கருந்துளைகள் போல் விண்வெளியில் வெண்துளைகள் இருக்கின்றனவா? விண்வெளி பற்றிய ஆய்வுகளில் “கருந்துளை” என்பது அனைவரும் அறிந்த ஒன்று. ஆனால் அதற்கு எதிர்மாறான ஒரு கோட்பாடு “வெண்துளை” என்பதும் விஞ்ஞானிகளிடையே பேசப்படுகிறது.
கருந்துளை என்பது, ஈர்ப்புச் சக்தி மிக அதிகமுள்ள பகுதி; அதில் ஒளி கூட தப்பி செல்ல முடியாது. ஆனால் வெண்துளை என்பது இதற்கு முற்றிலும் எதிர்மாறானது. அதாவது, அதிலிருந்து பொருள்கள் மற்றும் ஆற்றல் வெளியே பாயும், ஆனால் எதுவும் அதற்குள் செல்ல முடியாது என்பதே இதன் கோட்பாட்டு விளக்கம்.
வெண்துளைகள் இயற்கையில் கண்காணிக்கப்படவில்லை, ஆனால் கணித ரீதியாகவும், சார்பியல் கோட்பாடுகளின் அடிப்படையிலும் அவை சாத்தியமென விஞ்ஞானிகள் கருதுகின்றனர். சிலர், கருந்துளையின் மறுபுறம் வெண்துளை இருக்கலாம் என்றும், அது “Wormhole” எனப்படும் விண்வெளிக் குழாயின் இரண்டு முடிவுகளில் ஒன்றாக இருக்கலாம் என்றும் கூறுகின்றனர்.
வெண்துளை இருந்தால், அது ஒரு “விண்வெளி வாசல்” அதாவது Cosmic Gateway போல செயல்பட்டு, ஒரு பிரபஞ்சத்திலிருந்து மற்றொரு பிரபஞ்சத்துக்குப் பொருள்களை கொண்டு செல்லக்கூடும் என்ற அபூர்வமான யூகங்களும் முன்வைக்கப்பட்டுள்ளன.
இன்றுவரை வெண்துளை பற்றிய எந்த நேரடி சான்றுகளும் இல்லை. எனினும், இது இயற்பியல் மற்றும் பிரபஞ்சவியல் துறைகளில் ஆர்வமூட்டும் ஆராய்ச்சி பொருளாகவே தொடர்கிறது. இவ்வாறு, கருந்துளை உண்மையானது என நிரூபிக்கப்பட்டிருந்தாலும், வெண்துளை இன்னும் மர்மமாகவே இருந்து, பிரபஞ்சத்தின் அதிசயங்களை உணர்வதற்கான புதிய கதவாக விஞ்ஞானிகளின் கற்பனையைக் தூண்டிக் கொண்டிருக்கிறது.
