இன்றைய பொருளாதார சூழ்நிலையில், எவ்வளவு சம்பாதித்தாலும் தேவைகளைச் சந்திப்பது பலருக்கும் சவாலாகியிருக்கிறது. இதனால், வருமானத்தில் ஒரு பகுதியை ஒதுக்கி சேமிப்பு செய்ய வேண்டும் என்ற விழிப்புணர்வு அதிகரித்துள்ளது. குறிப்பாக, நடுத்தர வர்க்க குடும்பங்களின் பெரிய கனவு ரூ.1 கோடியை உருவாக்குவது. சந்தை நிபுணர்கள் கூறுவதன்படி, சரியான திட்டமிடல் மற்றும் கட்டுப்பாடான முதலீட்டினால் இந்த இலக்கு சாதிக்கத்தக்கது. இதற்கு பல நிதி கருவிகள் உதவுகின்றன.
முதலில் பொது வருங்கால வைப்பு நிதி அதாவது PPF. இது அரசு உத்தரவாதம் பெற்ற பாதுகாப்பான திட்டமாகும். 7.1% வட்டி வழங்கும் இந்த திட்டத்தில் மாதம் ரூ.25,000 முதலீடு செய்தால் 17 ஆண்டுகளில் ரூ.1 கோடி பெறலாம். ஆனால் வருடாந்திர அதிகபட்ச வரம்பு ரூ.1.5 லட்சம் என்பதால், ஒருவரால் மாதம் ரூ.12,500 மட்டுமே செலுத்த முடியும். இதனால் கணவன்–மனைவி இருவரும் தலா கணக்குகளைத் தொடங்கி முதலீடு செய்தால் இலக்கை எளிதில் அடையலாம்.
அடுத்து PF: ஊழியர்களுக்கான நம்பகமான நீண்டகால சேமிப்பு திட்டம். தற்போது 8.25% வட்டி வழங்கப்படுகிறது. மாதம் ரூ.25,000 முதலீடு செய்தால் சுமார் 16 ஆண்டுகளில் ரூ.1 கோடி உருவாக்க முடியும். ஓய்வு கால நிதியாக இது பலரால் விரும்பப்படுகிறது.
அடுத்து NPS: 9% வரை வருமானம் தரக்கூடிய சந்தை சார்ந்த ஓய்வூதிய திட்டம். மாதாந்திர ரூ.25,000 முதலீட்டில் 15 ஆண்டுகளில் 1 கோடி உருவாக்கலாம். ஆனால் சந்தை அபாயம் உள்ளதால் இதில் கவனம் தேவை.
அடுத்து ஹைப்ரிட் மியூச்சுவல் ஃபண்டுகள்: ஈக்விட்டி–டெப்ட் கலவையாக அமைந்த இத்திட்டங்கள் 10% வரை வருமானம் தருகின்றன. மாதம் ரூ.25,000 முதலீட்டில் 14 ஆண்டுகளில் ரூ.1 கோடி பெற முடியும்.
அடுத்து ஈக்விட்டி மியூச்சுவல் ஃபண்டுகள்: அதிக அபாயம் இருந்தாலும், 15% வருமானம் தரும் திறன் உள்ளது. மாதாந்திர SIP மூலம் 12 ஆண்டுகளில் கோடி இலக்கை அடையலாம்.
இவை அனைத்தும் லாபகரமான திட்டங்களாக இருந்தாலும், முதலீடுகள் அனைத்தும் அபாயம் உடையவை என்பதால், நிபுணர் ஆலோசனை அவசியம்.
