மத்திய அரசு, தொழிற்சாலைகள் மற்றும் வர்த்தக நிறுவனங்கள் பெட்ரோல் நிலையங்களில் இருந்து டீசல் மற்றும் பெட்ரோலை மொத்தமாக வாங்குவதற்கு தற்காலிக கட்டுப்பாடுகளை விதித்துள்ளது. இதுகுறித்து பெட்ரோலியம் மற்றும் இயற்கை எரிவாயு அமைச்சகம் வெளியிட்டுள்ள அரசாணையில், சில்லறை மற்றும் மொத்த விற்பனை விலைகளுக்கு இடையிலான பெரிய விலை வித்தியாசம் காரணமாக பல நிறுவனங்கள் நேரடியாக பெட்ரோல் நிலையங்களில் இருந்து அதிகளவில் எரிபொருள் வாங்கத் தொடங்கியதாக குறிப்பிடப்பட்டுள்ளது. இதனால் சில பகுதிகளில் டீசலுக்கான தேவை திடீரென உயர்ந்து, சில்லறை விற்பனை மற்றும் விநியோகத்தில் சிக்கல்கள் உருவாகும் அபாயம் ஏற்பட்டுள்ளது.
டெல்லியில் ஒரு லிட்டர் டீசலின் சில்லறை விலை ரூ.95.20 ஆக உள்ள நிலையில், மொத்த விற்பனை விலை ரூ.134.50 ஆக நிர்ணயிக்கப்பட்டுள்ளது. இந்த விலை வேறுபாட்டை பயன்படுத்தி சில நிறுவனங்கள் சில்லறை நிலையங்களில் இருந்து அதிக அளவில் டீசலை வாங்கியதாக அரசு தெரிவித்துள்ளது. இதனைத் தடுக்கவும், பொதுமக்களுக்கு தேவையான எரிபொருள் தட்டுப்பாடு ஏற்படாமல் பாதுகாக்கவும் புதிய கட்டுப்பாடுகள் அமல்படுத்தப்பட்டுள்ளன.
அரசாணையின் படி, இந்த கட்டுப்பாடுகள் 90 நாட்கள் வரை அமலில் இருக்கும். சில்லறை பெட்ரோல் நிலையங்களில் டீசல் விற்பனை, வாகனங்களின் எரிபொருள் தொட்டிகளில் அல்லது பெட்ரோலியம் மற்றும் வெடிபொருள் பாதுகாப்பு அமைப்பு (PESO) அங்கீகரித்த கொள்கலன்களில் மட்டுமே மேற்கொள்ளப்பட வேண்டும். மேலும், ஒரு வாடிக்கையாளர் அல்லது ஒரு வாகனம் ஒரு நாளில் அதிகபட்சம் 200 லிட்டர் டீசல் மட்டுமே வாங்க அனுமதிக்கப்படும். வாங்கப்பட்ட எரிபொருளை மறுவிற்பனை செய்வதும் தடை செய்யப்பட்டுள்ளது.
இந்த நடவடிக்கைகள் மூலம் எரிபொருள் விநியோகத்தை ஒழுங்குபடுத்தவும், சில்லறை சந்தையில் செயற்கை பற்றாக்குறை ஏற்படுவதைத் தடுக்கவும், பொதுமக்கள் மற்றும் போக்குவரத்து துறையின் தேவைகளைப் பாதுகாக்கவும் மத்திய அரசு முயற்சி மேற்கொண்டுள்ளது.
