உலக வரைபடத்தில் தனித்து விடப்பட்டிருந்த வட கொரியா, இப்போது தனி ஆள் இல்லை! சீனா, ரஷ்யா, வியட்நாம் போன்ற நாடுகளின் தலைவர்களை ஒரே மேடையில் ஏற்றி, ஒரு பிரம்மாண்டமான பவர் ஷோ நடத்தியுள்ளார் அதிபர் கிம் ஜாங் உன்.
கடந்த வெள்ளிக்கிழமை, வட கொரியாவின் ஆளும் தொழிலாளர் கட்சியின் 80-வது ஆண்டு விழாவில், இந்த மெகா கூட்டணி அரங்கேறியுள்ளது. சீன அதிகாரியான சீனப் பிரதமர் லி கியாங்; முன்னாள் ஜனாதிபதி டிமிட்ரி மெட்வெடேவ் தலைமையிலான ரஷ்யக் குழு, வியட்நாமின் கம்யூனிஸ்ட் கட்சித் தலைவர் டோ லாம்; மற்றும் லாவோஸ் ஜனாதிபதி தோங்லோன் சிசோலித் என முக்கிய விருந்தினர்களை வரவேற்ற கிம், இதன் மூலம் உலகிற்கு ஒரு வலுவான செய்தியைச் சொல்லியுள்ளார்: “நான் இனி தனிமையில் இல்லை. மேற்கு நாடுகளுக்கு எதிராக ஒரு புதிய கூட்டணி உருவாகிவிட்டது.”
இந்த அணிவகுப்பில், அமெரிக்காவைத் தாக்கும் திறன் கொண்ட ‘Hwasong-20’ என்ற புதிய கண்டம் விட்டு கண்டம் பாயும் ஏவுகணையையும் வட கொரியா காட்சிப்படுத்தியது. மேலும், உக்ரைன் போரில் ரஷ்யா பயன்படுத்திய அதே வகை ஆயுதங்களும் இங்கு அணிவகுத்து நின்றன. இது, ரஷ்யாவுக்கும் வட கொரியாவுக்கும் இடையிலான ஆழமான ராணுவ உறவை அப்பட்டமாக வெளிக்காட்டியது.
பல வருடத் தடைகள் மற்றும் தனிமைப்படுத்தலுக்குப் பிறகு, கிம் இப்போது உலக அரங்கில் தன்னை மீண்டும் நிலைநிறுத்திக் கொள்கிறார். உக்ரைன் போர், அமெரிக்கா-சீனா மோதல் போன்ற உலகளாவிய அதிகார மாற்றங்கள், கிம்முக்கு புதிய வாய்ப்புகளை வழங்கியுள்ளன. சமீபத்தில், அதிபர் டிரம்பை மீண்டும் சந்திக்கத் தயார் என்றும் அவர் கூறியுள்ளார். கிம் ஜாங் உன்னின் இந்த புதிய ராஜதந்திர ஆட்டம், உலக அரசியலில் பெரும் அதிர்வலைகளை ஏற்படுத்தியுள்ளது.
