டிரம்ப் போடும் கணக்கு! சீனாவை வீழ்த்த இதுதான் கடைசி சான்ஸ்?

உலகமே உற்றுப் பார்த்துக் கொண்டிருந்த அந்த முக்கியமான சந்திப்பு, ஸ்டாக்ஹோமில் நடந்து முடிந்திருக்கிறது. ஒரு பக்கம் அமெரிக்கா… மறுபக்கம் சீனா. உலகின் இரண்டு மிகப்பெரிய பொருளாதார வல்லரசுகளும், தங்கள் வர்த்தகப் போருக்கு ஒரு முற்றுப்புள்ளி வைப்பதற்காக இரண்டு நாட்கள் பேச்சுவார்த்தை நடத்தின.

என்ன முடிவு எடுக்கப்பட்டது? போர் நின்றதா? அல்லது, இது புயலுக்கு முன் அமைதியா? இதன் பின்னணியில் இருக்கும் சிக்கல்களும், உலகப் பொருளாதாரத்திற்கு காத்திருக்கும் ஆபத்துகளும் என்ன? வாருங்கள், விரிவாக அலசுவோம்.

முதலில், இந்த பேச்சுவார்த்தையின் முடிவு என்ன என்று பார்ப்போம்.

வெற்றியுமில்லை… தோல்வியுமில்லை… இதுதான் தற்போதைய நிலைமை! ஸ்டாக்ஹோமில் நடந்த இந்த இரண்டு நாள் பேச்சுவார்த்தைக்குப் பிறகு, எந்த ஒரு பெரிய முன்னேற்றமும் அறிவிக்கப்படவில்லை. இது ஒரு தற்காலிக அமைதி மட்டுமே.

சீனாவின் வர்த்தகப் பிரதிநிதி லி செங்காங் என்ன சொல்லியிருக்கிறார் என்றால், “மே மாதம் முதல் அமலில் இருக்கும் 90 நாள் சண்டை நிறுத்தத்தை, மேலும் நீட்டிக்க இரு நாடுகளும் ஒப்புக்கொண்டிருக்கிறோம்” என்று.

ஆனால், இங்கேதான் ஒரு பெரிய ட்விஸ்ட் இருக்கிறது. இந்த சண்டை நிறுத்தம் எப்போது வரை நீடிக்கும்? என்னென்ன நிபந்தனைகள்? இது எதையுமே அவர்கள் சொல்லவில்லை.

ஏனென்றால், அந்த இறுதி முடிவை எடுக்கப் போவது ஒரே ஒரு நபர் தான்… அமெரிக்க அதிபர் டொனால்ட் டிரம்ப்!

ஆம், இந்த சண்டை நிறுத்தம் தொடருமா, அல்லது மீண்டும் வரிகள் அள்ளி வீசப்படுமா என்பதை டிரம்ப் தான் முடிவு செய்வார் என்று Bloomberg செய்தி நிறுவனம் கூறுகிறது. பல மாதங்களாக, உலக நாடுகள் மீது வரிகளை விதித்து வந்த டிரம்ப், ஐரோப்பிய யூனியன், ஜப்பான் போன்ற நாடுகளுடன் ஒப்பந்தங்களை முடித்துவிட்டார். ஆனால், சீனாவுடனான பேச்சுவார்த்தை மட்டும் அவருக்கு மிகப்பெரிய சவாலாக இருக்கிறது.

ஏன் சீனா மட்டும் இவ்வளவு பெரிய சவால்?

காரணம், சீனாவின் பொருளாதார பலம். குறிப்பாக, “அரிய மண் தாதுக்கள்” (Rare Earth Minerals). உங்கள் செல்போன், லேப்டாப், ஏன்… போர் விமானங்கள் வரை அனைத்தையும் கட்டுப்படுத்தும் இந்த உயிர்நாடியான கனிமங்களின் ரிமோட் கண்ட்ரோல், சீனாவின் கைகளில் இருக்கிறது. இந்த ஒற்றை ஆயுதத்தை வைத்துத்தான், சீனா உலக நாடுகளைத் தனது கட்டுப்பாட்டில் வைத்திருக்கிறது.

இந்த பேச்சுவார்த்தையில், அமெரிக்கா தனது கவலைகளை மிகத் தெளிவாகப் பதிவு செய்திருக்கிறது. அமெரிக்க கருவூல செயலாளர் ஸ்காட் பெசென்ட் மூன்று முக்கிய குற்றச்சாட்டுகளை முன்வைத்தார்:

குற்றச்சாட்டு ஒன்று: சீனா, உலக நாடுகளின் தடையை மீறி, ஈரான் நாட்டிலிருந்து எண்ணெய் வாங்குகிறது.

குற்றச்சாட்டு இரண்டு: ரஷ்யாவுக்கு, ராணுவத் தேவைகளுக்குப் பயன்படுத்தக்கூடிய இரட்டைப் பயன்பாட்டு தொழில்நுட்பத்தை (Dual-use technology) சீனா வழங்கி வருகிறது.

குற்றச்சாட்டு மூன்று: தேவைக்கு அதிகமாகப் பொருட்களை உற்பத்தி செய்து, உலக சந்தையில் கொட்டி, மற்ற நாடுகளின் பொருளாதாரத்தைச் சீர்குலைப்பது.

இப்போது,அமெரிக்காவின் இலக்கு என்ன? “சீனாவின் பிடியிலிருந்து, அரிய மண் தாதுக்கள், செமிகண்டக்டர்கள், மருந்துகள் போன்ற முக்கியமான துறைகளை விடுவித்து, ஆபத்தைக் குறைப்பதுதான் அது (De-risking)” என்று அமெரிக்கா திட்டவட்டமாகத் தெரிவித்திருக்கிறது.

இந்த மோதல், வெறும் அமெரிக்கா, சீனாவின் பிரச்சினை அல்ல. இது நம் அனைவரின் பிரச்சினை.

சர்வதேச நாணய நிதியம் (IMF), இது குறித்து ஒரு கடுமையான எச்சரிக்கையை விடுத்திருக்கிறது. “உலகப் பொருளாதாரம் சற்று வளர்ந்திருந்தாலும், இந்த வர்த்தகப் போர் மீண்டும் வெடித்தால், அது உலகப் பொருளாதார ஸ்திரத்தன்மைக்கு மிகப்பெரிய அச்சுறுத்தலாக மாறும்” என்று IMF எச்சரித்துள்ளது.

ஒப்பந்தம் இல்லாமல் போனால், உலகளாவிய விநியோகச் சங்கிலிகள், அதாவது Global Supply Chains மீண்டும் பாதிக்கப்பட்டு, நிதிச் சந்தைகளில் ஒரு பெரிய குழப்பம் ஏற்படும்.

ஆக, இப்போது பந்து, டிரம்ப் அவர்களின் கைகளில் இருக்கிறது.

ஸ்டாக்ஹோமில் நடந்திருப்பது ஒரு தற்காலிக சமாதானம் மட்டுமே. இரண்டு ராட்சதப் புலிகள், தங்கள் சண்டையைச் சற்று நிறுத்தி வைத்து, அடுத்த பாய்ச்சலுக்குத் தயாராகி வருகின்றன.

டிரம்ப், சீனாவின் கோரிக்கைகளுக்குச் செவிசாய்த்து, இந்த சண்டை நிறுத்தத்தை நீட்டிப்பாரா? அல்லது, தன் பாணியில், மீண்டும் வரிகளை உயர்த்தி, இந்த வர்த்தகப் போரை அடுத்த கட்டத்திற்குக் கொண்டு செல்வாரா?

இப்போது நம் முன்னிருக்கும் மிகப்பெரிய கேள்விகள்,

இந்த உலகின் இரண்டு பெரிய பொருளாதார சக்திகளின் மோதலில், இறுதியில் வெல்லப் போவது யார்? டிரம்ப்பின் அடுத்த மூவ் என்னவாக இருக்கும்?.

இந்தக் கேள்விகளுக்கெள்ளாம் விடைகளை பொறுத்திருந்து தான் பார்க்க வேண்டும்.