உக்ரைன் போர் முடிவுக்கு வராத நிலையில், ரஷ்யா மீது அடுத்தகட்ட தாக்குதலுக்குத் தயாராகிவிட்டது அமெரிக்கா. இது ராணுவத் தாக்குதல் அல்ல, பொருளாதாரத் தாக்குதல்.
ரஷ்யா மீது “இரண்டாம் கட்டத் தடைகளை” விதிக்கத் தயார் என்று அமெரிக்க அதிபர் டொனால்ட் டிரம்ப் நேரடியாகவே அறிவித்துள்ளார். இந்த முறை, ரஷ்யாவுக்கு உதவுவதாகக் கருதப்படும் இந்தியா, சீனா போன்ற நாடுகளும் குறிவைக்கப்பட்டுள்ளன.
அமெரிக்காவின் இந்த புதிய மூவினால் உலகப் பொருளாதாரத்தில் என்னென்ன மாற்றங்கள் வரும்? இந்தியாவுக்கு என்ன பாதிப்பு? வாங்க, முழுமையாகப் பார்க்கலாம்.
அமெரிக்க ஓபன் இறுதிப் போட்டிக்குச் சென்றபோது, நிருபர்கள் டிரம்ப் இடம், “ரஷ்யா மீது இன்னும் கடுமையான நடவடிக்கை எடுப்பீர்களா?” என்று கேட்டனர். அதற்கு அவர், “ஆம், நான் தயாராக இருக்கிறேன்” என்று ஒரே வரியில் பதில் சொல்லி, உலக அரசியலில் பெரும் புயலைக் கிளப்பியுள்ளார்.
டிரம்பின் இந்தக் கருத்துக்கு வலு சேர்க்கும் விதமாக, அமெரிக்காவின் நிதி அமைச்சர் ஸ்காட் பெசென்ட் ஒரு முக்கியமான விஷயத்தைச் சொல்லியிருக்கிறார்.
அவர் சொல்வது இதுதான்: “அமெரிக்காவும், ஐரோப்பிய யூனியனும் சேர்ந்து, ரஷ்யாவிடம் இருந்து எண்ணெய் வாங்கும் நாடுகள் மீது கூடுதல் தடைகளையும், இரண்டாம் நிலை வரிகளையும் விதித்தால், ரஷ்யாவின் பொருளாதாரம் முற்றிலுமாகச் சரிந்துவிடும். அது, ரஷ்ய அதிபர் புடினை பேச்சுவார்த்தை மேசைக்கு இழுத்து வரும்.”
அதாவது, ரஷ்யாவை நேரடியாகத் தண்டிப்பதை விட, ரஷ்யாவுடன் வர்த்தகம் செய்யும் நாடுகளைத் தண்டிப்பதன் மூலம், ரஷ்யாவை மடக்கப் பார்க்கிறது அமெரிக்கா.
அமெரிக்க நிதி அமைச்சர், இந்தியாவையும் சீனாவையும் நேரடியாகவே விமர்சித்துள்ளார். ரஷ்யாவிடம் இருந்து தொடர்ந்து எண்ணெய் வாங்குவதன் மூலம், இந்த நாடுகள் மாஸ்கோவின் போர் இயந்திரத்தை முட்டுக் கொடுக்கும் “மோசமான நடிகர்கள்” என்றும் அவர் கடுமையாகச் சாடியுள்ளார்.
ரஷ்யாவின் எண்ணெயை தொடர்ந்து வாங்குவதற்காக இந்தியாவையும் சீனாவையும் விமர்சித்து வரும் பெசென்ட், என்று விவரித்தார்.
ஏற்கனவே, ரஷ்யாவிடம் இருந்து எண்ணெய் வாங்கியதற்காக, இந்தியா மீது 50% அதிக வரிகளை அமெரிக்கா விதித்துள்ளது. இப்போது, இன்னும் கடுமையான தடைகளை விதிக்க அவர்கள் தயாராகி வருகிறார்கள்.
ஆனால், அமெரிக்காவின் இந்தக் குற்றச்சாட்டுக்கு இந்தியா மிகக் கடுமையாகப் பதிலடி கொடுத்துள்ளது.
“இது மேற்குலக நாடுகளின் அப்பட்டமான பாசாங்குத்தனம்” என்று இந்தியா கூறியுள்ளது.
இந்தியாவின் வாதம் இதுதான்: “பல ஐரோப்பிய நாடுகள், எங்களிடம் வாங்குவதை விட அதிக அளவில் ரஷ்யாவிடம் இருந்து எரிசக்தியை வாங்கிக்கொண்டு இருக்கின்றன. அவர்கள் மீது எந்தத் தடையும் விதிக்கப்படவில்லை. ஆனால், எங்கள் மீது மட்டும் ஏன் இந்த நடவடிக்கை?” என்று இந்தியா கேள்வி எழுப்பியுள்ளது.
டிரம்பின் அடுத்தகட்ட நடவடிக்கைகள், ஐரோப்பிய யூனியனின் முடிவைப் பொறுத்துதான் இருக்கும். அமெரிக்காவின் இந்த கடுமையான நிலைப்பாட்டிற்கு ஐரோப்பா ஆதரவு கொடுத்தால், ரஷ்யாவின் பொருளாதாரம் மேலும் தனிமைப்படுத்தப்படும். இந்தியா போன்ற நாடுகள் மீது அழுத்தம் அதிகரிக்கும்.
ஒரு நாட்டின் மீது போர் தொடுப்பதற்காக, மற்ற நாடுகளின் வர்த்தக சுதந்திரத்தைப் பாதிப்பது சரியா? என்ற கேள்வி உலகளவில் எழுந்துள்ளது.