செல்வமகள் சேமிப்பு திட்டம் என்பது தற்போதைய காலகட்டத்தில் உள்ள பிரபலமான அரசு நிதித் திட்டங்களில் ஒன்றாகும். செல்வமகள் சேமிப்பு திட்டம் குறிப்பாகப் பெண் குழந்தைகளுக்காக வடிவமைக்கப்பட்டுள்ளது. இதில், பெண் குழந்தைகளுக்கு மட்டுமே கணக்கைத் திறக்க முடியும். மத்திய அரசால் நடத்தப்படும் இந்தத் திட்டத்திற்கு ஆண்டுக்கு 8.2 சதவீத வட்டி வழங்கப்படுகிறது.குறிப்பாக, நாட்டில் உள்ள வேறு எந்தத் திட்டத்திற்கும் பெண் குழந்தைகளுக்கு இவ்வளவு வட்டி கிடைப்பதில்லை. உங்கள் பெண் குழந்தைக்கு செல்வமகள் சேமிப்பு திட்டத்தில் கணக்குத் திறக்க நினைத்தால், முதிர்வு காலத்தில் ஒரு நல்ல தொகையைப் பெறலாம். இந்தத் தொகையை அவர்களது உயர்கல்வி மற்றும் திருமணத்திற்கு பயன்படுத்தலாம்.
இந்த செல்வமகள் சேமிப்பு திட்டத்தின் கீழ் கணக்குத் திறக்க, உங்கள் மகளின் வயது பத்து வயதுக்குக் குறைவாக இருக்க வேண்டும். சுகன்யா சம்ரித்தி யோஜனாவில் ஒவ்வொரு ஆண்டும் குறைந்தபட்சம் ரூ.250 டெபாசிட் செய்ய வேண்டும். இந்தத் திட்டத்தின் கீழ், உங்கள் மகளின் பெயரில் ஒரு வருடத்தில் அதிகபட்சமாக ரூ.1.5 லட்சம் வரை டெபாசிட் செய்யலாம்.செல்வமகள் சேமிப்பு திட்டம் ஒரு முழுமையான வரி விலக்கு பெற்ற திட்டமாகும்.
இந்தத் திட்டத்தின் மூலம் கிடைக்கும் வருமானத்திற்கு நீங்கள் ஒரு ரூபாய் கூட வரியாகச் செலுத்த வேண்டியதில்லை. செல்வமகள் சேமிப்பு திட்டத்தின் கீழ், ஒரு குடும்பத்தில் அதிகபட்சமாக இரண்டு பெண் குழந்தைகளுக்குக் கணக்குத் தொடங்கலாம். ஒரு குடும்பத்தில் இரட்டைப் பெண் குழந்தைகள் இருந்தால், அந்தக் குடும்பத்தில் இரண்டுக்கும் மேற்பட்ட பெண் பிள்ளைகளுக்கும் கணக்குத் தொடங்கலாம்.
செல்வமகள் சேமிப்பு திட்டத்தில், உங்கள் மகளின் பெயரில் 15 ஆண்டுகளுக்கு முதலீடு செய்ய வேண்டும். இந்தத் திட்டத்தின் கீழ், உங்கள் மகளின் பெயரில் தொடங்கப்பட்ட கணக்கு, கணக்குத் தொடங்கிய நாளிலிருந்து 21 ஆண்டுகளுக்குப் பிறகு முதிர்வடைகிறது. உங்கள் மகளுக்கு 18 வயது பூர்த்தியாகி, நீங்கள் அவருக்குத் திருமணம் செய்து வைக்க விரும்பினால், உங்கள் மகளின் கணக்கை நீங்கள் மூடலாம். அதன் பிறகு பணம் உங்கள் மகளின் வங்கிக் கணக்கிற்கு மாற்றப்படும்.உதாரணமாக உங்கள் மகளுக்கு 1 வயது ஆகிறது என்றால், நீங்கள் இப்போது கணக்கைத் திறந்து, ஒவ்வொரு ஆண்டும் ரூ.1,09,000 முதலீடு செய்கிறீர்கள் என்று வைத்துக் கொள்வோம். இந்த சூழ்நிலையில் உங்களின் கணக்கு 2047-ல் முதிர்வடையும் போது, மொத்தமாக ரூ.50,34,040 மகளின் கணக்கிற்கு வந்து சேரும்.
