” இந்த அளவு ஆதரவை பார்த்து பல ஆண்டுகளாகிறது” – நாஞ்சில் சம்பத்

தமிழகத்தில் 234 சட்டசபை தொகுதிகளுக்கான தேர்தல் கடந்த மாதம் ஏப்ரல் 23ஆம் தேதி ஒரே கட்டமாக நடைபெற்றது. தேர்தலில் பதிவான வாக்குகள் இன்று காலை 8 மணி முதல் எண்ணப்பட்டு வருகின்றன. வழக்கம்போல் முதலில் தபால் வாக்குகள் எண்ணப்பட்டு, பின்னர் மின்னணு வாக்குப்பதிவு எந்திரங்களில் பதிவான வாக்குகள் கணக்கிடப்பட்டு வருகின்றன.

தற்போதைய நிலவரப்படி, மொத்தம் உள்ள 234 தொகுதிகளில் 106 தொகுதிகளில் தமிழக வெற்றிக் கழகம் (தவெக) முன்னிலையில் உள்ளது. இந்த முன்னிலை, மாநில அரசியலில் முக்கிய மாற்றத்தைக் குறிக்கிறது. நீண்டகாலமாக ஆதிக்கம் செலுத்தி வந்த திராவிடக் கட்சிகளுக்கு மாற்றாக தவெக உருவெடுத்து வருவது அரசியல் வட்டாரங்களில் கவனத்தை ஈர்த்துள்ளது.

இந்நிலையில், தவெக பிரசார செயலாளர் நாஞ்சில் சம்பத் செய்தியாளர்களுக்கு பேட்டி அளித்தார். அப்போது அவர் கூறியதாவது: “திராவிடக் கட்சிகளுக்கு மாற்றாக தவெக பெற்றுள்ளது ஒரு வரலாற்று வெற்றி. தமிழக மக்களிடம் இவ்வாறான எழுச்சியை நான் இதுவரை பார்த்ததில்லை. ஒரு புதிய கட்சிக்கு இந்த அளவு அன்பும் ஆதரவும் கிடைப்பது பல ஆண்டுகளுக்குப் பிறகே நடைபெறுகிறது” என்று தெரிவித்தார்.

மேலும், மக்கள் மாற்றத்தை விரும்பி இந்தத் தேர்தலில் வாக்களித்துள்ளதாகவும், அந்த எதிர்பார்ப்பை நிறைவேற்ற தவெக செயல்படும் என்றும் அவர் நம்பிக்கை தெரிவித்துள்ளார்.

தற்போதைய சூழலில் தவெக தொடர்ந்து முன்னிலை வகித்து வருவதால், இறுதி முடிவுகள் வெளியாகும் வரை அரசியல் சூழல் பரபரப்பாகவே இருக்கும் என எதிர்பார்க்கப்படுகிறது. மக்களின் தீர்ப்பு எந்தக் கட்சிக்கு ஆட்சியை வழங்கும் என்பது விரைவில் தெளிவாகும்.