லோகேஷ் கனகராஜ் இயக்கத்தில் ரஜினி நடிப்பில் வெளியான படம் ‘கூலி’. சன் பிக்சர்ஸ் தயாரித்து, ஆகஸ்ட் 14-ம் தேதி உலகமெங்கும் வெளியானது. இப்படத்திற்கு கலவையான விமர்சனம் கிடைத்ததால் படத்தின் வசூல் நாளுக்கு நாள் குறைய தொடங்கியது.
இதனிடையே ‘கூலி’ படத்தின் வெளிநாட்டு உரிமையினைக் கைப்பற்றிய ஹம்சினி நிறுவனம் அறிக்கை ஒன்றினை வெளியிட்டுள்ளது. அதில் “‘கூலி’ படத்தின் உலகளாவிய வசூல் தொடர்பாக வெறுப்புணர்வுடன் சில குழுக்களும், அதிகாரபூர்வமற்ற பக்கங்களும் போலியான வசூல் நிலவரங்களை பரப்பி வருகிறார்கள். இந்த தவறான வசூல் நிலவரங்கள் மூலம் குழப்பத்தை ஏற்படுத்தி வருவதாக தெரியவந்துள்ளது.
தயாரிப்பாளரும், ஹம்சினி நிறுவனமும் மட்டுமே அதிகாரபூர்வமான வசூல் நிலவரங்களை வெளியிடுவோம். இணையத்தில் பரவி வரும் பிற வசூல் நிலவரங்கள் நம்பகமற்றவை. அவற்றை உண்மையானவை என ஏற்க முடியாது. ‘கூலி’ வசூல் குறித்து போலி தகவல்களை வெளியிடுபவர்களுக்கு எதிராக சட்ட நடவடிக்கை எடுக்கப்படும் என தெரிவித்துள்ளது.