இந்தியத் தங்கச் சந்தையில் தற்போது ஒரு மிகப்பெரிய விபரீத மாற்றம் நிகழ்ந்து வருகிறது. மத்திய அரசு தங்க இறக்குமதி வரியை 6 சதவீதத்திலிருந்து 15 சதவீதமாக உயர்த்திய சில வாரங்களிலேயே, இந்தியாவில் தங்கக் கடத்தல் சம்பவங்கள் யாரும் எதிர்பார்க்காத வகையில் அதிரடியாக அதிகரித்துள்ளன.
சட்டப்பூர்வமாகத் தங்கம் வாங்குவதை விட, கடத்தல் தங்கம் ஒரு கிலோவுக்கு சுமார் 8 லட்சம் முதல் 10 லட்சம் ரூபாய் வரை குறைந்த விலையில் கிடைப்பதால், முறையான நகை வியாபாரிகள் கடும் அதிர்ச்சியில் உள்ளனர். இந்திய புல்லியன் மற்றும் ஜுவல்லர்ஸ் சங்கம் இந்த அபாயகரமான சூழலைச் சுட்டிக்காட்டி, இது நாட்டின் பொருளாதாரத்திற்கே ஒரு மிகப்பெரிய சவால் என எச்சரித்துள்ளது.
இந்தத் திடீர் கடத்தல் அதிகரிப்புக்குப் பின்னால் இருக்கும் அந்த இமாலய லாபக் கணக்கைப் பார்த்தால் நீங்களே மிரண்டு போவீர்கள். தற்போது இந்தியாவில் ஒரு கிலோ சட்டப்பூர்வ தங்கத்தின் விலை, 15 சதவீத இறக்குமதி வரி மற்றும் 3 சதவீத ஜிஎஸ்டி உட்பட சுமார் ஒரு கோடியே 65 லட்சம் ரூபாயாக உள்ளது.
ஆனால், இதில் உண்மையான தங்கத்தின் மதிப்பு வெறும் ஒரு கோடியே 40 லட்சம் ரூபாய் மட்டுமே. அதாவது வரி ஏய்ப்பு செய்யும் ஒரு கடத்தல்காரருக்குத் தங்கம் கிலோவுக்கு சுமார் 25 லட்சம் ரூபாய் லாபம் கிடைக்கிறது. இதில் 8 முதல் 10 லட்சம் ரூபாய் வரை உள்ளூர் வியாபாரிகளுக்குத் தள்ளுபடி கொடுத்த பிறகும், கடத்தல்காரர்களுக்கு ஒரு கிலோவுக்கு 15 லட்சம் ரூபாய் வரை நிகர லாபம் கிடைக்கிறது. இந்த மிகப்பெரிய லாபமே பலரையும் கடத்தல் தொழிலை நோக்கி ஈர்க்கிறது.
குறிப்பாக வளைகுடா நாடுகளிலிருந்து வரும் பயணிகள் தங்களைச் சாதாரணப் பயணிகள் போலக் காட்டிக்கொண்டு, நகைகளை உடலில் அணிந்து ‘கிரீன் சேனல்’ வழியாகச் சுங்கத் துறையினரிடம் சிக்காமல் கொண்டு வருகின்றனர். விமான நிலையங்கள் மட்டுமின்றி, வங்கதேசம் மற்றும் நேபாளம் எல்லைகளின் வழியாகவும் தங்கம் பெருமளவில் ஊடுருவுகிறது. தமிழ்நாடு, மகாராஷ்டிரா, குஜராத் மற்றும் மேற்கு வங்கம் போன்ற மாநிலங்களில் இந்தச் சட்டவிரோதச் செயல்பாடுகள் மிகவும் தீவிரமாக உள்ளதாகத் தகவல்கள் தெரிவிக்கின்றன.
எல்லைப் பகுதிகளில் உள்ள சிறிய நகரங்கள் வழியாக உள்ளூர் வியாபாரிகளுக்கு இந்தத் தங்கம் மிக விரைவாக விநியோகம் செய்யப்படுகிறது. சந்தை வல்லுநர்கள் இந்தச் சூழலை 2013-ஆம் ஆண்டுடன் ஒப்பிடுகின்றனர். அப்போது வரி உயர்த்தப்பட்டபோது, கடத்தல் தங்கம் ஒரே ஆண்டில் 10 டன்னிலிருந்து 70 டன்னாக, அதாவது ஏழு மடங்கு அதிகரித்தது. தற்போது அதே போன்றதொரு மோசமான நிலை மீண்டும் உருவாகத் தொடங்கியுள்ளது.
வரி உயர்வு தொடரும் வரை இத்தகைய கடத்தல் சம்பவங்களை முழுமையாகக் கட்டுப்படுத்துவது கடினம் எனச் சுங்கத்துறை அதிகாரிகள் கருதுகின்றனர். இது அரசின் வரி வருவாயைப் பாதிப்பதோடு மட்டுமல்லாமல், நேர்மையாகத் தொழில் செய்யும் நகை வியாபாரிகளையும் நஷ்டத்தில் ஆழ்த்துகிறது. தங்கம் இந்திய கலாச்சாரத்தில் ஒரு முக்கியப் பங்கு வகிப்பதால், அரசு வரியைக் குறைத்துச் சட்டப்பூர்வ வர்த்தகத்தை ஊக்குவிக்க வேண்டும் என்பதே அனைவரின் எதிர்பார்ப்பாக உள்ளது.
