பாகிஸ்தானின் ராவல்பிண்டியில் அமைந்துள்ள நூர் கான் விமானத் தளம் தற்போது பல சர்ச்சைகளை எழுப்பியுள்ளது. காரணம், இந்த விமானத் தளம் அமெரிக்காவின் கட்டுப்பாட்டில் இருப்பதாக பாகிஸ்தான் பாதுகாப்பு நிபுணர் இம்தியாஸ் குல் கூறியதுதான். இந்தக் குற்றச்சாட்டால், நாட்டின் இறையாண்மை குறித்து பல்வேறு கேள்விகள் எழுந்துள்ளன.
அமெரிக்க விமானங்கள் நூர் கான் தளத்தில் அடிக்கடி வருகை தருவதாகவும், அவற்றின் செயல்பாடுகள் பற்றி எந்த தகவலும் பாகிஸ்தான் ராணுவத்திடம் இல்லை என்றும் குல் தெரிவித்துள்ளார். அதேசமயம், பாகிஸ்தானின் மூத்த இராணுவ அதிகாரிகளே அந்த தளத்தில் தலையிட அனுமதிக்கப்படவில்லை என்ற உண்மையும் அதிர்ச்சியை ஏற்படுத்தியுள்ளது.
இந்த விமானத் தளம் வெறும் ராணுவத்தளம் மட்டும் இல்லை. இஸ்லாமாபாத் மற்றும் ராவல்பிண்டிக்கு அருகாமையில் அமைந்துள்ள இதன் பசுமை வட்டத்தில் பாகிஸ்தானின் முக்கிய ராணுவ தலைமையகம், அணு ஆயுத திட்டக் கட்டுப்பாட்டுப் பகுதி போன்றவை உள்ளன. எனவே இத்தளம் மூலோபாய ரீதியாக மிக முக்கியமான இடமாக கருதப்படுகிறது.
2019-ல் நடந்த புல்வாமா தாக்குதலுக்குப் பதிலாக இந்தியா நடத்திய ‘ஆபரேஷன் சிந்தூரில், நூர் கான் விமானத் தளமே நேரடியாக இலக்காக தாக்கப்பட்டது. இந்த தாக்குதல் பிராந்திய பாதுகாப்பு விவகாரங்களில் இந்த விமானத் தளத்தின் முக்கியத்துவத்தைத் தெளிவுபடுத்தியது.
இந்நிலையில், பாகிஸ்தானின் முக்கிய ராணுவத் தளம் அமெரிக்காவின் கட்டுப்பாட்டில் இருக்கிறதா என்ற சந்தேகம், அந்த நாட்டின் உள்நாட்டுப் பாதுகாப்பு மற்றும் தன்னாட்சிக்கே பெரும் சவாலாக மாறியுள்ளது.
இதுவரை பாகிஸ்தான் அரசு அல்லது இராணுவம், இம்தியாஸ் குல் கூறிய குற்றச்சாட்டுக்கு எந்த அதிகாரப்பூர்வ விளக்கமும் தரவில்லை. ஆனால், இந்த விவகாரம் தங்களது உள்கட்டமைப்புகளில் வெளிநாட்டினரின் தாக்கம் எவ்வளவு ஆழமாய் ஊடுருவியிருக்கிறது என்பதைக் காட்டுகிறது.
இது ஒரு நாடு எனும் அடையாளத்தைப் பாதிக்கும் வகையில் உள்ளதால், இது குறித்து விரைவில் தெளிவான பதில் எதிர்பார்க்கப்படுகிறது.