அக்வான் புயலின் பாதை என்ன? எப்போது, எங்கே கரையைக் கடக்கும்? சென்னை நிலை?

வங்கக்கடலில் நிலைகொண்டுள்ள ‘அக்வான்’ (Akvan) புயல் தீவிரப் புயலாக வலுப்பெற்றுள்ளதாக சென்னை வானிலை ஆய்வு மையம் தெரிவித்துள்ளது. இதனால் வட ஆந்திரப் பிரதேசம் மற்றும் தெற்கு ஒடிசா கடலோரப் பகுதிகளுக்கு எச்சரிக்கை விடுக்கப்பட்டுள்ளது.

தெற்கு வங்கக்கடலின் மத்தியப் பகுதிகளில் நிலவிய இந்தப் புயல் வடக்கு-வடமேற்கு திசையில் நகர்ந்து, இன்று (நவம்பர் 18) காலை 5.30 மணியளவில் தீவிரப் புயலாக வலுப்பெற்றது. தொடர்ந்து நகர்ந்து வரும் இந்தப் புயல் நவம்பர் 20-ம் தேதி நண்பகலில் நரசாபூர் மற்றும் பூரிக்கு இடையே வடக்கு ஆந்திரப் பிரதேசம், தெற்கு ஒடிசா கடற்கரைப் பகுதிகளில் கரையைக் கடக்கக்கூடும்.

அப்போது மணிக்கு 90 முதல் 100 கி.மீ வேகத்திலும், இடையிடையே 110 கி.மீ வேகத்திலும் பலத்த காற்று வீசக்கூடும் எனக் கணிக்கப்பட்டுள்ளது.

தமிழகத்தில் மழைக்கு வாய்ப்பா?

இன்று மற்றும் நாளை தென் தமிழகத்தின் மேற்கு தொடர்ச்சி மலைப் பகுதிகளில் ஓரிரு இடங்களில் லேசான மழை பெய்யக்கூடும். மற்ற பகுதிகளில் பொதுவாக வறண்ட வானிலை நிலவும்.

சென்னை மற்றும் புறநகர் பகுதிகளில் இன்று, நாளை வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 32 முதல் 33 டிகிரி செல்சியஸ் வரையிலும், குறைந்தபட்ச வெப்பநிலை 22 முதல் 23 டிகிரி செல்சியஸ் வரையிலும் இருக்கலாம்.

மேலும், வட தமிழக கடலோரப் பகுதிகளில் இன்று முதல் நவம்பர் 20-ம் தேதி வரை மணிக்கு 50 முதல் 60 கி.மீ வேகத்திலும், இடையிடையே 70 கி.மீ வேகத்திலும் சூறாவளிக் காற்று வீசக்கூடும் என வானிலை ஆய்வு மையம் எச்சரித்துள்ளது.

Related News

Latest News