தங்கத்தின் மீதான இந்திய முதலீட்டாளர்களின் பார்வை திடீரென வெள்ளிப் பக்கம் திரும்பியிருக்கிறதா என்ற மாபெரும் கேள்வியை எழுப்பியுள்ளது, இந்திய மியூச்சுவல் ஃபண்ட் கூட்டமைப்பான ‘ஆம்ஃபி’ (AMFI) வெளியிட்டுள்ள அக்டோபர் மாதப் புள்ளிவிவரம்.
டிஜிட்டல் முறையில் தங்கத்தில் முதலீடு செய்யும் கோல்டு இ.டி.எஃப் (Gold ETF) திட்டங்களில், கடந்த செப்டம்பர் மாதத்தோடு ஒப்பிடுகையில் அக்டோபர் மாதத்தில் முதலீட்டு வரத்து சுமார் 22 சதவீதம் வரை தடாலடியாகக் குறைந்துள்ளது.
செப்டம்பரில் 4,450 கோடி ரூபாயாக இருந்த தங்க இ.டி.எஃப் முதலீடு, அக்டோபரில் 3,474 கோடி ரூபாயாகச் சுருங்கியுள்ளது.
கடந்த மாதம் உள்நாட்டுச் சந்தையில் தங்கத்தின் விலை 7 சதவீதம் வரை சரிந்ததே முதலீட்டாளர்களின் இந்தத் தயக்கத்திற்கு முக்கியக் காரணமாகப் பார்க்கப்படுகிறது.
ஆனால் மறுபுறம், தங்கத்திற்கு நேர்மாறாக வெள்ளி இ.டி.எஃப் (Silver ETF) திட்டங்களில் முதலீட்டாளர்கள் போட்டி போட்டுக்கொண்டு பணத்தைக் கொட்டியுள்ளனர்.
செப்டம்பர் மாதத்தில் 1,974 கோடி ரூபாயாக இருந்த வெள்ளி இ.டி.எஃப் முதலீடு, அக்டோபரில் யாரும் எதிர்பாராத வகையில் 56 சதவீதத்திற்கும் மேல் ராக்கெட் வேகத்தில் உயர்ந்து, 3,092 கோடி ரூபாயைத் தொட்டுள்ளது.
வெள்ளி விலை குறைந்திருந்த நேரத்தைப் பயன்படுத்தி முதலீட்டாளர்கள் புத்திசாலித்தனமாக வெள்ளியில் முதலீடுகளைக் குவித்திருப்பதையே இந்த அசுர வளர்ச்சி காட்டுகிறது.
தங்கம் மற்றும் வெள்ளியைத் தாண்டி, பங்குச்சந்தை சார்ந்த ஈக்விட்டி இ.டி.எஃப் திட்டங்களிலும் முதலீடுகள் 30 சதவீதத்திற்கும் மேல் அதிகரித்து, 12,973 கோடி ரூபாயாகப் பதிவாகியுள்ளது. அதேபோல் செப்டம்பரில் சரிவைச் சந்தித்த கடன் பத்திர இ.டி.எஃப் திட்டங்களும் மீண்டும் புத்துயிர் பெற்று 751 கோடி ரூபாய் முதலீடுகளை ஈர்த்துள்ளன.
சாமானிய மக்கள் மாதாந்திர சேமிப்பாகச் செலுத்தும் எஸ்.ஐ.பி (SIP) முதலீடுகளைப் பொறுத்தவரை, மிகச் சிறிய மாற்றத்துடன் அக்டோபர் மாதத்தில் 32,160 கோடி ரூபாய் குவிந்துள்ளது.
ஒட்டுமொத்தமாகப் பார்த்தால், கடந்த செப்டம்பர் மாதத்தில் 1.33 லட்சம் கோடி ரூபாய் வெளியேறிய நிலையில், அக்டோபர் மாதத்தில் இந்திய மியூச்சுவல் ஃபண்ட் துறை மாபெரும் எழுச்சி கண்டு 1.73 லட்சம் கோடி ரூபாய் நிகர முதலீட்டைப் பெற்றுள்ளது.
இதன் மூலம் மியூச்சுவல் ஃபண்ட் நிறுவனங்கள் நிர்வகிக்கும் மொத்த சொத்து மதிப்பு 83.39 லட்சம் கோடி ரூபாய் என்ற இமாலய உச்சத்தைத் தொட்டுள்ளது.
சந்தையில் ஏற்படும் விலை ஏற்ற இறக்கங்களுக்கு ஏற்ப இந்திய முதலீட்டாளர்கள் தங்களின் வியூகங்களை மிக சாதுரியமாக மாற்றி வருகிறார்கள் என்பதையே இந்தப் புள்ளிவிவரங்கள் நமக்குத் தெளிவாக உணர்த்துகின்றன.
