நாட்டையே உலுக்கிய கர்நாடகா மாநிலம் தர்மஸ்தலா கோயிலை சுற்றி 100க்கும் மேற்பட்ட பெண்களின் உடல்கள் புதைக்கப்பட்டதாக கூறப்படும் விவகாரம் தற்போது அடுத்த கட்டத்துக்கு நகர்ந்துள்ளது. அதாவது அடையாளம் காணப்பட்ட 13 இடங்களில் ஒரு இடத்தில் தோண்டும் பணி தொடங்கியிருக்கிறது.
கர்நாடகா மாநிலம் தட்சின கன்னடாவில் பிரபலமான கோயில், தர்மஸ்தலா. இக்கோயிலின் முன்னாள் தூய்மைப் பணியாளர் ஒருவர் கடந்த ஜூன் மாதம் தட்சின கன்னடா காவல்நிலையத்தில் சரணடைந்து வாக்குமூலம் ஒன்றை அளித்தார். அது ஒட்டுமொத்த நாட்டையும் ரத்தம் உறைய வைப்பதாக இருந்தது. 1995-ம் ஆண்டு முதல் 2014-ஆம் ஆண்டு வரை, தர்மஸ்தலா கோயிலில் பல பெண்கள் மற்றும் மாணவிகளின் உடல்களை அடக்கம் செய்யச் சொல்லி, கோயில் நிர்வாகத்தினரால் தான் கட்டாயப்படுத்தப்பட்டதாக கூறி அவர் அனைவரையும் அதிர்ச்சிக்குள்ளாக்கினார்.
அப்படி, அவர் புதைத்த பெண்களின் உடல்கள் பாலியல் வன்கொடுமை செய்யப்பட்டிருந்ததாகவும், சில உடல்களில் ஆசிட் தழும்புகள் இருந்ததாகவும் அவர் கூறியிருந்தார். தொடர்ந்து, உண்மையிலேயே தர்மஸ்தலா கோயிலை சுற்றி பெண்களின் உடல்கள் புதைக்கப்பட்டனவா என கேள்வி எழுந்த நிலையில், சிறப்புப் புலனாய்வுக் குழு ஒன்று அமைக்கப்பட்டது.
இந்நிலையில், தர்மஸ்தலா கிராமத்தின் நேத்ராவதி ஆற்றங்கரையில் புதைக்கப்பட்டதாக கூறப்படும் இடத்தில் உடல்களைத் தோண்டும் பணியை கர்நாடக காவல்துறை தொடங்கியுள்ளது. மேலும், நேத்ராவதி ஆற்றுக்கு அருகிலுள்ள ஒரு காட்டுப் பகுதியில் 13 இடங்கள் குறிக்கப்பட்டு தோண்டும் பணி ஆரம்பித்துள்ளது. நேற்று பிற்பகல் 12.15 மணியளவில் அடையாளம் காணப்பட்ட 13 இடங்களில் முதல் இடத்தில் தோண்டும் பணி தொடங்கப்பட்டது.
2 மணி நேரத்துக்கு மேல் நீடித்த தோண்டும் பணி கனமழை குறுக்கிட்டதால் தடைப்பட்டது. 2 அல்லது 3 அடி தோண்டுவதற்குள்ளாகவே தண்ணீர் தேங்கியதால் பணியில் பின்னடைவு ஏற்பட்டது. ஆனாலும், முதல் நாளில் எந்த உடலும் கண்டெடுக்கப்படவில்லை. வழக்கின் சாட்சியான முன்னாள் ஊழியரையும் நேரில் அழைத்து வந்து இடங்கள் அடையாளம் காண்பிக்கப்பட்டுள்ளன. இந்த பணி முழுவதும் வீடியோவாக பதிவு செய்யப்படுகிறது. கர்நாடகாவில் மீண்டும் பூதாகரமாக வெடித்துள்ள இந்த விவகாரத்தால் தர்மஸ்தலா, பலத்த பாதுகாப்பு வளையத்துக்குள் கொண்டு வரப்பட்டுள்ளது.