உலக நாடுகளின் எரிசக்தித் தேவையில் ஒரு மிகப்பெரிய உயிர்நாடியாக விளங்குவது ஹார்முஸ் ஜலசந்தி. உலகெங்கிலும் பயன்படுத்தப்படும் கச்சா எண்ணெயில் சுமார் 25 சதவீதம் இந்தப் குறுகிய கடல் பாதை வழியாகத்தான் கொண்டு செல்லப்படுகிறது. ஆனால், கடந்த பிப்ரவரி 28-ம் தேதி தொடங்கிய அமெரிக்கா – இஸ்ரேல் மற்றும் ஈரான் இடையேயான போர் காரணமாக, இந்தப் பகுதி இப்போது ஒரு மிகப்பெரிய போர்க்களமாக மாறியுள்ளது. அமெரிக்காவின் கடல்வழி முற்றுகைக்குப் பதிலடியாக, ஈரான் இந்தப் பாதையை அடிக்கடி மூடி வருவதால், நூற்றுக்கணக்கான எண்ணெய் டேங்கர் கப்பல்கள் நடுக்கடலில் தவித்து வருகின்றன. இந்த இக்கட்டான சூழலில்தான், உலகப் பொருளாதாரத்தையே ஆட்டிப்படைக்கும் இந்த ஆயில் சிக்கலுக்கு ஒரு புதிய தீர்வை ஈராக் மற்றும் சிரியா நாடுகள் முன்வைத்துள்ளன.
கடந்த பத்து ஆண்டுகளுக்கும் மேலாக மூடிக்கிடந்த ஈராக் மற்றும் சிரியா நாடுகளுக்கு இடையேயான மிக முக்கியமான எல்லைக் கடப்பான ‘ரபியா – யருபியா’ (Rabia-Yarubiyah) பாதை இப்போது மீண்டும் திறக்கப்பட்டுள்ளது. கடந்த 2011-ம் ஆண்டு சிரியாவில் உள்நாட்டுப் போர் தொடங்கியபோது மூடப்பட்ட இந்தப் பாதை, பின்னர் ஐஎஸ்ஐஎஸ் (ISIS) பயங்கரவாதிகளின் பிடியில் சிக்கியது. பல போராட்டங்களுக்குப் பிறகு மீட்டெடுக்கப்பட்ட இந்த எல்லையை, இப்போது ஹார்முஸ் ஜலசந்திக்கு ஒரு மாற்றாக மாற்ற அந்த நாடுகள் திட்டமிட்டுள்ளன. நடுக்கடலில் ஈரானின் பிடியில் சிக்கித் தவிப்பதற்குப் பதிலாக, நிலப்பரப்பு வழியாகக் கச்சா எண்ணெயைக் கொண்டு செல்லும் ஒரு புதிய “ஆயில் லைஃப்லைனை” (Oil Lifeline) இந்தப் பாதை உருவாக்கும் என்று சிரியா மற்றும் ஈராக் அதிகாரிகள் நம்பிக்கையுடன் தெரிவிக்கின்றனர்.
திங்கட்கிழமை நடைபெற்ற இதற்கான தொடக்க விழாவில் பேசிய ஈராக் அதிகாரிகள், இந்தப் பாதை வர்த்தகப் பரிமாற்றத்திற்கும், எண்ணெய் போக்குவரத்திற்கும் ஒரு மிகப்பெரிய நுழைவாயிலாக அமையும் என்று தெரிவித்துள்ளனர். வழக்கமாகப் பிரம்மாண்டக் கப்பல்கள் மற்றும் குழாய்கள் மூலம் எண்ணெய் கொண்டு செல்வதை விட, நிலப்பரப்பு வழியாக லாரிகள் மூலம் கொண்டு செல்வது சற்றுச் சவாலானது என்றாலும், ஹார்முஸ் ஜலசந்தி மூடப்பட்டுள்ள இந்த நேரத்தில் இது ஒரு மிகச்சிறந்த மாற்று வழியாகப் பார்க்கப்படுகிறது. சவுதி அரேபியா தனது ‘நியோ’ (NEOM) திட்டத்தின் மூலம் புதிய வர்த்தகப் பாதைகளை உருவாக்கி வரும் வேளையில், ஈராக் மற்றும் சிரியாவின் இந்த அதிரடி நகர்வு மத்திய கிழக்கு அரசியலில் ஒரு புதிய திருப்பத்தை ஏற்படுத்தியுள்ளது.
ஈரானைப் பொறுத்தவரை, ஹார்முஸ் ஜலசந்தியைத் தனது பலமான ஆயுதமாகக் கருதுகிறது. இந்தப் பாதையை மூடுவதன் மூலம் உலகப் பொருளாதாரத்தை மிரட்டி, அதிபர் டொனால்ட் ட்ரம்ப்பிற்கு அரசியல் அழுத்தத்தைக் கொடுக்க ஈரான் முயற்சிக்கிறது. அதே சமயம், அமெரிக்காவோ ஈரானின் பொருளாதாரத்தை முடக்கும் நோக்கில் அதன் துறைமுகங்களை முற்றுகையிட்டுள்ளது. இந்த இரு நாடுகளின் மோதலில் கச்சா எண்ணெய் விநியோகம் பாதிக்கப்படாமல் இருக்க, ஈராக் மற்றும் சிரியா கொண்டு வந்துள்ள இந்த நிலப்பரப்புப் பாதை உலக நாடுகளுக்கு ஒரு வரப்பிரசாதமாக அமையக்கூடும். போரும், பொருளாதார நெருக்கடியும் சூழ்ந்துள்ள இந்த வேளையில், இந்த புதிய ஆயில் வழித்தடம் வெற்றிகரமாகச் செயல்படுமா என்பதை உலக நாடுகள் உற்று நோக்கிக் கொண்டிருக்கின்றன.
