தமிழகத்தில் 10 மற்றும் 12-ஆம் வகுப்பு பொதுத்தேர்வுகளில் அதிக மதிப்பெண் பெற்ற மாணவ, மாணவிகளைத் தவெக சார்பில் ஆண்டுதோறும் கௌரவித்து வரும் கல்வி விருது வழங்கும் விழா, இந்த ஆண்டும் மிக பிரம்மாண்டமாக நடைபெறத் தயாராகி வருகிறது. கடந்த சில ஆண்டுகளாகத் தமிழகத்தின் 234 தொகுதிகளிலும் முதல் மூன்று இடங்களைப் பிடித்த மாணவர்களைத் தேடிப்பிடித்து, அவர்களுக்குச் சான்றிதழும் பண ஊக்கத்தொகையும் வழங்குவதை முதல்வர் விஜய் ஒரு வழக்கமாகவே வைத்துள்ளார்.
ஆனால், கடந்த ஆண்டுகளைப் போலக் கட்சித் தலைவராகவோ அல்லது நடிகராகவோ இல்லாமல், முதன்முறையாகத் தமிழ்நாட்டின் முதலமைச்சராக விஜய் இந்த மேடையில் மாணவர்களைச் சந்திக்கவிருப்பதுதான் இந்த ஆண்டின் மிக முக்கிய சிறப்பம்சமாகப் பார்க்கப்படுகிறது.
முதன்முதலில் கடந்த 2023-ஆம் ஆண்டு ஒரு நடிகராக விஜய் இந்த கல்வி விருது வழங்கும் விழாவைத் தொடங்கியபோது, அது அரசியல் வட்டாரத்தில் மிகப்பெரிய கவனத்தை ஈர்த்தது. அதனைத் தொடர்ந்து தவெக தொடங்கப்பட்ட பிறகு 2024-இல் திருவான்மியூரிலும், கடந்த 2025-ஆம் ஆண்டில் மாமல்லபுரத்திலும் பல கட்டங்களாக இந்த விழாக்கள் நடத்தப்பட்டன.
குறிப்பாக, கடந்த ஆண்டு மாற்றுத்திறனாளி மாணவர்கள் மற்றும் சமூகப் பிரச்சினைகளை எதிர்கொண்டு சாதித்த மாணவர்களுடன் விஜய் எடுத்துக்கொண்ட புகைப்படங்கள் சமூக வலைத்தளங்களில் வைரலாகப் பரவின. தற்போது 2026-ஆம் ஆண்டுக்கான பொதுத்தேர்வு முடிவுகள் வெளியாகியுள்ள நிலையில், இந்த ஆண்டிற்கான விழா எப்போது நடக்கும் என்ற எதிர்பார்ப்பு மாணவர்கள் மற்றும் பெற்றோர்கள் மத்தியில் எகிறியுள்ளது.
தற்போதைய நம்பத்தகுந்த தகவல்களின்படி, இந்த ஆண்டிற்கான தவெக கல்வி விருது வழங்கும் விழாவை வரும் ஜூன் மாதத்தின் முதல் இரண்டு வாரங்களுக்குள் நடத்தக் கட்சி நிர்வாகம் தீவிரமாகத் திட்டமிட்டு வருகிறது. இதற்கான இடத்தைத் தேர்வு செய்தல், பாதுகாப்புப் பணிகள் மற்றும் சாதனை மாணவர்களின் பட்டியலைத் தயாரிக்கும் பணிகளில் தவெக நிர்வாகிகள் மாவட்ட வாரியாகத் தீவிரமாக ஈடுபட்டுள்ளனர்.
இந்த முறை விஜய் முதலமைச்சர் அந்தஸ்தில் பங்கேற்க உள்ளதால், முந்தைய ஆண்டுகளை விடப் பாதுகாப்பு ஏற்பாடுகள் பல மடங்கு பலப்படுத்தப்பட உள்ளன. மேலும், மாணவர்கள் மற்றும் பெற்றோர்கள் அலைக்கழிக்கப்படுவதைத் தவிர்க்க, ஒரே கட்டமாகப் பிரம்மாண்ட விழாவாக நடத்தவும் ஆலோசிக்கப்பட்டு வருகிறது.
இந்த ஆண்டின் கல்வி விருது விழாவில் வழக்கமான சாதனை மாணவர்களுடன், அரசுப் பள்ளி மாணவர்கள், மாற்றுத்திறனாளி மாணவர்கள் மற்றும் கல்வியைத் தாண்டிப் பல்வேறு துறைகளில் அசத்திய இளம் திறமையாளர்களுக்கும் மேடையில் தனி கௌரவம் அளிக்கத் திட்டமிடப்பட்டுள்ளது.
முதலமைச்சராகப் பதவியேற்ற பிறகு கல்வித் துறை சார்ந்து மாணவர்களை விஜய் நேரில் சந்திக்கப்போகும் முதல் மாபெரும் பொது நிகழ்ச்சி இது என்பதால், ஒட்டுமொத்தத் தமிழக மக்களின் கவனமும் இப்போது இந்த விழாவை நோக்கியே திரும்பியுள்ளது. இதுகுறித்த அதிகாரப்பூர்வ தேதிகள் மற்றும் இடங்கள் குறித்த அறிவிப்பு தவெக தலைமை அலுவலகத்தில் இருந்து மிக விரைவில் வெளியாகும் என எதிர்பார்க்கப்படுகிறது.
