இங்கிலாந்துக்கு எதிரான டி20 தொடரில் 15 வயது இளம் வீரர் வைபவ் சூர்யவன்ஷி சொற்ப ரன்களில் அவுட்டாகி அணியில் இருந்து நீக்கப்பட்ட விவகாரம் தற்போது இந்திய கிரிக்கெட் வட்டாரத்தில் பெரும் விவாதத்தை ஏற்படுத்தியிருக்கிறது. இந்த நிலையில், இந்திய அணியின் முன்னாள் நட்சத்திர வீரரான வசீம் ஜாபர், இந்திய அணி நிர்வாகத்தின் இந்த செயல்பாட்டை மிகக் கடுமையாக விமர்சித்து ஒரு புதிய புயலைக் கிளப்பியுள்ளார்.
தனது யூடியூப் பக்கத்தில் இது குறித்துப் பேசியுள்ள வசீம் ஜாபர், வெறும் ஊடகங்களின் விளம்பரத்தையும் மக்களின் உணர்ச்சிப்பூர்வமான எதிர்பார்ப்பையும் பார்த்துவிட்டு, வைபவ் சூர்யவன்ஷியை இந்திய அணிக்குள் மிக அவசரமாகக் கொண்டு வந்தது ஒரு தவறான முடிவு என்று கூறியுள்ளார். இங்கிலாந்துக்கு எதிரான தொடரை சஞ்சு சாம்சனை வைத்தே தொடங்கியிருக்க வேண்டும். ஆனால், முதல் போட்டியில் சொதப்பினார் என்று கூறி சஞ்சுவை தூக்கிவிட்டு, வைபவை அணியில் சேர்த்தனர். அவர் விளையாடிய மூன்று போட்டிகளிலும் முறையே 14, 13 மற்றும் 15 ரன்கள் மட்டுமே எடுத்து ஏமாற்றினார். 15 வயதே ஆகும் ஒரு சிறுவனுக்கு இன்னும் சர்வதேசப் போட்டிகளின் அனுபவம் தேவைப்படுகிறது. அவரை அணியின் டக் அவுட்டில் உட்கார வைத்து சீனியர்கள் விளையாடுவதை வேடிக்கை பார்க்க வைத்திருக்க வேண்டும். அதை விடுத்து, அவசர அவசரமாகக் களமிறக்கியது அவரின் மீதான அழுத்தத்தை ஏற்றியுள்ளது.
மேலும் சஞ்சு சாம்சன் மற்றும் வைபவ் சூர்யவன்ஷி ஆகிய இருவரையும் இந்திய அணி நிர்வாகம் கையாண்ட விதம் மிகவும் விசித்திரமாகவும் தொழில்முறை அற்றதாகவும் இருந்ததாக ஜாபர் சாடியுள்ளார். மூன்று போட்டிகளுக்குப் பிறகு வைபவை நீக்கிவிட்டு ஐந்தாவது போட்டியில் மீண்டும் சஞ்சுவை கொண்டு வந்தனர். ஆனால், சஞ்சுவை வெறும் ஒரு போட்டியில் மட்டும் விளையாட வைத்துவிட்டு, அடுத்து வரவிருக்கும் ஜிம்பாப்வே தொடரிலிருந்து அவரை திடீரென நீக்கியுள்ளனர். அதே நேரத்தில் மூன்று போட்டிகளிலும் சொதப்பிய வைபவ் சூர்யவன்ஷி ஜிம்பாப்வே தொடருக்கான அணியில் நீடிக்கிறார்.
டி20 உலகக் கோப்பையை வெல்லும் திட்டத்தில் இருக்கும் இந்திய அணிக்கு சஞ்சு சாம்சன் போன்ற ஒரு அதிரடி ஆட்டக்காரர் மிகவும் அவசியமானவர். அவருக்குத் தொடர் வாய்ப்புகளை வழங்காமல் இப்படி ஒரு போட்டியில் மட்டும் வாய்ப்பு தருவது அவரது எதிர்காலத்தைப் பாதிக்கும் என்று ஜாபர் ஆதங்கத்துடன் தெரிவித்துள்ளார்.
