நுரையீரல் புற்றுநோய் என்றாலே பலரும் புகைப்பிடிப்பதைத்தான் பிரதான காரணமாக நினைப்பார்கள். ஆனால், தற்போது 20 முதல் 40 வயதுக்குட்பட்ட இளைஞர்கள் மற்றும் வாழ்நாளில் ஒருமுறை கூட சிகரெட் தொடாதவர்கள் மத்தியில் இந்த நோய் வேகமாகப் பரவி வருவது மருத்துவ உலகையே அதிர்ச்சியில் ஆழ்த்தியுள்ளது.
புகைப்பிடிக்காதவர்களுக்கு ஏற்படும் இந்தப் புற்றுநோய், வழக்கமான புற்றுநோயிலிருந்து முற்றிலும் மாறுபட்டது என்றும், இதற்கு நமது அன்றாடச் சூழலில் கலந்துள்ள கண்ணுக்குத் தெரியாத நச்சுகளே முக்கிய காரணம் என்றும் நிபுணர்கள் எச்சரிக்கின்றனர்.
குறிப்பாக, காற்றில் கலந்துள்ள பி.எம் 2.5 (PM 2.5) என்ற மிக நுண்ணிய தூசித் துகள்கள், நாம் சுவாசிக்கும்போது நுரையீரலின் ஆழமானப் பகுதிகளுக்குச் சென்று, அங்கு ‘தூங்கிக் கொண்டிருக்கும்’ சில மரபணு மாற்றங்களை (EGFR Mutations) தட்டி எழுப்புகின்றன.
இதுவே நாளடைவில் கட்டிகளாக உருவெடுத்துப் புற்றுநோயாக மாறுகிறது. வெளியில் இருக்கும் காற்று மாசுபாடு ஒருபுறமிருக்க, நமது வீட்டிற்குள்ளேயே பல ஆபத்துகள் ஒளிந்துள்ளன.
நிலத்தடியில் இருந்து கசியும் ‘ரேடான்’ (Radon) என்ற மர்மமான கதிரியக்க வாயு, புகைப்பிடிக்காதவர்களுக்குப் புற்றுநோய் ஏற்பட இரண்டாம் முக்கியக் காரணமாகச் சுட்டிக்காட்டப்படுகிறது. அதேபோல், போதிய காற்றோட்டம் இல்லாத சமையலறைகளில் அதிக வெப்பத்தில் எண்ணெய் ஊற்றிச் சமைக்கும்போது வெளியாகும் புகை மற்றும் விவசாயத்தில் பயன்படுத்தப்படும் பூச்சிக்கொல்லி மருந்துகள் போன்றவை நமது நுரையீரலை மெல்ல மெல்லச் சிதைக்கின்றன.
இதில் கவலைக்குரிய விஷயம் என்னவென்றால், ஆண்களை விடப் பெண்களுக்கு இந்தப் பாதிப்பு அதிகம் ஏற்படுகிறது. பெண்களின் உடலில் உள்ள ஹார்மோன்கள் மற்றும் சமையலறைப் புகையுடன் ஏற்படும் நீண்டகாலத் தொடர்பு ஆகியவை இதற்கு முக்கியக் காரணங்களாகப் பார்க்கப்படுகின்றன.
புற்றுநோயின் தீவிரத்தைப் பொறுத்து இதனை பியானோ (Piano), மெஸ்ஸோ (Mezzo) மற்றும் ஃபோர்டே (Forte) என மூன்று வகைகளாகப் பிரிக்கின்றனர்.
இதில் ‘மெஸ்ஸோ’ வகை என்பது முழுக்க முழுக்கக் காற்று மாசுபாடு மற்றும் நச்சு வாயுக்களால் ஏற்படக்கூடியது. அதிர்ஷ்டவசமாக, தற்போதைய மருத்துவ வளர்ச்சியில் இதற்கு ‘டார்கெட்டட் தெரபி’ (Targeted Therapy) போன்ற நவீனச் சிகிச்சைகள் வந்துவிட்டன.
இவை வழக்கமான கீமோதெரபியை விடக் குறைவான பக்கவிளைவுகளுடன் புற்றுநோய் செல்களை மட்டும் அழிக்கும் திறன் கொண்டவை. ஒருவருக்குத் தொடர்ந்து மூன்று வாரங்களுக்கு மேல் வறட்டு இருமல் இருந்தாலோ, மூச்சு விடுவதில் சிரமம் அல்லது காரணமே இல்லாமல் எடை குறைந்தாலோ உடனடியாக மருத்துவ ஆலோசனையைப் பெறுவது அவசியமாகும்.
இத்தகைய பாதிப்புகளில் இருந்து நம்மைப் பாதுகாத்துக் கொள்ளப் சில எளிய வழிமுறைகளை நாம் பின்பற்றலாம். காற்று மாசுபாடு அதிகமாக இருக்கும் நாட்களில் வீடுகளில் ‘ஹெப்பா’ (HEPA) வகை ஏர் பியூரிஃபையர்களைப் பயன்படுத்துவது, சமையலறையில் புகையை வெளியேற்றச் சரியான காற்றோட்ட வசதி அல்லது சிம்னி (Chimney) அமைப்பது மற்றும் காய்கறிகளைச் சமைக்கும் முன் நன்கு கழுவுவது போன்றவை நமக்கான பாதுகாப்பை உறுதி செய்யும்.
புகைப்பிடிப்பது மட்டுமே புற்றுநோய்க்குக் காரணம் என்ற பழைய எண்ணத்தை மாற்றி, கண்ணுக்குத் தெரியாத சுற்றுப்புற நச்சுகள் குறித்தும் நாம் விழிப்புணர்வுடன் இருக்க வேண்டியது இன்றைய காலத்தின் கட்டாயமாகும். நமது ஆரோக்கியம் என்பது நாம் சுவாசிக்கும் காற்றிலும் இருக்கிறது என்பதை மறந்துவிடாதீர்கள்.
