பாகிஸ்தான் நாட்டில் தற்போது நிலவி வரும் அரசியல் குழப்பங்கள், அந்த நாடு மீண்டும் ஒரு ராணுவ ஆட்சியை நோக்கி நகர்வதையே உறுதி செய்கின்றன.
கடந்த பல ஆண்டுகளாகப் பொருளாதார நெருக்கடியில் சிக்கித் தவிக்கும் பாகிஸ்தான், சர்வதேச நிதியுதவிக்காகத் தவித்துக் கொண்டிருக்கும் வேளையில், அந்நாட்டு ராணுவம் மெல்ல மெல்ல ஒட்டுமொத்த அதிகாரத்தையும் தனது கையில் எடுக்கத் தொடங்கியுள்ளது.
பீல்ட் மார்ஷல் அசிம் முனீரின் தலைமையிலான ராணுவ அமைப்பு, அடுத்த 10 ஆண்டுகளுக்கான ஒரு பிரம்மாண்டமான தேசியத் திட்டத்தைத் தயார் செய்து வருவதாகத் தகவல்கள் வெளியாகியுள்ளன.
இந்தத் திட்டத்தின்படி, அரசின் மிக முக்கியமான முடிவுகளை எடுப்பதில் ராணுவத்திற்கு அதிகாரப்பூர்வமான மற்றும் சட்டப்பூர்வமான பங்கு வழங்கப்பட உள்ளது. இது பாகிஸ்தானின் ஜனநாயகக் கட்டமைப்பையே சிதைக்கும் ஒரு முயற்சியாகப் பார்க்கப்படுகிறது.
பாகிஸ்தானின் 75 ஆண்டுகால வரலாற்றில், சுமார் 34 ஆண்டுகள் நேரடி ராணுவ ஆட்சியின் கீழ்தான் அந்த நாடு இருந்துள்ளது. கடைசியாக 2008-ஆம் ஆண்டு ராணுவ ஆட்சி முடிவுக்கு வந்தாலும், வெளியுறவுக் கொள்கை மற்றும் அரசியல் முடிவுகளில் ராணுவத்தின் மறைமுகத் தலையீடு தொடர்ந்து கொண்டே இருந்தது.
ஆனால், தற்போது தயாராகி வரும் புதிய சட்டத் திருத்தங்கள் மூலம், ராணுவம் இனி திரைமறைவில் இருந்து செயல்படாமல், நேரடியாகவே ஆட்சி அதிகாரத்தைச் செலுத்தும் நிலைக்கு வரவுள்ளது.
பொருளாதாரச் சீர்திருத்தம் என்ற போர்வையில் அரசியலமைப்பில் மாற்றங்களைக் கொண்டு வந்து, ராணுவத்தின் செல்வாக்கைச் சட்டப்பூர்வமாக்க முனீர் தரப்பு தீவிரமாக உழைத்து வருகிறது.
இதில் மற்றொரு அதிர்ச்சிகரமான தகவல் என்னவென்றால், பாகிஸ்தான் தனது தற்போதைய நாடாளுமன்ற ஆட்சி முறையை மாற்றி, அதிபர் ஆட்சி முறைக்கு மாறத் திட்டமிட்டுள்ளது.
துருக்கி மற்றும் எகிப்து போன்ற நாடுகளில் இருப்பதைப் போல, ஒரே நபரிடம் அதிகாரம் குவியும் இந்த முறைக்கு மாறுவதன் மூலம், ராணுவம் தனக்குச் சாதகமான ஒருவரை அதிபராக அமர்த்தி நாட்டைத் தனது கட்டுப்பாட்டில் வைத்திருக்க முடியும்.
விரைவான முடிவுகளை எடுக்க அதிபர் முறை உதவும் என்று காரணம் சொல்லப்பட்டாலும், இது மறைமுகமாக ராணுவ சர்வாதிகாரத்திற்கு வழிவகுக்கும் என்று சர்வதேச அரசியல் வல்லுநர்கள் எச்சரிக்கின்றனர்.
பாகிஸ்தானின் இந்த அதிரடி மாற்றங்கள், அந்த நாட்டு மக்கள் மத்தியில் பெரும் அச்சத்தை உருவாக்கியுள்ளன.
ஏற்கனவே உணவுப் பொருட்களின் விலை உயர்வு மற்றும் வேலையில்லாத் திண்டாட்டத்தால் கதறித் துடிக்கும் பொதுமக்களுக்கு, ராணுவத்தின் இந்த அதிகாரக் குவிப்பு மேலும் சுமையாகவே அமையும்.
இந்தியாவின் அண்டை நாடான பாகிஸ்தானில் ஏற்படப்போகும் இந்த அரசியல் பூகம்பம், தெற்காசியப் பிராந்தியத்தின் பாதுகாப்பிலும் மிகப்பெரிய தாக்கத்தை ஏற்படுத்தும் என்பதில் ஐயமில்லை.
ஜனநாயகமா அல்லது ராணுவ சர்வாதிகாரமா என்ற போராட்டத்தின் விளிம்பில் தற்போது பாகிஸ்தான் நிற்கிறது.
