தமிழக அரசியல் களத்தில் கடந்த 60 ஆண்டுகளாகப் பின்பற்றப்பட்டு வந்த ‘திராவிட அரசியல் டெம்ப்ளேட்டை’, முதலமைச்சர் சி. ஜோசப் விஜய் தனது முதல் அமைச்சரவை விரிவாக்கத்திலேயே சுக்குநூறாக உடைத்து எறிந்துள்ளார். வெறும் மேடைப் பேச்சுகளில் மட்டும் இருந்த சமூக நீதியை, எவ்வித சாதி மற்றும் மத அடையாளங்களுக்குப் பின்னால் ஒளிந்து கொள்ளாமல் அவர் செயல்படுத்திய விதம், அரசியல் விமர்சகர்களையே வியப்பில் ஆழ்த்தியுள்ளது.
இதற்கு மிகச்சிறந்த உதாரணம், ஸ்ரீரங்கம் தொகுதியில் வெற்றி பெற்று, இன்று இந்து சமய அறநிலையத்துறை அமைச்சராகப் பொறுப்பேற்றுள்ள 31 வயது இளைஞர் எஸ். ரமேஷ். பெரியார், அண்ணா மற்றும் கலைஞர் கருணாநிதி காலத்து திராவிட அரசியலில், பிராமண சமூகத்தைச் சேர்ந்தவர்களுக்கு அமைச்சரவையில் இடமளிப்பது என்பது எட்டாக்கனியாகவே இருந்தது. அதிமுக-வில் எம்ஜிஆர் காலத்திலோ அல்லது ஜெயலலிதா காலத்திலோ கூட, இது ஒரு கவனமான அரசியல் கணக்காகவே பார்க்கப்பட்டது. ஆனால், எவ்வித அரசியல் பின்னணியும் இல்லாத, சாதி ரீதியான வாக்கு வங்கி பலமும் இல்லாத ரமேஷ் மற்றும் வெங்கட்ராமன் ஆகிய இருவரை அமைச்சரவையில் சேர்த்ததன் மூலம், ‘திறமை இருந்தால் யாராலும் அமைச்சராக முடியும்’ என்கிற புதிய நம்பிக்கையை முதல்வர் விஜய் விதைத்துள்ளார்.
அதே சமயம், விளிம்பு நிலை மக்களுக்கான அதிகாரப் பகிர்வில் விஜய் நிகழ்த்தியிருப்பது ஒரு மாபெரும் பாய்ச்சல். பொதுவாகத் தமிழக அமைச்சரவைகளில் பட்டியலினத்தைச் சேர்ந்தவர்களுக்கு மூன்று அல்லது நான்கு இடங்கள் மட்டுமே வழங்கப்படுவது ஒரு எழுதப்படாத விதியாக இருந்தது. ஆனால், தவெக-வைச் சேர்ந்த 7 பேர் மற்றும் விசிக-வைச் சேர்ந்த ஒரு நபர் என மொத்தம் 8 பட்டியலின அமைச்சர்களுக்கு விஜய் இடமளித்துள்ளார். இது திராவிடக் கட்சிகள் இதுவரை செய்திராத ஒரு புரட்சிகரமான சமூக நீதி நடவடிக்கையாகப் பார்க்கப்படுகிறது.
தனது கட்சியின் பெயரில் ‘திராவிட’ என்கிற சொல்லைத் தவிர்த்து, ‘தமிழ்’ என்கிற சொல்லை முன்னிறுத்திய முதல்வர் விஜய், திராவிட அரசியலின் அடிப்படைக் கொள்கைகளான இருமொழிக் கொள்கை, மதச்சார்பின்மை மற்றும் சமூக நீதி ஆகியவற்றில் ஒரு துளிகூட சமரசம் செய்து கொள்ளவில்லை. திமுக-வின் கூட்டணிக் கட்சிகளாக இருந்த காங்கிரஸ், விசிக மற்றும் இடதுசாரிகளைத் தன்வசப்படுத்தியதன் மூலம், தான் ஒரு வலுவான மதச்சார்பற்ற சக்தியாக இருப்பதையும் அவர் நிரூபித்துள்ளார்.
பழைய சாதிய கணக்குகளோ அல்லது அரசியல் லாப நஷ்டங்களோ இல்லாமல், ஒரு புதிய நிர்வாக முறையை முதல்வர் விஜய் உருவாக்கியுள்ளார். இருப்பினும், இந்த இளம் அமைச்சர்கள் சாதிய வட்டங்களுக்குள் சிக்காமல் நிர்வாகத்தை எப்படி முன்னெடுத்துச் செல்லப் போகிறார்கள்? திமுக-வின் திராவிட அடையாளத்திற்கும், விஜய்யின் தமிழ் அடையாளத்திற்கும் இடையிலான இந்தச் சித்தாந்தப் போர் எங்கே சென்று முடியும்? தமிழக அரசியலின் இந்த சுவாரஸ்யமான மாற்றங்களை நாம் வரும் நாட்களில் விரிவாகக் காணலாம்.
