவர் தேர்வாகாமல் போனதாக அறியப்படுகிறது.
இது தொடர்பாக நார்வே நோபல் கமிட்டியின் உறுப்பினரான ஜோர்கன் வாட்னே பிரிட்னெஸ் தெரிவித்ததாவது: ‘நாங்கள் ஒவ்வொரு ஆண்டும் அமைதிக்கான நோபல் பரிசு தொடர்பாக ஆயிரக்கணக்கான கடிதங்களையும் பரிந்துரைகளையும் பெறுகிறோம். பரிந்துரைகள் மட்டுமல்லாது, பல்வேறு ஊடகங்கள் மற்றும் அரசியல் அழுத்தங்களும் எங்கள் கவனத்திற்கு வரும். ஆனால் எங்கள் முடிவுகள் எந்தவொரு வெளிப்புற தாக்கத்தாலும் பாதிக்கப்படாது.
நாங்கள் அமர்ந்திருக்கும் அறை தைரியம், நேர்மை மற்றும் நோபல் பரிசின் நிறுவனர் ஆல்பிரட் நோபலின் நோக்கங்களால் வழிநடத்தப்படுகிறது,’ என்று அவர் கூறினார்.
இதன் மூலம் நோபல் கமிட்டி தனது முடிவுகள் முழுமையாக சுயாதீனமானவை என்பதை தெளிவுபடுத்தியுள்ளது.
