மத்திய அரசு ஊழியர்களுக்கு அகவிலைப்படி (Dearness Allowance – DA) 2% உயரலாம் என்ற எதிர்பார்ப்பு அதிகரித்துள்ளது. டிசம்பர் 2025 மாதத்திற்கான அகில இந்திய தொழிலாளர் நுகர்வோர் விலை குறியீட்டு (AICPI-IW) 148.2 ஆக வெளியிடப்பட்டுள்ளதால், தற்போது 58% ஆக உள்ள DA 60% ஆக உயரக்கூடும் என கணிக்கப்படுகிறது. தமிழ்நாடு உள்ளிட்ட நாடு முழுவதும் உள்ள லட்சக்கணக்கான மத்திய அரசு ஊழியர்கள் இந்த உயர்வை ஆவலுடன் எதிர்பார்த்து வருகின்றனர்.
பொதுவாக மத்திய அரசு அகவிலைப்படியை ஆண்டுக்கு இரண்டு முறை அறிவிக்கும். இந்த அறிவிப்புகள் பெரும்பாலும் முக்கிய பண்டிகைகளுக்கு முன்பாக வெளியாகும். குறிப்பாக ஹோலி மற்றும் தீபாவளி பண்டிகைகளை முன்னிட்டு அறிவிப்புகள் வெளியிடப்பட்டுள்ளன. 2026ஆம் ஆண்டு மார்ச் 3ஆம் தேதி ஹோலி வருவதால், அதற்கு முன் DA உயர்வு குறித்த அறிவிப்பு வெளியாகும் என்று ஊழியர்கள் நம்புகின்றனர்.
மத்திய அரசு DA-வை ஜனவரி மற்றும் ஜூலை மாதங்களில் உயர்த்தினாலும், அறிவிப்பு அவ்வமாதங்களில் அவசியம் வருவது இல்லை. உதாரணமாக, 2025ஆம் ஆண்டு ஹோலி மார்ச் 14ஆம் தேதி இருந்தபோதிலும், DA அறிவிப்பு மார்ச் 28ஆம் தேதி வெளியிடப்பட்டது. அதே ஆண்டில் இரண்டாவது DA உயர்வு அக்டோபர் 1ஆம் தேதி, தீபாவளிக்கு முன் அறிவிக்கப்பட்டது. இந்த ஆண்டும் ஊழியர் சங்கத் தலைவர்கள் ஹோலிக்கு முன் அறிவிப்பு வரும் என எதிர்பார்க்கின்றனர். இருப்பினும், அதிகாரப்பூர்வ அரசு ஆணை வெளியாகும் வரை உறுதியான தகவல் கிடையாது.
அகவிலைப்படி என்பது விலைவாசி உயர்வை சமாளிக்க அரசு ஊழியர்களுக்கு வழங்கப்படும் கூடுதல் தொகையாகும். ஊழியர்களின் அடிப்படை சம்பளம் ஊதியக் குழுவின் பரிந்துரைகளின் அடிப்படையில் நிர்ணயிக்கப்படுகிறது. DA ஆறு மாதங்களுக்கு ஒருமுறை உயர்த்தப்படுகிறது.
உதாரணமாக, ஒரு அரசு ஊழியரின் அடிப்படை சம்பளம் ரூ.18,000 என்றால், தற்போதைய 58% DA அடிப்படையில் ரூ.10,440 கிடைக்கும். இதனால் மொத்த சம்பளம் ரூ.28,440 ஆகும். DA 60% ஆக உயர்ந்தால் ரூ.10,800 கிடைக்கும். இதனால் மொத்த சம்பளமும் அதிகரிக்கும். DA-க்கு கூடுதலாக வீட்டு வாடகை கொடுப்பனவு (HRA), ஆண்டுதோறும் 3% உயர்வு மற்றும் பிற சலுகைகளும் வழங்கப்படுகின்றன.
அடிப்படை சம்பளம் தற்போது மாற்றமடையாது. 7வது ஊதியக் கமிஷன் 2025 டிசம்பரில் முடிவடைந்துள்ளது. 8வது ஊதியக் கமிஷன் அமைக்கப்பட்டு நடைமுறைக்கு வருவதற்கு ஒரு ஆண்டிற்கும் மேலாக நேரம் ஆகலாம். அதுவரை அடிப்படை சம்பளத்தில் மாற்றம் இருக்காது. எனவே, DA உயர்வே விலைவாசி உயர்வை சமாளிக்க முக்கிய ஆதாரமாக இருக்கும்.
DA கணக்கீடு பணவீக்கத் தரவுகளின் அடிப்படையில் செய்யப்படுகிறது. AICPI-IW குறியீட்டின் 12 மாத சராசரி மதிப்பை பயன்படுத்தி, உணவு, உடை, போக்குவரத்து உள்ளிட்ட அன்றாடப் பொருட்களின் விலை மாற்றங்கள் கணக்கிடப்படுகின்றன. பணவீக்கம் அதிகரித்தால் DA உயர்வு அதிகமாக இருக்கும்; குறைந்தால் உயர்வு குறையும்.
மொத்தத்தில், 2% DA உயர்வு மத்திய அரசு ஊழியர்களுக்கு முக்கிய நிவாரணமாக இருக்கும். பணவீக்கச் சுமையை குறைக்க இது உதவும். தற்போது அனைவரும் அரசின் அதிகாரப்பூர்வ அறிவிப்பை எதிர்பார்த்து காத்திருக்கின்றனர்.
