தமிழக அரசியலில் ‘நீட்’ என்பது வெறும் தேர்வு மட்டுமல்ல, அது ஒரு மிகப்பெரிய உணர்ச்சிகரமான அரசியல் ஆயுதம். சமீபத்தில் நீட் வினாத்தாள் கசிவு மற்றும் முறைகேடுகள் காரணமாக நாடு முழுவதும் கொந்தளிப்பு ஏற்பட்டுள்ள நிலையில், தமிழக முதலமைச்சர் விஜய் ஏற்கனவே மத்திய அரசுக்கு ஒரு கடிதம் எழுதியிருந்தார்.
அதில் நீட் தேர்வை ஒட்டுமொத்தமாக ரத்து செய்ய வேண்டும் என்று அவர் வலியுறுத்தியிருந்தார். இந்த நிலையில், இப்போது எதிர்க்கட்சித் தலைவர் மு.க. ஸ்டாலின் பிரதமருக்கு ஒரு நீண்ட கடிதத்தை எழுதியுள்ளார். “நீட் மறுதேர்வு நடத்த வேண்டாம், அதற்குப் பதில் 12-ம் வகுப்பு மதிப்பெண் அடிப்படையிலேயே மாணவர் சேர்க்கையை நடத்த அவசரச் சட்டம் கொண்டு வாருங்கள்” என்பதுதான் ஸ்டாலின் கடிதத்தின் சாராம்சம்.
இங்குதான் ஒரு சுவாரஸ்யமான அரசியல் கேள்வி எழுகிறது. ஒரு மாநிலத்தின் முதலமைச்சராக விஜய் ஏற்கனவே தனது நிலைப்பாட்டைத் தெளிவுபடுத்திவிட்ட நிலையில், எதிர்க்கட்சித் தலைவராக இருக்கும் ஸ்டாலின் இப்போது ஏன் இதே போன்ற ஒரு கோரிக்கையை, இன்னும் விரிவான வரலாற்றுப் பின்னணியோடு முன்வைக்கிறார்? 2015 முதல் 2024 வரை நீட் தேர்வில் நடந்த அத்தனை முறைகேடுகளையும் பட்டியலிட்டுள்ள ஸ்டாலின், நீட் என்பது 70 ஆயிரம் கோடி ரூபாய் புரளும் ஒரு மிகப்பெரிய பயிற்சி மையத் தொழிலாக மாறிவிட்டது என்று சாடியுள்ளார்.
இது எந்த மாதிரியான மனநிலை என்ற கேள்விக்கு விடை தேடினால், அங்கு ‘அரசியல் இருப்பைத் தக்கவைத்தல்’ (Politics of Presence) என்ற ஒரு புள்ளி தெளிவாகத் தெரிகிறது. நீட் தேர்வுக்கு எதிராகத் தான் முதலமைச்சராக இருந்தபோது கொண்டு வந்த சட்டப் போராட்டங்களை நினைவுபடுத்தவும், இந்த விவகாரத்தில் விஜய்யை விடத் தனக்குத் தான் அதிக அனுபவமும், தெளிவும் இருக்கிறது என்பதைக் காட்டவும் ஸ்டாலின் முயற்சிக்கிறார்.
குறிப்பாக, விஜய் “நீட் வேண்டாம்” என்று ஒற்றை வரியில் சொல்ல, ஸ்டாலின் “ஏன் வேண்டாம், அதற்குப் பதில் என்ன செய்ய வேண்டும்” என்று ஒரு முழுமையான ‘ஆல்டர்நேட்டிவ் மாடலை’ முன்வைக்கிறார். சுருக்கமாகச் சொன்னால், நீட் விவகாரத்தில் மாணவர்களின் நலனை முன்வைத்து முதலமைச்சர் விஜய்யும், எதிர்க்கட்சித் தலைவர் ஸ்டாலினும் ஒரே நேர்க்கோட்டில் பயணிப்பது போலத் தெரிந்தாலும், “யார் மாணவர்களின் உண்மையான பாதுகாவலன்?” என்ற போட்டியில் இருவரும் மல்லுக்கட்டுகிறார்கள். விஜய் ஒரு செயல்திட்டத்தை முன்வைக்கும்போது, அதைவிடக் கூடுதலாக ஒன்றைச் சொல்லித் தனது இருப்பை வலுப்படுத்த ஸ்டாலின் முயல்கிறார். இந்த ‘கிரெடிட் பாலிடிக்ஸ்’ இறுதியில் மாணவர்களுக்கு விடிவைத் தருமா அல்லது கடிதங்களோடு முடிந்துவிடுமா என்பதைப் பொறுத்திருந்துதான் பார்க்க வேண்டும்.
