மேற்கு வங்கத்தில் நடைபெற்று வரும் சட்டமன்றத் தேர்தல் பல கட்டங்களாக நடைபெற்று வருகிறது. முதல் கட்டமாக கடந்த 23-ந்தேதி 152 தொகுதிகளில் வாக்குப்பதிவு நடைபெற்றது. அப்போது பெரும்பான்மையான இடங்களில் அமைதியான சூழல் நிலவியது. வழக்கமாக எதிர்பார்க்கப்படும் வன்முறை சம்பவங்கள், மோதல்கள் அல்லது வாக்கு இயந்திர சேதப்படுத்தல் போன்றவை மிகக் குறைவாகவே பதிவானது.
இதனால் எந்த வாக்குச்சாவடியிலும் மறுவாக்குப்பதிவு நடத்த வேண்டிய நிலை ஏற்படவில்லை. அடுத்து, இரண்டாம் கட்டமாக 142 தொகுதிகளுக்கான வாக்குப்பதிவு கடந்த 29-ந்தேதி நடைபெற்றது. ஆனால் இந்த கட்டத்தில் பல்வேறு குற்றச்சாட்டுகள் எழுந்தன. குறிப்பாக மின்னணு வாக்கு இயந்திரங்களில் முறைகேடு நடைபெற்றதாக எதிர்க்கட்சிகள் குற்றம்சாட்டின. மேலும் சில வாக்குச்சாவடிகளில் குறிப்பிட்ட கட்சியின் சின்னம் டேப் ஒட்டப்பட்டு மறைக்கப்பட்டதாகவும் புகார்கள் எழுந்தன.
இதனால் தேர்தல் செயல்முறையின் நம்பகத்தன்மை குறித்து கேள்விகள் எழுந்தன. இந்த புகார்களை தொடர்ந்து, இந்திய தேர்தல் ஆணையம் விசாரணை மேற்கொண்டு, இரண்டு தொகுதிகளுக்குட்பட்ட 15 வாக்குச்சாவடிகளில் மறுவாக்குப்பதிவு நடத்தப்படும் என்று அறிவித்தது. அதன்படி இன்று அந்த 15 வாக்குச்சாவடிகளில் மறுவாக்குப்பதிவு நடைபெற்று வருகிறது.
மகர்ஹாத் பாஸ்சிம் தொகுதியில் உள்ள 11 வாக்குச்சாவடிகளிலும், டைமண்ட் ஹார்பர் தொகுதியில் உள்ள 4 வாக்குச்சாவடிகளிலும் காலை 7 மணி முதல் மாலை 6 மணி வரை வாக்குப்பதிவு நடைபெறுகிறது. வாக்கு எண்ணிக்கை இன்னும் இரண்டு நாளில் நடைபெற உள்ள நிலையில், இந்த மறுவாக்குப்பதிவு தேர்தல் முடிவில் முக்கிய பாதிப்பை ஏற்படுத்தும் எனக் கருதப்படுகிறது.
