அடுத்த ஆபத்து ரெடி! உலக நாடுகளின் கழுத்தை நெரிக்கும் ஈரான்!

மத்திய கிழக்கு போர்க்களத்தில் ஏற்கனவே ஹார்முஸ் ஜலசந்தி (Strait of Hormuz) மூடப்பட்டுள்ள நிலையில், இப்போது உலக நாடுகளின் வயிற்றில் புளியைக் கரைக்கும் விதமாக மற்றுமொரு அதிர்ச்சித் தகவல் வெளியாகியுள்ளது.

ஈரானுக்கு ஆதரவாக ஏமனில் உள்ள ஹவுதி (Houthi) கிளர்ச்சியாளர்கள், ஆசியாவையும் ஐரோப்பாவையும் இணைக்கும் மிக முக்கியமான ‘பாப் எல்-மண்டேப்’ (Bab el-Mandeb) ஜலசந்தியை மூடப்போவதாகப் பகிரங்க எச்சரிக்கை விடுத்துள்ளனர். அமெரிக்கா மற்றும் இஸ்ரேல் படைகள் ஈரானின் உச்சத் தலைவர் அலி கமேனியைத் தாக்கியதற்குப் பதிலடியாக, இந்த அதிரடி முடிவை எடுக்கத் தயாராகி வருவதாக ஹவுதி அமைப்பின் மூத்த தளபதி ஒருவர் தெரிவித்துள்ளார்.

ஈரானின் அதிகாரப்பூர்வ ஊடகமான ஃபார்ஸ் நியூஸ் (Fars News) வெளியிட்டுள்ள தகவலின்படி, ஈரானின் ஆதரவு பெற்ற அனைத்துப் போராட்டக் குழுக்களும் இப்போது போரில் குதிக்கத் தயாராக உள்ளன. இதில் ஹவுதிகளின் பங்கு மிக முக்கியமானது.

ஏமன் நாட்டின் எல்லையில் அமைந்துள்ள இந்தப் பாப் எல்-மண்டேப் ஜலசந்தி, வெறும் 29 கிலோமீட்டர் அகலம் கொண்ட ஒரு குறுகிய கடல் பாதையாகும். செங்கடலையும் (Red Sea), இந்தியப் பெருங்கடலையும் இணைக்கும் இந்தப் பாதை வழியாகத்தான், உலகப் புகழ்பெற்ற சூயஸ் கால்வாய்க்கு (Suez Canal) கப்பல்கள் செல்ல முடியும். ஒருவேளை இந்தப் பாதை மூடப்பட்டால், உலக வர்த்தகத்தின் இதயத் துடிப்பே நின்றுவிடும் என்று பொருளாதார நிபுணர்கள் எச்சரிக்கின்றனர்.

இந்தப் பாதையின் முக்கியத்துவம் என்னவென்றால், உலக வர்த்தகத்தில் சுமார் 12 சதவீதம் இந்தப் பாதை வழியாகத்தான் நடைபெறுகிறது. குறிப்பாக, நாளொன்றுக்கு சுமார் 88 லட்சம் பேரல் கச்சா எண்ணெய் மற்றும் இயற்கை எரிவாயு (LNG) இந்தப் பாதையைக் கடந்து செல்கின்றன.

இந்தப் பாதை முடக்கப்பட்டால், கப்பல்கள் ஆப்பிரிக்கக் கண்டத்தை முழுமையாகச் சுற்றி, நன்னம்பிக்கை முனை (Cape of Good Hope) வழியாகத்தான் செல்ல வேண்டியிருக்கும். இதனால் 20 நாட்களில் முடிய வேண்டிய பயணம் 40 நாட்களாக நீடிக்கும். இதன் விளைவாகக் கப்பல் வாடகை மற்றும் எரிபொருள் செலவு பலமடங்கு உயர்ந்து, உலகெங்கும் அத்தியாவசியப் பொருட்களின் விலை விண்ணைத் தொடக்கூடும்.

தற்போது வளைகுடா நாடுகளில் அமெரிக்கா மற்றும் இஸ்ரேல் படைகள் நடத்தி வரும் தாக்குதலால் ஏற்கனவே எண்ணெய் விலை 100 டாலரைத் தாண்டியுள்ளது. இந்தச் சூழலில், ஹவுதிகள் இந்தப் பாதையை மூடினால், ஒரு பேரல் எண்ணெய் 200 டாலர் வரை உயர வாய்ப்புள்ளதாக அஞ்சப்படுகிறது.

ஈரானின் மூன்று அடுக்கு போர் தந்திரத்தில் (Three-phase strategy) இந்தப் பாதை முடக்கம் ஒரு மிக முக்கியமான நகர்வாகும். அமெரிக்காவின் மிரட்டல்களை மீறி ஹவுதிகள் இந்தப் போரில் குதித்தால், அது சர்வதேசப் பொருளாதாரத்தில் ஒரு மிகப்பெரிய சுனாமியை ஏற்படுத்தும் என்பதில் சந்தேகமில்லை.