வெளிநாட்டு நிறுவனங்களின் பங்குகளில் முதலீடு செய்பவர்கள் கவனமாக இருக்க வேண்டிய ஒரு முக்கிய தகவல் வெளியாகியுள்ளது. Apple Inc., Tesla Inc. போன்ற நிறுவனங்களில் முதலீடு செய்து கிடைக்கும் வருமானத்தை வருமான வரி தாக்கல் செய்யும்போது தெரிவிக்காமல் இருந்தால், அது பெரிய அபராதத்திற்கு வழிவகுக்கும். குறிப்பாக, வருமானத்தை மறைத்ததாக கருதப்பட்டால் 200% வரை அபராதம் விதிக்கப்படும் அபாயம் உள்ளது.
இந்திய வரி விதிகளின்படி, நீங்கள் இந்திய குடியிருப்பாளராக இருந்தால், உங்கள் உலகளாவிய வருமானம் முழுவதும் வரிக்குட்படும். அதாவது, வெளிநாட்டில் இருந்து கிடைக்கும் ஈவுத்தொகை அல்லது பிற வருமானங்களையும் ITR-ல் கட்டாயமாக அறிவிக்க வேண்டும். பலர், அமெரிக்க நிறுவனங்கள் முன்பே சுமார் 25% வரியை கழித்து ஈவுத்தொகை வழங்குவதால், அதை மீண்டும் தெரிவிக்க தேவையில்லை என்று தவறாக நினைக்கிறார்கள். ஆனால் இது சரியான புரிதல் அல்ல. முழு வருமானத்தையும் அறிவித்த பிறகு, வெளிநாட்டு வரி கடன் (FTC) மூலம் இரட்டை வரிவிதிப்பை தவிர்க்கலாம்.
ITR தாக்கல் செய்யும் போது பலர் செய்யும் முக்கிய தவறு என்னவெனில், Schedule FA பகுதியில் வெளிநாட்டு சொத்துக்களை மட்டும் குறிப்பிடுவது; ஆனால் அதிலிருந்து கிடைக்கும் வருமானத்தை குறிப்பிடாமல் விடுவது. உண்மையில், Schedule FA என்பது சொத்து விவரங்களுக்கு மட்டும். அந்த சொத்துகளிலிருந்து கிடைக்கும் ஈவுத்தொகை போன்ற வருமானங்கள் “மற்ற ஆதாரங்களில் இருந்து வருமானம்” பகுதியில் சேர்க்கப்பட வேண்டும்.
இப்போது வருமான வரித்துறை மிகவும் மேம்பட்ட தொழில்நுட்பத்தை பயன்படுத்துகிறது. பல நாடுகளுடன் தகவல் பரிமாற்ற ஒப்பந்தங்கள் உள்ளதால், வெளிநாட்டு முதலீட்டு விவரங்கள் தானாகவே இந்திய வரித்துறைக்கு சென்றுவிடுகின்றன. உங்கள் ITR-ல் இந்த விவரங்கள் இல்லையெனில், அது “under-reporting” ஆக கருதப்பட்டு 50% முதல் 200% வரை அபராதம் விதிக்கப்படலாம்.
இந்த தவறு ஏற்கனவே நடந்திருந்தால் கூட, அதை சரி செய்ய இன்னும் வாய்ப்பு உள்ளது. “Updated ITR” தாக்கல் செய்து திருத்தலாம். இதற்கு 24 மாதங்கள் வரை கால அவகாசம் வழங்கப்பட்டுள்ளது. ஆனால் ஒரு ஆண்டுக்குள் திருத்தினால் 25% கூடுதல் வரியும், அதன் பின்னர் திருத்தினால் 50% கூடுதல் கட்டணமும் செலுத்த வேண்டும். எனவே, தரகு அறிக்கை, ஈவுத்தொகை அறிக்கை போன்றவற்றை சரியாக பராமரித்து, ITR தாக்கல் செய்யும் போது மிகுந்த கவனம் அவசியம்.
