உலகளாவிய பொருளாதாரச் சூழல் குறித்து சர்வதேச நாணய நிதியமான IMF விடுத்துள்ள ஒரு புதிய எச்சரிக்கை, வளரும் நாடுகளிடையே பெரும் கவலையை ஏற்படுத்தியுள்ளது. அமெரிக்காவிற்கும் ஈரானுக்கும் இடையே நிலவி வரும் போர் பதற்றங்களால், மத்திய கிழக்கு நாடுகளில் அமைதியற்ற சூழல் உருவாகியுள்ளது.
இதன் நேரடி விளைவாக உலக சந்தையில் கச்சா எண்ணெய் மற்றும் இயற்கை எரிவாயுவின் விலை விண்ணைத் தொட்டுள்ள நிலையில், குறைந்த வருமானம் கொண்ட வளரும் நாடுகள் தங்கள் அரசாங்கச் செலவினங்களை உடனடியாகக் குறைக்க வேண்டிய கட்டாயத்தில் இருப்பதாக IMF தெரிவித்துள்ளது.
பாங்காக் நகரில் நடைபெற்ற வருடாந்திர கூட்டத்தில் பேசிய IMF-ன் ஆராய்ச்சித் துறை துணை இயக்குநர் பெத்யா கோவா புரூக்ஸ் (Petya Koeva Brooks), எரிபொருள் இறக்குமதியை நம்பியிருக்கும் நாடுகள் “வேறு வழியில்லாத” ஒரு இக்கட்டான நிலைக்குத் தள்ளப்பட்டுள்ளதாகக் குறிப்பிட்டுள்ளார்.
ஏற்கனவே பல ஆண்டுகளாகப் பல்வேறு பொருளாதார அதிர்ச்சிகளைச் சந்தித்து வரும் இந்த நாடுகளில், கடன் சுமையும் பணவீக்கமும் முன்னெப்போதும் இல்லாத அளவுக்கு உயர்ந்துள்ளது.
இதனால், மக்களுக்கு வழங்கப்பட்டு வரும் மானியங்களைக் குறைப்பதைத் தவிர அல்லது கடன்களை மறுசீரமைப்பதைத் தவிர அந்த நாடுகளுக்கு வேறு வழியில்லை என்று அவர் திட்டவட்டமாகத் தெரிவித்துள்ளார்.
மத்திய கிழக்கு நாடுகளில் ஏற்பட்டுள்ள இந்த மோதல் போக்கு, வெறும் எரிசக்தி விலையுடன் நின்றுவிடாமல், விவசாயத்திற்குத் தேவையான உரங்கள் மற்றும் அத்தியாவசிய உணவுப் பொருட்களின் விலையையும் வெகுவாக உயர்த்தி வருகிறது.
ஒருபுறம் அமெரிக்கா, தைவான் மற்றும் தென் கொரியா போன்ற வளர்ந்த நாடுகள் செயற்கை நுண்ணறிவு தொழில்நுட்ப முதலீடுகள் மூலம் பொருளாதார வளர்ச்சியை எட்டி வரும் நிலையில், இத்தகைய தொழில்நுட்ப வசதி இல்லாத ஏழை நாடுகள் போரின் பாதிப்புகளால் மேலும் பின்தங்கி வருகின்றன.
இதுமட்டுமின்றி, தட்பவெப்பநிலை மாற்றங்களால் ஏற்படும் ‘எல் நினோ’ தாக்கம் காரணமாக அரிசி உள்ளிட்ட உணவுப் பொருட்களின் விலையும் உயர்ந்து வருகிறது. ஒருவேளை நாடுகள் தங்கள் கடன் சிக்கல்களை இப்போதே தீர்க்கத் தவறினால், வருங்காலத்தில் இதற்கான விலை இன்னும் அதிகமாக இருக்கும் என்றும் IMF எச்சரித்துள்ளது.
மொத்தத்தில், வல்லரசு நாடுகளுக்கு இடையே நடக்கும் இந்தப் போர், சாதாரண மக்களின் அன்றாட வாழ்வாதாரத்தையும், வளரும் நாடுகளின் பொருளாதாரத் திட்டங்களையும் தலைகீழாக மாற்றியுள்ளது என்பதுதான் தற்போதைய நிதர்சனமான உண்மையாக உள்ளது.
