தமிழக அரசியல் வரலாற்றில் 2017-ம் ஆண்டு கூவத்தூர் ரிசார்ட் அரசியல் ஏற்படுத்திய அதிர்வலைகள் இன்றும் மக்கள் மனதில் நீங்காத நிலையில், சரியாக ஒன்பது ஆண்டுகளுக்குப் பிறகு மீண்டும் ஒரு ‘ரிசார்ட் அரசியல்’ அதிரடியாகத் தொடங்கியுள்ளது. 2026 சட்டமன்றத் தேர்தல் முடிவுகளில் எந்தக் கட்சிக்கும் பெரும்பான்மை கிடைக்காத ‘தொங்கு சட்டசபை’ சூழல் ஏற்பட்டுள்ள நிலையில், தனது 47 எம்.எல்.ஏ-க்களையும் பாதுகாக்கும் முயற்சியில் அதிமுக பொதுச்செயலாளர் எடப்பாடி பழனிசாமி தீவிரமாக இறங்கியுள்ளார்.
குதிரை பேரத்தைத் தடுக்கவும், மாற்றுக்கட்சியினர் தங்களது எம்.எல்.ஏ-க்களைத் தொடர்பு கொள்வதைத் தவிர்க்கவும், அதிமுக உறுப்பினர்கள் அனைவரும் தற்போது புதுச்சேரியில் உள்ள ஒரு ரகசிய சொகுசு விடுதியில் தங்க வைக்கப்பட்டுள்ளனர். நேற்று மாலை புதுச்சேரிக்கு நேரில் சென்ற எடப்பாடி பழனிசாமி, அங்கு தங்கியுள்ள எம்.எல்.ஏ-க்களுடன் அவசர ஆலோசனை நடத்தினார்.
அப்போது, கட்சியின் ஒற்றுமையைக் காக்க வேண்டும் என்று வலியுறுத்திய அவர், எம்.எல்.ஏ-க்களுக்கு மிகவும் கடுமையான மூன்று நிபந்தனைகளை விதித்துள்ளார். முதலாவதாக, எந்த ஒரு எம்.எல்.ஏ-வும் மாற்றுக்கட்சியினருடன், குறிப்பாக நடிகர் விஜய்யின் தமிழக வெற்றி கழகத் தரப்புடன் நேரடியாகப் பேசக்கூடாது என்று உத்தரவிட்டுள்ளார்.
ஒருவேளை யாராவது போனில் தொடர்பு கொண்டால், அதனைத் தன்னிச்சையாகக் கையாளாமல் உடனடியாகத் தலைமைக்குத் தெரிவிக்க வேண்டும் என்றும், போன் கால்கள் உன்னிப்பாகக் கண்காணிக்கப்படும் என்றும் அவர் எச்சரித்துள்ளார். இரண்டாவதாக, கட்சியின் தலைமை முறைப்படி அறிவிக்கும் வரை எந்த ஒரு எம்.எல்.ஏ-வும் ரிசார்ட்டை விட்டு வெளியேறக் கூடாது என்று நிபந்தனை விதிக்கப்பட்டுள்ளது.
மூன்றாவதாக, தமிழகத்தில் ஒரு நிலையான அரசு அமைய அதிமுக எடுக்கும் அடுத்தகட்ட முடிவுகள் விரைவில் அறிவிக்கப்படும் என்றும், அதுவரை அனைவரும் ஒற்றுமையாகவும் பொறுமையாகவும் இருக்க வேண்டும் என்றும் இபிஎஸ் அறிவுறுத்தியுள்ளார். முன்னதாக, புதுச்சேரியில் நடைபெற்ற அதிமுக சட்டமன்ற உறுப்பினர்கள் கூட்டத்தில் எடப்பாடி பழனிசாமி ஒருமனதாகச் சட்டமன்றக் கட்சித் தலைவராகத் தேர்ந்தெடுக்கப்பட்டது குறிப்பிடத்தக்கது.
தனிப்பெரும் கட்சியாக 108 இடங்களைப் பிடித்துள்ள தமிழக வெற்றி கழகம், ஆட்சியமைக்க இன்னும் 10 எம்.எல்.ஏ-க்களின் ஆதரவைத் தீவிரமாகத் தேடி வருகிறது. இந்தச் சூழலில், அதிமுக எம்.எல்.ஏ-க்களை இழுப்பதற்கான முயற்சிகள் நடக்கலாம் என்ற அச்சமே எடப்பாடி பழனிசாமியை இந்த ரிசார்ட் அரசியலை நோக்கித் தள்ளியுள்ளது.
ஒருபுறம் திமுக ஆட்சியமைக்க முட்டுக்கட்டை போட மாட்டோம் என்று கூறினாலும், மறுபுறம் அதிமுக தனது பலத்தைத் தக்கவைக்கப் போராடி வருகிறது. திராவிடப் பாரம்பரியத்தைக் காக்க அதிமுக எடுக்கும் இந்தத் தற்காப்பு நடவடிக்கைகள், தமிழக அரசியலில் அடுத்தகட்டமாக என்ன நடக்கப்போகிறது என்ற எதிர்பார்ப்பை உச்சத்திற்குக் கொண்டு சென்றுள்ளது.
