தமிழக மின் நுகர்வோர்களுக்கு ஒரு மிக முக்கியமான செய்தி. மின் கட்டணம் செலுத்துவதில் நிலவும் தாமதம், அதனால் ஏற்படும் இணைப்பு துண்டிப்பு மற்றும் அபராதத் தொல்லைகளுக்கு முற்றுப்புள்ளி வைக்கத் தமிழக மின்சார வினியோக நிறுவனம் ஒரு புதிய அதிரடி வசதியை அறிமுகப்படுத்தியுள்ளது. பெடரல் வங்கியுடன் இணைந்து ‘நேச்’ (NACH) எனப்படும் தானியங்கி பற்று வசதி மூலம் ‘டிஎன்பிடிசிஎல் ஆட்டோ பே’ (TNPDCL AutoPay) திட்டம் இப்போது செயல்பாட்டிற்கு வந்துள்ளது.
இந்தத் திட்டத்தின்படி, நீங்கள் ஒருமுறை உங்கள் வங்கி விவரங்களைப் பதிவு செய்துவிட்டால், உங்கள் வீட்டின் மின் பயன்பாடு கணக்கெடுக்கப்பட்ட நாளில் இருந்து சரியாக பத்தாவது நாளில் உங்களது மின் கட்டணத் தொகை உங்களது வங்கி கணக்கில் இருந்து தானாகவே எடுத்துக் கொள்ளப்படும். இதற்காக நீங்கள் ஒவ்வொரு முறையும் ஆன்லைனில் காத்திருக்கத் தேவையில்லை; பணம் எடுக்கப்பட்டவுடன் அதற்கான ரசீது உங்கள் மொபைலுக்கு உடனடியாக வந்துவிடும்.
ஆனால், இந்த வசதியைப் பயன்படுத்தத் தொடங்கும் நுகர்வோர்கள் கவனிக்க வேண்டிய ஒரு மிகப்பெரிய ‘ட்விஸ்ட்’ ஒன்று இதில் ஒளிந்துள்ளது. அதுதான் தமிழக அரசின் 200 யூனிட் இலவச மின்சாரத் திட்டம். தமிழக முதலமைச்சர் விஜய் அறிவித்திருந்த இந்தத் திட்டத்தின்படி, ஒரு வீட்டின் இரண்டு மாத மின் பயன்பாடு 500 யூனிட்டிற்கு மிகாமல் இருந்தால் மட்டுமே அந்த 200 யூனிட் இலவசச் சலுகை உங்களுக்குக் கிடைக்கும்.
இதன் மூலம் சுமார் 2.23 கோடி குடும்பங்களுக்குத் தலா 235 ரூபாய் வரை மிச்சமாகும். ஆனால், உங்களது மின் பயன்பாடு 500 யூனிட்டைக் கடந்தால், உங்களுக்கு வழங்கப்பட்டு வந்த 200 யூனிட் இலவசச் சலுகை ரத்து செய்யப்பட்டு, பழைய முறைப்படி வெறும் 100 யூனிட் இலவசச் சலுகை மட்டுமே வழங்கப்படும்.
இங்கேதான் நீங்கள் எச்சரிக்கையாக இருக்க வேண்டும். ‘ஆட்டோ பே’ வசதியைப் பதிவு செய்திருப்பவர்களுக்குப் பணம் தானாகவே டெபிட் ஆகிவிடும் என்பதால், உங்கள் பயன்பாடு 500 யூனிட்டைத் தாண்டியது உங்களுக்குத் தெரியாமலேயே போக வாய்ப்புள்ளது. இதனால் சலுகை இழக்கப்பட்டு கூடுதல் கட்டணம் உங்கள் கணக்கில் இருந்து எடுக்கப்படலாம்.
எனவே வசதிக்காக ஆட்டோ பே வசதியைப் பயன்படுத்தினாலும், உங்கள் வீட்டின் மின் பயன்பாடு 500 யூனிட்டிற்குள் இருப்பதை உறுதி செய்து கொள்வது உங்கள் பாக்கெட்டிற்கு மிகவும் நல்லது. தமிழகத்தில் ஏற்கனவே 85 சதவீத மக்கள் ஆன்லைன் மூலமாகவே மின் கட்டணம் செலுத்தி வரும் நிலையில், இந்தத் தானியங்கி முறை நுகர்வோரின் வேலைப்பளுவைக் குறைப்பதோடு வாரியத்தின் வருவாயையும் சீராக்கும் என அதிகாரிகள் எதிர்பார்க்கின்றனர்.
இந்த ஆட்டோ பே வசதி தேவைப்படுபவர்கள் மின்சார வாரியத்தின் இணையதளத்தில் ஆதார் மற்றும் வங்கி விவரங்களை அளித்துப் பதிவு செய்து கொள்ளலாம். ஒருவேளை வேண்டாம் என்று நினைத்தால் எப்போது வேண்டுமானாலும் ரத்து செய்யும் வசதியும் இதில் உள்ளது. ஒருவேளை உங்கள் வங்கி கணக்கில் போதிய பணம் இல்லையென்றால், உடனடியாக குறுஞ்செய்தி மூலம் உங்களுக்குத் தகவல் தெரிவிக்கப்படும், அதன் பிறகு நீங்கள் மாற்று வழிகளில் கட்டணத்தைச் செலுத்தலாம்.
தொழில்நுட்ப வசதிகளைப் பயன்படுத்தும் அதே வேளையில், அரசின் 200 யூனிட் இலவசச் சலுகையைத் தக்கவைத்துக் கொள்ள மின் பயன்பாட்டிலும் சிக்கனத்தைக் கடைப்பிடிப்பது அவசியம்.
