தமிழக அரசின் மகளிர் உரிமைத் தொகை திட்டத்தின் கீழ், ஜூன் மாதத்திற்கான ஆயிரம் ரூபாய் தற்போது தகுதியுள்ள பயனாளிகளின் வங்கிக் கணக்குகளில் வரவு வைக்கப்பட்டுள்ளது. சுமார் ஒரு கோடியே 31 லட்சம் பெண்கள் பயன்பெறும் இந்தத் திட்டத்தில், வழக்கமாக மாதந்தோறும் 14 அல்லது 15-ஆம் தேதிகளில் பணம் விநியோகிக்கப்படுவது வழக்கம்.
அந்த அடிப்படையில், இந்த மாதத்திற்கான தவணைத் தொகையும் பெரும்பாலான பயனாளிகளுக்கு ஏற்கனவே சென்றடைந்துவிட்டது. இருப்பினும், சில பெண்களுக்கு இன்னும் பணம் வரவில்லை என்ற புகார்கள் எழுந்துள்ளன. இதற்கான காரணங்கள் மற்றும் தீர்வுகள் குறித்துத் தற்போது அரசு தரப்பிலிருந்து சில முக்கிய விளக்கங்கள் அளிக்கப்பட்டுள்ளன.
உங்களுக்கு இந்த மாதத் தொகை இன்னும் வந்து சேரவில்லை என்றால், அதற்கு முதன்மையான காரணம் உங்கள் வங்கிக் கணக்கில் உள்ள தொழில்நுட்பச் சிக்கல்களாக இருக்கலாம். குறிப்பாக, ஏற்கனவே பணம் வந்துகொண்டிருந்த வங்கிக் கணக்கை மாற்றி, புதிய கணக்கில் பணம் வர வேண்டும் என்று கோரிக்கை வைத்தவர்களுக்கு இத்தகைய தாமதம் ஏற்பட வாய்ப்புள்ளது.
புதிய வங்கிக் கணக்கு விவரங்களைப் பதிவு செய்யும்போது ஏதேனும் பிழைகள் ஏற்பட்டிருந்தால் பணம் வரவு வைக்கப்படாது. சில நேரங்களில், புதிய கணக்கிற்குப் பதிலாக உங்கள் பழைய கணக்கிலேயே பணம் மீண்டும் வரவு வைக்கப்பட்டிருக்கவும் வாய்ப்புள்ளது. எனவே, இரண்டு கணக்குகளையும் ஒருமுறை சரிபார்ப்பது அவசியமாகும்.
மற்றொரு முக்கியமான விஷயம் என்னவென்றால், பலருக்கு வங்கிக் கணக்கில் பணம் ஏறினாலும் மொபைல் எண்ணுக்குக் குறுஞ்செய்தி வருவதில் தாமதம் ஏற்படுகிறது. எனவே, எஸ்எம்எஸ் வரவில்லை என்பதற்காகப் பணம் வரவில்லை என்று முடிவு செய்ய வேண்டாம். உங்கள் வங்கியின் பாஸ்புக்கை அப்டேட் செய்தோ அல்லது ஏடிஎம் மையத்திற்குச் சென்றோ கணக்கின் இருப்பை நேரடியாகச் சரிபார்த்துக் கொள்ளுங்கள்.
ஒருவேளை நீங்கள் வங்கிக் கணக்கை மாற்ற விரும்பினால், உங்கள் பகுதியில் உள்ள தாலுகா அலுவலகத்திற்குச் சென்று உரிய படிவத்தை அளிக்கலாம். இதன் மூலம் அடுத்த மாதம் முதல் உங்கள் புதிய கணக்கில் தடையின்றிப் பணம் வர வழிவகை செய்யப்படும்.
மேலும், தகுதியுள்ள பயனாளிகள் பட்டியலில் இருந்து உங்கள் பெயர் ஏதேனும் காரணத்திற்காக நீக்கப்பட்டிருக்கிறதா என்பதையும் நீங்கள் உறுதி செய்துகொள்ள வேண்டும். இறந்தவர்களின் பெயர்கள் மற்றும் தகுதியில்லாத பயனாளிகளின் விவரங்களை அரசு அவ்வப்போது சரிபார்த்துப் பட்டியலில் இருந்து நீக்கி வருகிறது.
இதில் ஏதேனும் தவறுதலாக உங்கள் பெயர் விடுபட்டிருந்தால், நீங்கள் தாலுகா அலுவலகத்தை அணுகி முறையிடலாம். ஏழை எளிய பெண்களின் வாழ்வாதாரத்தை மேம்படுத்தும் நோக்கில் செயல்படுத்தப்படும் இந்தத் திட்டத்தில், சிறு தொழில்நுட்பத் தடைகள் இருந்தாலும் அவற்றை விரைந்து சரிசெய்து பணத்தைப் பெற்றுக்கொள்ளுமாறு அதிகாரிகள் அறிவுறுத்துகின்றனர்.
