இந்திய கிரிக்கெட் அணியில் ஒரு புதிய சர்ச்சைக்கு துவக்கமாயிருக்கிறது…
இந்தியா வெளிநாடுகளில் சுற்றுப்பயணம் செய்யும் நேரத்தில், வீரர்கள் தங்கள் குடும்பத்துடன் அதிக நாட்கள் தங்க முடியாத ஒரு புதிய கட்டுப்பாடு சமீபத்தில் அமலுக்கு வந்தது. இந்திய கிரிக்கெட் கட்டுப்பாட்டு வாரியமான – பிசிசிஐ – வெளியிட்டுள்ள இந்த புதிய விதி, அணித் தேர்வில் இல்லாத ஒரு பிரச்சனையை தற்போது உருவாக்கியுள்ளது.
அதன்படி, இனிமேல் எந்தவொரு வெளிநாட்டு தொடரிலும், வீரர்களின் மனைவியோ அல்லது 18 வயதுக்குள் உள்ள குழந்தைகளோ, ஒருமுறை மட்டுமே அணியுடன் சேர முடியும். அதுவும் அதிகபட்சம் 14 நாட்கள் – அதாவது இரண்டு வாரங்கள் தான் தங்க அனுமதி.
பிசிசிஐ இதை வீரர்களின் கவனத்தை கிரிக்கெட்டில் முழுமையாக வைத்திருக்க வேண்டும் என்பதற்காகவே மேற்கொண்டதாக கூறப்படுகிறது. ஆனால் இந்த புதிய முடிவு, சிலருக்கு கடும் அதிருப்தியை ஏற்படுத்தியிருக்கிறது. குறிப்பாக, விராட் கோலியை குறிவைத்தே இந்த விதி வந்ததா என்ற கேள்விகள் எழுந்துள்ளன.
பிசிசிஐ இந்த முடிவை எடுத்த காரணம்? வீரர்கள் தங்கள் முழு கவனத்தையும் கிரிக்கெட்டில் செலுத்தவேண்டும் என்பதே முக்கிய நோக்கம். ஆனால் இது எல்லோருக்கும் ஏற்றது இல்லை. குறிப்பாக விராட் கோலியின் ரசிகர்கள், இந்த விதி அவரையே குறிவைத்து செய்யப்பட்டதாகவே நம்புகிறார்கள்.
இப்போது இந்த புதிய விதிக்கு எதிராக தன் மனஉணர்வை வெளிப்படுத்தியுள்ளார் முன்னாள் வீரர் சுரேஷ் ரெய்னா. ஒரு நிகழ்ச்சியில் பேசும்போது அவர் கூறியது என்னவென்றால்– “வெளிநாட்டுப் பயணங்களில் குடும்பம் அருகில் இருப்பது மிக முக்கியம். குடும்ப ஆதரவு அவசியம்.
நான் கூட 2018-ல் தென்னாப்பிரிக்காவுக்கு எதிரான தொடரில், என் மனைவி அருகில் இல்லையென்றால், நானும் அந்தளவுக்கு சிறப்பாக ஆடி ஆட்டநாயகனாக இருந்திருக்க முடியாது.”
மேலும் ரெய்னா கூறியது என்னவென்றால், சர்வதேச போட்டிகளில் விளையாடும் வீரர்கள் நிரந்தர அழுத்தத்தில் உள்ளனர். அப்படி ஒரு சூழ்நிலையில், குடும்பம் அருகாமையில் இருப்பது ஒரு பெரிய ஆதரவாக இருக்கிறது.குறிப்பாக விராட் கோலி மகளின் முகத்தைப் பார்த்து கூட ஃபார்மை மீட்டிருக்கிறார் என்று அவர் சுட்டிக் காட்டுகிறார்.
இது போன்ற மனநிலை மற்றும் உணர்வு சார்ந்த ஆதரவுகளே ஒரு வீரரின் வெற்றிக்கு அடித்தளமாக அமைகின்றன. பிசிசிஐ விதிக்கு பலரின் ஆதரவு இருக்கலாம், ஆனால் ரெய்னா கூறுவது தான் உண்மை – வெறும் புள்ளிவிவரங்களால் மட்டும் கிரிக்கெட் வெற்றிகள் அமைந்து விடாது.