உலகமே உற்றுநோக்கும் மத்தி கிழக்கு பிராந்தியத்தில், மீண்டும் ஒரு மிகப்பெரிய போர் மூள்வதற்கான அறிகுறிகள் தென்படத் தொடங்கியுள்ளன. அமெரிக்கா மற்றும் ஈரான் இடையிலான போர் நிறுத்த ஒப்பந்தம் ஊசலாடிக் கொண்டிருக்கும் சூழலில், அமெரிக்கா தனது மூன்றாவது விமானம் தாங்கி போர்க்கப்பலான ‘யுஎஸ்எஸ் ஜார்ஜ் எச்.டபிள்யூ புஷ்’ கப்பலை இந்தியப் பெருங்கடல் பகுதிக்கு அனுப்பியுள்ளது.
ஏற்கனவே யுஎஸ்எஸ் ஜெரால்ட் ஃபோர்டு மற்றும் யுஎஸ்எஸ் ஆபிரகாம் லிங்கன் ஆகிய பிரம்மாண்ட போர்க்கப்பல்கள் அந்தப் பிராந்தியத்தில் முகாமிட்டுள்ள நிலையில், இப்போது அமெரிக்காவின் இந்த அதிரடி நடவடிக்கை ஈரானைச் சுற்றியுள்ள கடல் பகுதியை ஒரு போர்க்களமாக மாற்றியுள்ளது. ஹார்முஸ் ஜலசந்தி விவகாரத்தில் ராஜதந்திரப் பேச்சுவார்த்தைகள் தோல்வியைத் தழுவிக் கொண்டிருக்கும் நிலையில், ராணுவ பலத்தைக் கொண்டு ஈரானை ஒடுக்க அமெரிக்கா தயாராகி வருவதையே இது காட்டுகிறது.
மற்றொரு புறம், இஸ்ரேலிய பாதுகாப்பு அமைச்சர் இஸ்ரேல் காட்ஸ் விடுத்துள்ள எச்சரிக்கை உலக நாடுகளை அதிர்ச்சியில் ஆழ்த்தியுள்ளது. ஈரானின் மின்சாரம், எரிசக்தி மற்றும் தேசியப் பொருளாதாரக் கட்டமைப்புகளைத் தகர்த்து, அந்த நாட்டை மீண்டும் ‘கற்காலத்திற்கே’ கொண்டு செல்ல இஸ்ரேலிய ராணுவம் தயாராக இருப்பதாக அவர் கூறியுள்ளார்.
இதற்காக அமெரிக்காவிடமிருந்து ஒரு ‘பச்சை விளக்கு’ சிக்னலுக்காக இஸ்ரேல் காத்திருப்பதாகவும், தாக்குதலுக்கான இலக்குகள் ஏற்கனவே குறிவைக்கப்பட்டுவிட்டதாகவும் அவர் தனது அறிக்கையில் மிகத் தெளிவாகத் தெரிவித்துள்ளார். கமேனி வம்சத்தின் ஆட்சியை முடிவுக்குக் கொண்டு வருவதே தங்களின் முதல் இலக்கு என்றும் இஸ்ரேல் முழங்கியுள்ளது, இது மத்தி கிழக்கில் மீண்டும் ஒரு மிகப்பெரிய மோதல் வெடிக்கும் அபாயத்தை உறுதிப்படுத்தியுள்ளது.
ஈரானின் உள்ளேயும் நிலைமை தற்போது மிகவும் சிக்கலாகவும் மர்மமாகவும் உள்ளது. கடந்த பிப்ரவரி மாதத் தாக்குதலில் பலத்த காயமடைந்த ஈரானின் புதிய உச்ச தலைவர் மொஜ்தபா கமேனி, தற்போதைக்கு முக்கிய முடிவுகளை எடுக்கும் அதிகாரத்தை ஈரானிய புரட்சிகர பாதுகாப்புப் படையின் ஜெனரல்களிடம் ஒப்படைத்துள்ளதாகத் தகவல்கள் தெரிவிக்கின்றன.
மொஜ்தபா கமேனி பொதுவெளியில் தோன்றாமல் இருப்பது அவர் உயிருடன் இருக்கிறாரா என்ற சந்தேகத்தை ஒருபுறம் எழுப்பினாலும், ஈரானிய ராணுவம் தனது பிடியை மேலும் இறுக்கி வருகிறது. அமெரிக்காவின் இந்த ராணுவக் குவிப்பும், இஸ்ரேலின் மிரட்டலும், ஈரானின் ராணுவக் கட்டுப்பாடும் மத்தி கிழக்கை ஒரு வெடிமருந்து கிடங்காக மாற்றியுள்ளன. இது உலகப் பொருளாதாரத்திலும், கச்சா எண்ணெய் விலையிலும் எத்தகைய பாதிப்புகளை ஏற்படுத்தும் என்பதை சர்வதேச சமூகம் தற்போது அச்சத்துடன் கவனித்து வருகிறது.
