ஈரானுடன் நேரடிப் போர் ஒருபுறம் நடந்துகொண்டிருக்க.. மறுபுறம் அமெரிக்க ராணுவத்தில் ஒரு மாபெரும் அதிரடிச் சுத்திகரிப்புப் பணி அரங்கேறி வருகிறது. அமெரிக்க ராணுவத்தில் உள்ள இருபது சதவீத உயர்மட்ட ஜெனரல்கள் மற்றும் கடற்படை அட்மிரல்களை அதிரடியாக நீக்கப்போவதாக அமெரிக்கப் பாதுகாப்புத் துறை அறிவித்துள்ளது. அமெரிக்க ராணுவத்தில் அப்படி என்னதான் நடக்கிறது?
அமெரிக்கப் பாதுகாப்புத்துறை செயலாளர் பீட் ஹெக்செத், வர்ஜீனியாவில் உள்ள மரைன் கார்ப்ஸ் தளத்தில் நடந்த ஒரு கூட்டத்தில் கலந்துகொண்டு, அமெரிக்க ராணுவம் குறித்த ஒரு அதிர்ச்சிகரமான அறிவிப்பை வெளியிட்டார். அதன்படி, அமெரிக்க ராணுவத்தில் தற்போதுள்ள உயர்மட்ட ஜெனரல்கள் மற்றும் கடற்படை அட்மிரல்களின் பதவிகளில் சுமார் 20 சதவீதத்தை நிரந்தரமாகக் குறைக்கப் போவதாக அவர் அதிகாரப்பூர்வமாக அறிவித்துள்ளார். இது வருகின்ற இரண்டாயிரத்து இருபத்தி ஏழாம் ஆண்டு ஜனவரி ஒன்றாம் தேதிக்குள் முழுமையாகச் செயல்படுத்தப்படும் என்றும் அவர் தெரிவித்தார்.
இந்தத் துப்புரவுப் பணியின் ஒரு பகுதியாக, பெண்கள் மற்றும் சிறுபான்மையினருக்கு முன்னுரிமை அளிக்கும் திட்டங்களை அவர் அதிரடியாக ரத்து செய்துள்ளார். இதுமட்டுமில்லாமல், ஆண் ராணுவ வீரர்களுக்கான புதிய ‘டெஸ்டோஸ்டிரோன்’ (Testosterone) பரிசோதனை முறைகளை அறிமுகப்படுத்துவதாகவும், தரைப்படை பிரிவுகளில் பெண்களின் பங்களிப்பு குறித்து மறுபரிசீலனை செய்யப்போவதாகவும் அவர் அறிவித்துள்ளார். அமெரிக்க அதிபர் டொனால்ட் டிரம்ப் மற்றும் பாதுகாப்புச் செயலாளர் பீட் ஹெக்செத் இருவரும் இணைந்து, ஏற்கனவே இரண்டு டஜனுக்கும் மேற்பட்ட மூத்த ராணுவ அதிகாரிகளைப் பதவியிலிருந்து அதிரடியாக நீக்கியுள்ளனர்.
அமெரிக்க ராணுவத்தின் மேல்மட்டத்தில் இருக்கும் அளவுக்கதிகமான அதிகாரிகளின் எண்ணிக்கையைக் குறைத்து, ராணுவத்தை அதிநவீனப்படுத்துவதே தங்களின் நோக்கம் என்று டிரம்ப் அரசு கூறுகிறது. இதற்குப் பதிலாக, தன்னாட்சி பெற்ற ரோபோக்கள் மற்றும் ட்ரோன்களை இயக்கும் அதிநவீன வான்வழிப் படைப்பிரிவை ‘ஃபோர் ஸ்டார் கமாண்ட்’ (Four Star Command) என்ற பெயரில் புதிதாக உருவாக்க உள்ளதாக அவர் அறிவித்துள்ளார். ஹோர்முஸ் ஜலசந்தியில் ஈரானுடன் போர் நீடித்து வரும் நிலையில், பல மில்லியன் டாலர் மதிப்புள்ள அமெரிக்க ஏவுகணைகளை ஈரான் அழித்து வருவதால், இந்த அதிநவீன ட்ரோன் படையை உருவாக்க அமெரிக்கா முடிவு செய்துள்ளது.
ஆனால், அமெரிக்க ராணுவத்தில் 20 சதவீத உயர்மட்ட அதிகாரிகளைக் குறைக்கும் இந்த நடவடிக்கைக்கு, ஆளும் கட்சியிலும், எதிர்க்கட்சியிலும் கடும் எதிர்ப்புகள் கிளம்பியுள்ளன. அனுபவம் வாய்ந்த ஒரு தலைமுறை அதிகாரிகளை மொத்தமாகப் பதவியிலிருந்து நீக்குவது, அமெரிக்க ராணுவத்தின் அடித்தளத்தையே அசைத்துப் பார்க்கும் ஒரு மாபெரும் ஆபத்து என்று செனட்டர்கள் மிகக் கடுமையாக விமர்சித்து வருகின்றனர். வல்லரசு நாடான அமெரிக்காவின் இந்த மெகா ராணுவ மறுசீரமைப்பு, உலக நாடுகளின் ராணுவக் கட்டமைப்பில் பெரும் விவாதத்தை ஏற்படுத்தியுள்ளது.
